黃宗澤與胡杏兒拍拖八年，但一直以來你有你知，他們有他們死口唔認。
直至前年12月頒獎台上，奪視后的胡杏兒一時腎上腺標升，對着黃宗澤發表「互頂宣言」，像向全世界宣布自己的事業愛情如魚得水，大地在我腳下，你們羨慕我吧！
可惜羨慕不了多久，七個月後，胡杏兒單拖對傳媒說：「我們分手了。」
其實男女分手不是甚麼稀奇事，但到了這個關頭才說甚麼頒獎禮時感情已出現問題，那豈不有扮恩愛之嫌？還是由始至終都是箍仔招數？
看着流着眼淚楚楚可憐的女主角，大家都偏向相信男主角負心，偷嘗國產辣妹而惹禍。
這時候男人總是比較蝕底，解釋又話你死撐，唔出聲又話你默認。
黃宗澤很聰明，他很man地說：「我唔怕人哋抹黑我，呢啲嘢男仔食得起，要傷就傷我，唔好傷到佢（胡杏兒），否則我寧願死！」
就憑這幾句說話，所有正評都返晒嚟啦！
古語有云：「良禽擇木而棲，賢臣擇主而事」，頂唔順，唔好頂囉，最緊要知道不是一時衝動，不要後悔。
新年流流，在此祝Bosco心想事成，想復合便復合，想擔正的賀歲片《我愛HK 2013恭囍發財》大收就大收，恭喜恭喜！
杏兒信任不足
黃宗澤與胡杏兒分手接近半年，最艱難的時間已經過去，其實最痛苦可能只是不習慣沒有對方在身邊，說到底八年來也不曾有過寂寞的感覺。
「過咗咁耐，冇事啦，依家集中精神做嘢囉！」
靠工作來麻醉自己？
「又唔好講到我咁冇朋友，早兩個月我生日，啲記者係咁問我冇女朋友陪係咪好淒涼？淒咩涼啫，我差唔多年年都喺工作中度過，通常拍賀歲片都係12月，一定撞正我生日，呢三年都係志偉、Wilson（錢國偉）、緊哥（馮淬帆）、徐子珊、欣宜唱生日歌俾我聽囉， Wilson仲笑我『Bosco，你冇人生㗎喇！』
「講真入行之後同女朋友過生日嘅次數真係唔多，最多都係食餐飯，有時仲同埋阿媽㖭，所以冇乜浪漫回憶！」
他自嘲不是一個合格的男朋友，不但不懂照顧人，反而需要別人照顧，不溫柔，不浪漫，而且要求多多，難怪胡杏兒前年上台分享封后感受時說：「我知道自己有好多缺點、好難頂，佢（Bosco）亦一樣好多缺點又難頂，希望我哋一路頂住大家。」可惜，頂得一時，唔頂得一世。
「可能我真係太難頂，喺屋企成日黑口黑面唔出聲，變咗冇好好溝通。同埋我好鍾意整齊，譬如啲衫會分顏色掛起，啲鞋會影相入盒，得閒攞出嚟掃塵，無論阿媽、女朋友、朋友搞亂我啲嘢，我都好 ，我覺得自己有少少強迫症。我又好少俾驚喜女友，最多得閒煮餐飯氹吓佢，花都好少送。我係會為咗見朋友而cancel同女友約會嘅人，因為朋友少見啲嘛！」
生活習慣不協調可能是部分分手原因，但我相信不是主因，對口對面八年，要是包容不到，早就分了，不會拖到今時今日。所以很多人偏向相信因為黃宗澤偷食國產辣妹，傳聞中的名單有柳岩、唐嫣、宋新妮、葉青等，故受盡委屈的胡杏兒才含淚宣布分手。
「冇偷食呢回事，身邊咁多線眼，邊敢偷？我係一個artist，如果有緋聞，女朋友都會問吓，冇反應就冇可能㗎喇，信唔信你解釋又係另一回事。但如果調番轉佢有緋聞，我又真係唔會問，好多時我係選擇唔睇、唔理，報紙雜誌鍾意點寫都唔會動搖到我。」
黃宗澤不諱言這些傳聞對於彼此的信任度絕對有影響，長遠來看，是一個大問題。
「其實做artist好矛盾，你唔寫我，即係我冇新聞價值，唔紅啦，你寫我唔好，我又唔高興喎！好似周麗淇送個生日蛋糕俾我，講真大家同事拍緊同一套劇，有幾出奇啫？三哥獻吻㖭啦！」
其實周麗淇都是圈中的「鑽女」，不妨考慮一下吖！
「唔關我事呀，佢都唔係我鍾意嗰type！」
專嚇樂易玲
我覺得整件事最引人入勝的是，知道內情的無綫高層樂易玲在接受查小欣電話訪問時說：「Bosco喊得好緊要，話佢會等，會表現俾杏兒睇。」短短幾句話令黃宗澤由傳聞中的花心男變成癡心情長劍，形象得保，薑果然是老的辣。其實復合是他的真正想法嗎？
「仲問呢個問題？之前我係講過想復合，依家想平靜吓，單身吓先啦，我都會留意吓佢啲新聞嘅。」
吓！睇新聞咁間接？「唔係點呀？真係好少聯絡，只限於好間中send個WhatsApp問候吓囉，見到面咪點個頭say個hi囉，本來唔尷尬嘅，係你哋搞到我哋唔知點咁，好似台慶頒獎禮嗰晚，大家嘅鏡頭成日追住我哋，望又死，唔望又死，但我明白嘅，好彩男女分開坐。」
已到嘴唇邊的新抱茶突然泡湯了，媽咪沒有怨言嗎？
「我阿媽好勁，一句都冇問，亦冇安慰，唔知佢哋有冇私下聯絡唔話我知喇！」
他知道人在TVB，有些私事未必要跟親生阿媽講，但一定要禀告「樂大媽」，難怪被指「世界仔」。
「其實我成日嚇鬼佢（樂易玲）㗎，之前我哋一齊去澳門出席亞太影展，我先嚇佢話『今年頒獎禮，我唔返咯喎！』佢仲話『做乜唔返呀？你想死呀！』我成日講笑、幽默吓啫，唔係專登氹人嗰隻！」
自從05年拿過「飛躍進步男藝員」獎，黃宗澤幾乎年年捧蛋，視帝來來去去都是黎耀祥和林峯之爭，誰會有癮陪坐兼陪笑？
「又唔係好恨攞獎嘅，我不嬲諗住去開party咋喎，今年個個問我，我都話支持祥仔同松哥，我唔覺得阿峯會咁小器。」
其實去年他與鍾嘉欣的電視劇《護花危情》唔覺唔覺贏了《大太監》、《名媛望族》、《On Call 36小時》，成為無綫全年收視冠軍。雖然公司沒有給他一個獎座，卻直接投資電影讓他做男主角，可能看出他喜歡實際，今年邵氏賀歲片《我愛香港2013恭囍發財》便欽點他擔正。
「當然同樂小姐食飯，我都會借啲意話『啱啱睇完《寒戰》，好鬼好睇，如果我有份拍就好咯！』舉例啫，總之有話佢知我嘅願望，但我明白係要慢慢鋪排。
「 除咗公司，我都好感激三年前志偉搵我拍第一套賀歲片《72家房客》，係佢話要用我，佢不嬲好錫我，我當正佢係師傅。我依家愈嚟愈清楚志偉，大家一齊圍埋度劇本，佢一定瞇埋眼瞓覺，但導演一叫佢，佢又會醒晒係咁噏橋，好似冇甩過咁，你又吹佢唔脹喎！我哋問佢點解咁犀利，佢話臨瞓前已諗定一條橋，只不過太累，瞓一瞓咁解啫！」
辛苦到屙血
由一個model仔爬上無綫當家小生、電影男主角的位置，原來並不是黃宗澤想像般輕鬆。
「其實拍完陽光檸檬茶廣告後，都有其他公司想簽我，但阿媽主張我揀TVB，仲陪我去簽約，好老土嗰句『大樹好遮陰』吖嘛！」
最初被無綫安排到訓練班做旁聽生，但他前後只返了一個星期。
「有啲PA開始book我出去做茄喱啡，做過《創世紀》古天樂側邊嘅打手甲，因為我契媽識佢，入行前見過面，估唔到佢仲認得我。做做吓又俾人捉咗去做音樂節目主持，訓練班嗰邊就不了了之喇！」
他主持的《非常音樂空間》只需一個星期返一日工，絕對是一份優差，但想紅就幾難喇！
「感覺唔係咁良好，唔知做緊乜，好似白逗人工。我簽咗五年約，頭兩年已經頂唔順，覺得喺度蹉跎歲月。」
之後被安排加入《歡樂今宵》行列，又是一星期做一晚，但總算在木人巷兜過一圈。
「訓練我嘅臨場反應，你知鵬哥（盧海鵬）嗰啲轉數幾快，你反應慢啲都死，我嗰時都扮過麥兜、徐小鳳㗎！嗰時肥姐仲喺度，好錫我哋呢班細路仔，一收工就帶隊食宵夜，仲要係佢埋單，真係又食又拎，依家咪輪到我哋睇住欣宜囉！欣宜依家叫我阿媽做契媽，叫我做契哥。」
直至拍攝《衝上雲霄》，才開始被觀眾認識，雖然F4之中，公司擺明捧吳卓羲。
「行街啲人真係嗌得出我個名，原來唔止女人，男人着制服都好煞食㗎，哈…哈…，當年喺吳鎮宇身上學到演戲係一門好深奧學問，唔可以玩玩吓。」
當然他也有被罵被嘲的沉痛經歷，但挫折永遠令人成長。
「我記得第一次拍清裝打片，雖然之前鍛鍊過，但始終冇學過功夫，拍到最後一場對打場面，導演居然話『你求其擺吓甫士，我搵武師幫你打。』意思係你唔好阻住大家收工喇，聽到呢句，我就發誓練好身手俾佢睇，一放工就跟武師練拳，一年之後收到通知要拍《我師傅係黃飛鴻》，冇俾人鬧，導演仲話『原來你都幾打得喎！』」
直至06年的《賭場風雲》，黃宗澤的演技終被肯定，企穩一線，之後劇接劇冇停過。
「三哥（苗僑偉）話試過一年拍130幾集（劇集），我都試過一年拍120幾集，即係六套㗎喇！好記得拍《強劍》（07年）時，真係辛苦到屙血，拍拍吓暈喺度又試過，有時辛苦到返屋企撳住塊鏡喊，我喊住問自己『咁辛苦為乜呢？』」
為名為利囉，今時今日正是收成的時候了。
春光乍泄
分手之前一個月，黃宗澤在火炭晉名峰寓所被偷拍到與古裝頭的胡杏兒在客廳親吻，不過最大鑊是黃宗澤被拍下窗前全裸玉照，前後失守，慘不忍睹，惟有安慰自己「好嘢唔怕俾人睇」！
屋企位置「揚晒」，剛巧遇上分手，胡杏兒索性搬走買dream house，我估計黃宗澤也會盡快離開這個傷心地。
「冇咁嘅打算喎，我覺得住得幾舒服！」黃宗澤輕鬆地說。
我忍不住問：「俾人影晒全相，點都有啲陰影啩？」
黃宗澤：「當然有啲唔開心，我都有阿媽生㗎，又真係冇可能廿四小時閂窗簾，所以我專登換過晒啲上下開合嘅蜂巢簾，遮住大窗中間，上下透光。」
想像不來，於是我上網找過，真係得喎，嗱，如果將窗簾調校到胸以上，下體以下，Bosco大可繼續大解放，仲睇到日光㖭，或者應該快啲介紹給陳豪和陳茵媺。
留言列表
{{ article.title }}
