專題 Log In

一代宗師×盛女神算　癸巳蛇駕手冊

2013年02月06日 ~~ 第1098期交易通．搵車快線

下星期送龍迎蛇農曆年就到，個個都爭住睇流年運程。財運、桃花固然緊要，但對車友嚟講，流年揸車事宜先係最貼身重點！運程唔好，輕則破財惹官非、重則意外有血光之災！為令車迷喺蛇年路路亨通，《搵車快線》當然再次請嚟玄學界一代宗師蘇民峰為車友指點迷津，今年更邀得《盛女愛作戰》都要搵佢畀意見嘅新一代師傅陳定邦出手，合力炮製獨家趨吉避凶嘅「蛇駕秘笈」！等大家喺新一年出入平安、旺足全年！

蘇民峰 Profile

香港無人不識 no.1堪輿學家， 1983年開始為客人分析風水、命理，善於將玄學靈活運用於現代環境，差不多所有香港電台都主持過玄學節目，以及推出多本玄學著作。

蘇民峰揀車論

想喺蛇年揸車旺足全年，蘇師傅話汽車包圍住整個人，揀車時最緊要係留意自己嘅命格同五行顏色嘅配合，寒、熱、平命人各需不同色系。其次，唔同生肖車迷亦可以從五行相剋理論出發揀牌子同車牌，木剋土、火剋金、水剋火、土剋水、金剋木，例如你生肖屬鼠五行屬水，就要揀一個食得住嘅五行屬性品牌同車牌，屬火牌子如 Toyota同 2、 7數字車牌就最啱！

寒熱命配顏色

寒命人（西曆 8月 8日至 3月 6日）
配青、綠、紅、橙、紫

熱命人（西曆 5月 6日至 8月 8日）
配白、金、銀、黑、灰、藍

平命人（西曆 3月 6日至 5月 6日）
可配任何顏色
（若日子重疊兩種命格，則 2類顏色皆可。）

蘇民峰︰「蛇年水、土車最熱賣！」

據蘇師傅講，喺蛇年五行之中以水為最佳，其次係土最旺。喺車壇上面，首先可以用車形去理解，屬水即係指波浪形嘅車款；屬土則係四方形車，可見流線跑車同方正 MPV同 SUV都會較受歡迎。同時屬水嘅顏色如黑、灰、白及屬土嘅顏色如米白、黄，都會賣得較好。「我哋仲可以睇埋牌子嘅發音，屬水係唇音： B、 F、 M、 P、 V、 W，好似 M-Benz、 Volkswagen；屬土係喉音 A、 K、 N、 Q、 U、 Y，例如 Audi、 Nissan，都有機會喺蛇年大賣。另外，數字都會有少少影響，若果車名中有屬水數字 1、 6亦會好賣啲。」
就好似蘇師傅今年揀出嚟嘅拍攝車黑色（顏色屬水） M-Benz（發音屬水） E-Class開篷，外形流線得嚟又多方角位（水、土形狀）蛇年就 hit爆！「我年頭都自己買咗部 E350開篷，不過因為我條命要火，易手難賣啲都要訂部火紅色。」

M-Benz E200 Cabrio Blue EFFICIENCY Spec.

引擎： 1,796c.c.直四 turbo
馬力： 184ps/5,250rpm
扭力： 27.5kgm/1,800-4,600rpm
傳動： 5前速自動波、附＋/﹣模式
車重： 1,710kg
車身： 4,698× 2,015× 1,398(mm)
耗油： 5.8-9L/100km
售價：$559,000
查詢：仁孚行（ 2895 7339）

陳定邦 Profile

香港正統藏傳佛教金剛上師陳果齊獨生子，自小師承父親，精通紫微斗數、八字、奇門遁甲、面相及各派風水等術數。又因曾留學外國，學習西洋占星及塔羅牌，專長以中西合璧分析並解決感情問題，現於新城電台主持玄學節目，並曾被 TVB《盛女愛作戰》及 J2《 Big Boys Club》邀請作愛情玄學顧問。

陳定邦：「趨吉避凶靠法寶！」

據陳師傅講，每年每個生肖嘅運程都會唔同，應用喺車上面，就可以根據自己生肖嘅流年，以五行推算出某幾種比較旺自己嘅顏色，揀啱顏色車就最有趨吉避凶作用。不過並唔係所有車迷都可以年年換車或轉色，好在陳師傅仲有方法。「車主可以放一啲合適嘅車飾，例如有利自己嘅生肖飾物、某啲水晶玉石，都有助增強運勢、減少意外發生，不過切忌放一啲尖角或利器喺車入面。」後頁就會列出各生肖喺蛇年所需嘅顏色同飾物。
此外，對於感情特別有研究嘅陳師傅仲話，唔同生肖人士如果特別想旺桃花，仲可以跟下表針對性咁擺放特定生肖配飾。

十二生肖旺桃花飾物

牛、雞、蛇：馬形飾物
豬、兔、羊：鼠形飾物
鼠、龍、猴：雞形飾物
虎、馬、狗：兔形飾物

蘇民峰：「四撞車年意外多！」

除咗個人運程，大家都會關心到香港運，對於蛇年香港交通，蘇師傅就話：「虎、猴、豬、蛇為四撞車年，故蛇年交通意外仍然會特別多，其中農曆 1月、 4月、 7月、 10月為損傷疾病月，情況會更加明顯。喺呢幾個月揸車就應盡量避免去西南區及中區內陸地區，例如西九龍港島嘅山頂等，兩個易有意外發生方位。而日日車不離身嘅職業司機，亦可簡單去捐血或洗牙應損傷避劫。」

歲駕運最霉生肖

Worst 1

蛇：炒得最甘
蛇為犯太歲生肖外，仲有「血刃」、「劍鋒」凶星，易生血光意外，揸車人士當然就較容易有車禍撞擊。另外，受「指背」星影響，除容易招惹是非外，亦有可能背部受傷，好彩仲有「解神」吉星，最後都會逢凶化吉。不過今年都係最好唔揸啲馬力太大嘅快車，而且座位都要坐得舒服啲嘅車好。

蘇民峰揀車要訣

五行屬性：屬火剋金
屬金數字、字母： 4、 9、 C、 G、 H、 X
適合品牌： Citroen、 Honda、 Hyundai

Honda N-One
屬金嘅 Honda今年推出 N-One K-Car，外形復刻元祖四個轆 N360，採用 660c.c.嘅直列三汽缸引擎，最大馬力都係 58匹，容易操控，可減低意外發生，車仔細細但內籠又潮又舒服。
售價：約$170,000

陳定邦催運飾物

Angry Birds彈珠玩具擺設
售價：$50（ a）

幸運顏色：白、灰、藍
幸運飾物：雞形飾物

Worst 2

豬：勞碌多變
屬豬嘅朋友喺蛇年為沖太歲生肖，「驛馬」代表變化較多，包括感情、事業、住屋等，加上有「大耗」會破財，好大機會換車四圍去，買部慳油 SUV或旅行車外遊散心最 fit。不過今年仲有「歲破」，面部、唇齒容易受傷，故適宜揸一啲高身車款，減低受傷機會。

蘇民峰揀車要訣

五行屬性：屬水剋火
屬火數字、字母： 2、 7、 D、 L、 R、 T
適合品牌： Daihatsu、 Lamborghini、 Land Rover、 Lexus、 Lotus、 Renault、 Toyota

Toyota RAV4
屬火嘅 Toyota全新第 4代 RAV4剛到港，中型 SUV最啱外遊散心， 150匹 2.0公升引擎配 7速 CVT波箱， 13.7km/L夠慳油，「驛馬」周圍走都唔大食， 32萬起車價應驗「大耗」破財都冇咁傷。而且車廂闊落豪華，萬一應驗「歲破」，都唔怕會整傷，加上尾箱寬敞，去機場都方便擺放行李。
售價：$325,000起

陳定邦催運飾物

Bandai扭蛋玩具馬騮仔匙扣
售價：$58（ b）
《壹週刊》圖片

幸運顏色：黃、棕色
幸運飾物：猴形飾物

Worst 3

羊：凡事忍耐
屬羊今年凶星較多，尤其受「羊刃」影響，有時會缺乏忍耐力，而且會有較多負面情緒，揸車時容易衝動而生意外，職業司機亦有機會因欠缺耐性而收到投訴，揀車當然唔可以太快又要操控靈活，同時換架好玩嘅車亦有助紓緩情緒。

蘇民峰揀車要訣

五行屬性：屬土剋水
屬水數字、字母： 1、 6、 B、 F、 M、 P、 V、 W
適合品牌： BMW、 M-Benz、 Ferrari、 Maserati、 Peugeot、 Porsche、 VW

M-Benz A180
屬水嘅 M-Benz全新第 3代 A-Class外形超有動感，操控脫胎換骨，靈活性媲美小跑車，揸車衝動都安全啲。而且入門 A180型號 1.6公升偈都係 122匹唔算太快， 7速雙離合器波箱快慢都易控制。
售價：$279,000

陳定邦催運飾物

紫水晶配以同心結，可作吊飾之用，有助排除負面情緒。
售價：$500至 1,000（ c）

幸運顏色：白、米白
幸運飾物：紫水晶

陳定邦：「蛇、豬、羊歲駕運最差！」

VW波浪形嘅銀色車一樣屬水，陳師傅揀出嚟嘅呢部 Beetle GT都會大熱。查詢： VW HK（ 3698 9688）

每年唔同生肖人士都會有唔同福星同災星入主，除影響整體運程之外，有啲對駕駛嘅影響更加特別大，所以形成每年唔同嘅「歲駕運」，陳師傅就有以下提示：「今年歲駕運最差係肖蛇人士，唔單只本命年犯太歲，更有『劍鋒』會因金屬利器而有血光之災，交通意外引致受傷機會最大。其次屬豬沖太歲，因為『大耗』星入主會強勁破財，容易經常壞車或碰撞。最後屬羊有『羊刃』，多意氣之爭，揸車時容易同其他車輛各不相讓而發生意外。」

歲駕運最旺生肖

Best 1

雞：升職聚財
屬雞喺蛇年為太歲相合年。唔單只有「三合」吉星，工作崗位會提升優勢，仲有「金匱」，好似夾萬咁，係聚財吉兆，車友可以揀番啲四四方方嘅車款，寓意聚積財富。

蘇民峰揀車要訣

五行屬性：屬金剋木
屬木數字、字母： 3、 8、 E、 J、 S、 Z
適合品牌： Jaguar、 Suzuki、 Saab、 Subaru、 smart

Suzuki Solio
屬木嘅 Suzuki Solio外形四方，佢嘅 1,242c.c. VVT引擎耗油量平均每公里只需$0.8，而且車價扣埋環保稅都唔使$160,000，應驗晒「金匱」意思，可為車主聚積財富。
售價：約$162,800

陳定邦催運飾物

阿 May同阿 June都係麥嘜內牛形嘅卡通人物。
售價：$78（ b）《壹週刊》圖片

幸運顏色：紅、黃
幸運飾物：蛇、牛形飾物

Best 2

鼠：貴人相助
屬鼠嘅車友喺今年就有「紫微」、「龍德」吉星，容易有女貴人幫助不特止，人緣運極好，遇到理想對象，不妨出動溝女戰車，盡地一鋪！今年仲有「玉堂」，事業運會更上一層，外形特別嘅跑車，能演示出創作力豐富嘅特質。

蘇民峰揀車要訣

五行屬性：屬水剋火
屬火數字、字母： 2、 7、 D、 L、 R、 T
適合品牌： Daihatsu、 Lamborghini、 Land Rover、 Lexus、 Lotus、 Renault、 Toyota

Lotus Exige S
屬火嘅 Lotus今年推出 facelift頂級版 Exige S，全新外形媲美拉利、林寶等數百萬超跑，流線車形逢女必冧， 3.5公升 V6 supercharge引擎勁到 350匹，高度溝通操控感同 6速手波駕駛樂趣無限，最能激發創作力豐富嘅特質。
售價：$1,152,000

陳定邦催運飾物

日本 Miffy兔形陶瓷公仔。
售價：$68（ b）《壹週刊》圖片

幸運顏色：黑、藍
幸運飾物：兔形飾物

Best 3

馬：魅力四射
屬馬者喺蛇年為「咸池」桃花年，姻緣運強，單身者容易展開新戀情，加上另有「太陽」星助力，能開拓更好嘅人際網絡，廣交朋友。今年揸車好大機會兜到女同貴人，車款亦最好有陽光氣息，應合「太陽」活魅力充沛特性。

蘇民峰揀車要訣

五行屬性：屬火剋金
屬金數字、字母： 4、 9、 C、 G、 H、 X
適合品牌： Citroen、 Honda、 Hyundai

Hyundai Santa Fe
屬金嘅 Hyundai上年推出新一代 Santa Fe， SUV外形潮晒又有活力， 35萬車價夠平，仲要有 7個位，可以喺新相識女性面前 sell踏實之餘，一次過遇到多個心儀對象或貴人，都可以一個不漏載晒。
售價：$348,000

陳定邦催運飾物

太陽吊飾，可加強邏輯思維，亦可增強活力。
售價：$500至 2,500（ d）

幸運顏色：綠、青、白
幸運飾物：太陽石

猴：多女相助
屬猴喺蛇年為太歲刑合年，人緣容易走向兩極化，但有「歲合」、「太陰」，易得女貴人扶助，今年亦宜主動出擊，追求理想對象，當然要出動啲溝女轎跑！而凶星只有一啲小星，師傅話可以毋須理會。

蘇民峰揀車要訣

五行屬性：屬金剋木
屬木數字、字母： 3、 8、 E、 J、 S、 Z
適合品牌： Jaguar、 Suzuki、 Saab、 Subaru、 smart

Jaguar F-Type
屬木嘅 Jaguar全新 F-Type係經典 E-Type後繼雙座位 Roadster，外形有動感得嚟夠高貴，無論女性對象或貴人都唔會覺得你冇內涵，載住佢哋遊車河都特別多話題，仲有 340、 380同 495匹三副 engine揀，迎合唔同嗜辣女性。
售價：$1,288,000起

陳定邦催運飾物

蛇形公仔購自深水埗玩具街，約有手掌咁大，可放於車頭位置。
售價：$30（ e）

幸運顏色：紅、橙、黃
幸運飾物：蛇形飾物

狗：紅鸞星動
屬狗喺蛇年為「紅鸞」正桃花年，單身嘅容易識到心儀對象，仲有「月德」貴人星，可借人緣之力，讓事業更進一步，可惜有「小耗」會輕微破財，換部唔太貴嘅跑車享受吓應咗佢就最啱。

蘇民峰揀車要訣

五行屬性：屬土剋水
屬水數字、字母： 1、 6、 B、 F、 M、 P、 V、 W
適合品牌： BMW、 M-Benz、 Ferrari、 Maserati、 Peugeot、 Porsche、 VW

Porsche Cayman
屬水嘅 Porsche上年出完新一代開篷 Boxster，今年就到出新款硬頂 Cayman，流線外形出名女人最愛，最啱載住愛侶遊山玩水，車價作為入門級超跑亦可應吓「小耗」。
售價：約$877,000

陳定邦催運飾物

紅紋石傳統可打動女人心，易得女貴人幫助。
售價：$300至 2,000（ c）

幸運顏色：黑、灰
幸運飾物：紅紋石

牛：情緒低落
屬牛嘅車友喺蛇年可謂凶星雲集，特別要小心「飛廉」，喺工作地方是非會特別多，買車不宜招搖。「華蓋」亦會令屬牛嘅朋友情緒低落。揀架揸得開心嘅車好啲。

蘇民峰揀車要訣

五行屬性：屬土剋水
屬水數字、字母： 1、 6、 B、 F、 M、 P、 V、 W
適合品牌： BMW、 M-Benz、 Ferrari、 Maserati、 Peugeot、 Porsche、 VW

VW Golf
屬水嘅 Volkswagen今年推出最新第 7代 Golf，低調平實外形唔怕惹是非，車身加大、豪華設備增，亦有助紓緩情緒。就算要發洩，佢嘅 1.4公升 TSI引擎亦由 120匹提升至 140匹，絕對夠你爆！
售價：約$220,000

陳定邦催運飾物

大版蛇形公仔擁有彈性，可作頭枕。
售價：$40（ e）

幸運顏色：紅、橙
幸運飾物：蛇形飾物

虎：氣勢如虹
屬虎喺蛇年為權力地位提升年，有「福星」拱照，同「天德」貴人星相助，唔單只上班族有望升職加薪，做老闆嘅亦可提高在行內地位，升呢買番部高級行政房車就係呢個時候喇！不過「卷舌」同「劫殺」，是非同破財機會較多，為免過分招搖，車款最好揀部踏實番啲。

蘇民峰揀車要訣

五行屬性：屬木剋土
屬土數字、字母： 5、 0、 A、 K、 N、 Q、 U、 Y
適合品牌： Acura、 Alfa Romeo、 Aston Martin、 Audi、 Kia、 Nissan、 Opel

Audi S8
屬土嘅 Audi今年為頂級豪房 A8推出最強 S8型號，啱晒大老闆超然身份，仲冇大路德國名牌咁張揚銅臭。外形夠晒老闆級威嚴感之餘，內籠豪爆唔失禮， 520匹 4.0公升 V8 twin-turbo新偈強勁， 13.2L/100km耗油仲大減 23%，連環保形象都可建立埋。
售價：$1,973,000

陳定邦催運飾物

呢個牛公仔係一個發聲豆袋公仔，可發出牛嘅叫聲。
售價：$68（ b）《忽然 1周》圖片

兔：外遊升呢
屬兔嘅朋友今年係「驛馬」生肖，喺工作或生意上容易有變化，亦會成日四周出外工作，「八座」吉星有助提升行內地位，蛇年買部外形高貴典雅嘅歐洲車款最適合不過。不過屬兔嘅朋友今年亦有「吊客」、「天煞」、「急腳煞」一啲小凶星，容易心情煩躁，注意一下駕駛態度。

蘇民峰揀車要訣

五行屬性：屬木剋土
屬土數字、字母： 5、 0、 A、 K、 N、 Q、 U、 Y
適合品牌： Acura、 Alfa Romeo、 Aston Martin、 Audi、 Kia、 Nissan、 Opel

Audi RS6 Avant
「驛馬」生肖經常外出工作、遊玩，揸部屬土嘅 Audi啱啱出嘅頂級高性能旅行車 RS6 Avant，擺得嘢多最切合實際需要之餘，亦迎合地位提升有 face， 560匹 4.0公升 V8 twin-turbo引擎， 0-100km/h只需 3.9秒，趕飛機都未驚過！
售價：約$1,500,000

陳定邦催運飾物

黑曜石有吸走霉氣功效，最好放喺右邊車門。
售價：$300至 1,500（ c）

幸運顏色：藍、綠
幸運飾物：黑曜石

龍：添丁發財
2013蛇年係屬龍朋友嘅「天喜」桃花年，除咗單身嘅朋友感情會有着落之外，屋企亦有增加新成員機會，加上「陌越」星，同上司打好關係，有助提升工作崗位，當然要換部載得多人又舒服嘅車。不過今年有「囚獄」，路面上就要多啲忍讓，減少口角機會。

蘇民峰揀車要訣

五行屬性：屬土剋水
屬水數字、字母： 1、 6、 B、 F、 M、 P、 V、 W
適合品牌： BMW、 M-Benz、 Ferrari、 Maserati、 Mazda、 Peugeot、 Porsche、 VW

Mazda CX-9
屬水嘅 Mazda頂級 SUV CX-9豪華舒適之外，車籠寬敞仲有 7座位，生三胞胎都載得晒，亦方便接載朋友、同事，有助建立更好關係。
售價：$535,000

陳定邦催運飾物

粉紅晶可聚人緣，打好人際關係。
售價：$500至 2,500（ c）

幸運顏色：紅、橙
幸運飾物：粉紅晶

行大運切忌大包圍

農曆年假無論揸車去拜年或冇嘢做去遊車河，例必應吓節行大運！今年 2位師傅對行大運方位都有相同見解，跟住行包冇衰！不過出發前蘇師傅就有嘢要提提大家：「行大運最好喺年初一，去唔同方位作用各有唔同。記住唔好諗住大包圍行晒東南西北就乜都好，咁唔專心就乜都唔成，所以要諗定自己要乜，先選定行大運路線。出發位置最好喺全港中宮位荃灣大帽山；而港島中宮位就係太平山頂。如果嫌麻煩，喺屋企門口開始計當中宮位都得。」

求偏財一路向西

陳定邦：「想生意做得成功，點都要靠啲偏財，咁就一定要行正西路線，而北面就係正桃花位。」如果喺荃灣出發，可以行青山公路入屯門黄金海岸食個早餐，咁就應晒偏財西位。之後再接元朗公路北上去天水圍嘅濕地公園睇吓風景接桃花，咁就人財兩得啦！

東北名利雙收

蘇民峰：「想蛇年自己事業有成，就喺初一行向正財位嘅東北行。」建議由中宮荃灣出發，經城門隧道、大埔公路入大埔，有時間仲可以入埋大美督茶座歎杯茶，咁就實名利雙收啦！

查詢：
（ a）自成一格（ 3586 9411）
（ b）世紀 HOBBY（ 2393 7082）
（ c）麒麟水晶玄學會（ 2639 7908）
（ d）時尚水晶專門店(2398 2768）
（ e）精品玩具（ 2387 3220）