筆者上星期，一開 WhatsApp就見到「即將到期」嘅提示，最慘係只可以收訊息，想 send訊息出去同 friend講都已經被禁止，啞咗一樣！

電訊型科

全城熱話 WhatsApp收錢了

2013年02月06日 ~~ 第298期 Face

傳聞已久話本港流行嘅手機通訊軟件 WhatsApp會收錢，一路大家都當佢係狼來了，點知近日筆者同唔少 Android用戶，一開 WhatsApp都見到「即將到期」嘅提示，想繼續玩的話，就要俾 0.99美元（$7.7港元）年費喇！話晒 WhatsApp都係全港最多人玩嘅手機通訊軟件，用戶多達 300萬，所以隨即引起網上激烈討論，有人話收費合理、有人鬧佢偏袒 iOS用戶、有人更話拉隊轉玩 LINE同微訊。

下載網址：

iOS/$8

Android/首年免費，其後 0.99美元 1年

WhatsApp

iOS$8玩一世　 Android得一年

其實 WhatsApp喺 iOS那邊，除咗最早一批用戶，或間中有免費安裝優惠日外，一直都係收費軟件，$8玩一世，所以今次 WhatsApp收費，同佢哋無關。今次主要針對 Android、 BlackBerry等 OS用戶，皆因呢類 OS裝 WhatsApp時雖則話免費 1年，但一直以嚟都不斷獲得免費續期。難怪唔少 Android用戶一覺醒來開 WhatsApp就見到「即將到期」嘅提示，而且更不能再發訊息而譁然！唔少人更在網上大罵， iOS用戶就$8玩一世， Android用戶$7.7只得一年，鬧 WhatsApp大細超。

想繼續玩嘛？就要揀「 Purchase extension」，之後輸入信用咭資料，俾約$7.7一年就得，學生哥冇信用咭就要搵親友幫手。

自從開始收費後，唔少人都喺 Google Play嘅「使用者評論」破口大罵！多數用家都話佢偏袒 iOS、忽略冇信用咭用戶、最後 7日期限就唔俾人發訊息等。

轉會用家有着數　記住睇到期日

有網友就呻 Google Play喺香港只可用信用咭付款，對一啲冇信用咭嘅用戶構成不便。不過如果你以前係用 iPhone裝 WhatsApp，後轉 Android機的話，就不妨睇睇你 WhatsApp內 Account嘅一項，望吓 Service expiration到期日，事關有唔少舊用戶喺首次安裝時俾咗$8， WhatsApp會優惠佢哋將到期日設為「終身」。呢個情況只限首次裝 WhatsApp係經 iPhone嘅舊用戶，如果你係用 Android機裝 WhatsApp先，即使去 iPhone俾$8再裝，返到 Android機都只會延長你 1至 2個月期限。

唔少用戶首次玩 WhatsApp時係用 iPhone裝的話，當時畀嘅$8已經代表有終生期限，只要唔轉手機號碼，即使換 Android機都唔使再畀錢。

可惜最初係用 Android機裝 WhatsApp的話，𠵱家即使再去 iPhone用$8裝多次，再返去 Android機。入 WhatsApp嘅 Account一項，睇 Service expiration都只會延長 1至 2個月期限，永遠冇終生！

之前成日收到 WhatsApp嘅收費連鎖訊息，話轉發呢個訊息，先可以繼續免費用。雖然 WhatsApp𠵱家真係收費，但你轉發過幾多次呢個訊息，都冇得免費用，流到爆！

其他選擇

如果你好似筆者一樣係孤寒種，$8都唔想畀，其實仲有好多免費手機通訊軟件可選。佢哋除咗有文字通訊功能外，更有好多得意 icon、 game俾你下載，甚至更有韓國、日本明星同你 chat，功能絕對唔比 WhatsApp輸蝕。

得意 icon　 LINE

雖然來自韓國最大搜尋器 Naver，但就喺日本大熱，最近更在台灣成功擊敗 WhatsApp，筆者個個台灣 friend都由 WhatsApp過檔玩 LINE。賣點係勁多得意公仔 icon，加上又有少女時代、濱崎步等韓、日明星 account，等你 add佢 send訊息畀佢，好運佢更會覆你，夠晒多嘢玩。

LINE

下載網址：

iOS/Free

Android/Free

連動 QQ　 WeChat

國內最多人用嘅手機通訊軟件，全球用戶多達 3億，僅次 WhatsApp嘅 4億。 WeChat最大賣點係可以一次過連動 QQ同微博，等你可以同各個範疇嘅 friend吹水。另外， WeChat嘅錄音帶功能亦比較強，㩒一個掣就錄，再㩒就聽，唔使再開其他 app聽咁煩！

WeChat

下載網址：

iOS/Free

Android/Free

總結：因簡單而收費
一視同仁更完美

雖然好多人鬧 WhatsApp最終要收錢，比唔上其他手機通訊軟件可以 keep住免費用。但要留意 WhatsApp嘅運作模式係以簡單為主，既冇廣告同 banner，亦唔會有收費 icon同 game你裝，最重要係完全無過濾。所以 WhatsApp要維持運作，難免要向用戶收費，加上喺香港亦係佢較多人玩。當然筆者亦希望佢可以一視同仁，如果 Android、 BlackBerry等 OS，都好似 iOS一樣，$8玩一世就更 perfect啦！