機種： PS3（只提供 PSN下載版）
廠商： FK Digital
類型：格鬥
人數： 1-2人
售價：$98

漫遊毒物

台製格鬥　 Chaos Code闖日追夢

2013年02月06日 ~~ 第298期 Face

馬丁路德金話：「 I have a dream」、周星馳都話：「做人如果冇夢想，同鹹魚有乜分別？」年輕有夢，梗係畀勇氣、靠自己去付諸實行。
由台灣團隊 FK Digital打造的格鬥新作《 Chaos Code》，製作人兼 CEO Mickey為夢想花足 6年傾掂日本廠商打本投資兼發行，成功令呢款 made in Taiwan遊戲進駐日本機鋪，最近更成功移植到 PS3推出下載版，咁勵志嘅打機追夢記，好睇過啲終極 FF尋夢園小說喇！

等足 6年　馬拉松式開發之旅

2003年，一款電腦免費格鬥《 Super Cosplay War Ultra》惡搞盡《 EVA》、《機戰》、《星矢》等動漫角色，紅遍港台日，更被日本廠投訴侵權。呢隻 game係由身居澳洲嘅台灣人 Mickey同一班業餘人士創作，更成功點燃起 Mickey嘅追夢雄心，自資成立 FK Digital，打算由業餘進軍商業遊戲界。打日本 game大嘅 Mickey一心諗住搵日本廠發行，吃過多次日式閉門羮後， 2005年終於搵到日廠合作開發。
呢條路並唔易走，先係澳洲製作團隊難以符合要求，途中將公司搬去台灣；到遊戲完成之際，機板零件廠宣告倒閉，結果一路等到 2011年才能在日本上市，猶幸見街後取得不俗成績，上年機鋪搞嘅全國大賽有 300多名高手參加，日本遊戲界竟然咁支持一款 made in Taiwan街機格鬥，真係史無前例。

2012年 9月舉行嘅《 Chaos Code》全國大賽，吸引咗數百名高手參加，圖為決賽前嘅 event， fans手上拎住 FK Digital嘅簽名板，當佢係明星咁拜。

連原聲大碟 CD都出埋， Mickey話希望能進入日本格鬥遊戲最大型比賽「鬥劇」嘅比賽項目。

F：為何想挑戰日本市場?

FK Digital CEO、《 Chaos Code》製作人 Mickey Lin

M：讀書時很熱忱玩《街霸 2》，我修讀電腦程式，也對繪圖感興趣，於是跟網友一起製作遊戲，最初只製作動畫，後來終下定決心認真做。但台灣沒有廠商具格鬥遊戲製作經驗，很自然的想到找日本廠商合作，也吃過多次閉門羮，後來製作《 Guilty Gear》的 Arc System Works卻很爽快地答應了，也許他們比較熟悉格鬥遊戲，被我們的誠意打動到吧？

F：為甚麼會把開發部門搬到台灣?

Mickey業餘時代製作的《 SCWU》，技安識變鐵甲萬能俠，隱藏角角係星矢，最後大佬係《機戰》嘅龍虎王。

M：當時在澳洲開發過一段時間，但美術風格完全不合，當時心想我們不是做《海綿寶寶》，就決心搬到台灣去，事後亦證明台灣人口味比較貼近日式風格。現在約有 10多名台灣員工，澳洲方面還是有數名員工負責宣傳。

F： 6年來怎樣維持公司運作？想過放棄嗎？

FK Digital仲有幫過 3DS出方塊遊戲，可以話係中港台少有唔出電腦 game，主打 console機嘅遊戲公司。

M：單靠《 CC》一早就要倒閉了，我們還接遊戲繪圖及其他外判工作維持開發團隊。放棄倒是沒有想過，只是覺得搞公司有很多人事煩惱，製作遊戲的過程還是開心的。

打落至覺有深度

試玩之下，《 Chaos Code》缺點係遊戲解像度跟番街機版，得 640× 480，畫面質素麻麻，仲係 4:3比例。但打落節奏真係好爽快，輕重拳腳 4粒掣順住㩒都連到招，比《街霸》更易出到華麗 combo。不過唔代表亂打都會贏，入面有好多高手合用嘅操作，例如出超必時可按輕拳輕腳取消收招動作，技術好可以超必駁超必打埋去，加上角色個性鮮明，個個唔同打法，難怪吸引到一班高要求日本格鬥遊戲迷支持同鑽研。

Chaos Combo
順序輸入輕拳＞輕腳＞重拳＞重腳已經係一套連技，臨尾仲可以駁必殺技，簡易明快。

Chaos Shift
出超必殺技途中輸入「輕拳+輕腳」，即可取消收招硬直再駁招，但消費一條超必計。

自選招式
每個角色除咗有固定必殺技，仲可以喺 4招自選招式入面選 2招。

Exceed Chaos
類似《拳王》嘅爆氣，儲滿 3條超必計使出，進入爆氣狀態能任出超必，但係時間一過會進入 overheat狀態，一段時間內儲唔到氣。

追夢要有心

十年前打到天昏地暗嘅《 SCWU》居然出自 Mickey之手，如此奇遇筆者當然要把握機會話當年。話說遊戲中有個背景大大隻字寫住「梨木樹」（見小圖），一問之下， Mickey就話當年有大半製作人都係香港人！「香港的程式員都好厲害，真懷念曾跟他們合作。」可見高手香港都有。 FK Digital能立足日本，靠實力更憑決心，念念不忘，必有回響，有燈就有人，幾時到香港人點燃遊戲開發呢盞燈呢？