安室雖年屆 35歲，而且身高只得 5呎 2吋，但勝在保養得好又有 style，所以經常被雜誌邀請示範時裝。
日面
出道 20年 安室處女港騷啟市
現已 35歲的日本樂壇天后安室奈美惠，出道 20年，終於喺下月殺入亞洲博覽館舉行首次香港演唱會，最貴$1,680門票於短短 45分鐘內賣清光，天后魅力果然難擋。
近年安室已減少拍廣告，主打歌唱事業，唔只演唱會場場爆，加上唱片又賣得，事業早已超前遲過佢成名嘅濱崎步。但最近有指單身的安室只顧住工作，導致與家人關係惡化，大仔溫大更曾試過離家出走，真係有得必有失。
港迷搶飛
難得安室處女港騷將於 3月 16日舉行，票價最平為$680、最貴為$1,680。門票已於上週四（ 31日）公開發售， 45分鐘內最貴飛已賣清光，唔少港迷亦上網話一定要去捧場。
近年 J-pop得 AKB獨大，日本歌姬濱崎步人氣不斷下跌，而倖田來未生仔後更半退休，現時仍可企得住腳的同 level天后只有 35歲的安室奈美惠。上年推出大碟《 Uncontrolled》曾連續 3週霸佔 Oricon大碟榜冠軍；而近年安室雖然甚少拍廣告，但因形象矜貴又夠潮，最近更以 5,000萬日圓（約 440萬港元）成為日本 CM身價最高藝人 No. 1。
安室出名跳得唱得，上年尾已於日本 5大巨蛋舉行演唱會，而今年將去台北、香港及新加坡等城市做巡迴演唱，趁自己狀態仲 fit時盡量搵銀。
多年前，安室經常拖住仔仔溫大出街，非常溫馨。但最近安室因只顧工作，難以抽時間照顧仔仔，令母子關係惡化。
CM最高價
安室拍廣告出名揀擇，唔係大牌子都請唔郁佢，近年只幫 KOSÉ化妝做代言。由於安室唔濫做，所以廣告酬勞高達 440萬港元一個，成日本女星之冠。
近日安室幫 KOSÉ做代言嘅最新春夏唇膏廣告海報，亦貼於香港各大百貨公司當眼位。
舞台玩豪華
今年安室的最大目標是衝出日本攻打東南亞市場，由 2月 23日開始，安室將攻台北及新加坡等多個城市舉行巡迴演唱會《 Namie Amuro Asia Tour 2013》；而香港亦是其中一站，將於 3月 16日於亞洲博覽館舉行。
據知今次安室香港騷的舞台設計與去年她在日本舉行 5大巨蛋騷一樣玩豪華；而選歌方面不乏她當年與小室哲哉合作、全盛時期的名曲〈 Can You Celebrate〉及〈 Chase The Chance〉等，肯定搞 high七、八十後港迷。
大仔曾出走
上年 8月安室曾推出大碟《 Uncontrolled》，此碟曾高踞大碟榜 3星期冠軍，至今銷量高達 52萬張，而濱崎步去年亦有推出《 Love》同《 Again》等 4張大碟，但銷量夾埋都唔過 50萬張，成績差一截。
安室現時雖事業順利又賺大把錢，但卻因只顧工作而忽略家庭。有報道指現時已 14歲正值反叛期的安室大仔溫大，因與安室聚少離多， 2人唔只關係惡化，而且見親面必鬧交，溫大更曾試過因安室缺席學校舉行的親子活動，一怒之下離家出走！睇嚟安室要平衡吓事業與家庭喎！
潮女 Kyary硬撼安室
繼潮媽安室後，新一代日本潮流教主 Kyary Pamyu Pamyu亦將於 3月 17日來港舉行《 100% KPP WORLD TOUR 2013 in HONG KONG》演唱會，出名形象古靈精怪的 Kyary，到時唔只獻唱首本名曲〈 PonPonPon〉，更會大玩 cosplay同歌迷互動。雖然來港硬撼安室，但 Kyary只於九展開騷，號召力同安室冇得比。
Kyary將於 3月 17日來港於九展開騷，票價全部劃一為$580，比安室演唱會最平$680飛平足$100。
Kyary Pamyu Pamyu唔只個名，衣着同個樣一樣古靈精怪。
留言列表
{{ article.title }}
