初出道的周秀娜，很有娛樂性。寫真、雪糕、攬枕、起底……我懷念那個時候的她，面對各方人士對她的過分好奇心，她也能處之泰然，臉上帶着青澀的笑容，當中還夾雜豪氣的大俠式奸笑。四年多後，這位曾是不少少男最愛的o靚模始祖，工作地點已愈來愈遠離香港，靠近祖國，模式也似演員多過模特兒。還有，最近更失戀了。「大家一齊咁耐，我覺得女人嘅第六感、或者直覺好準。（同女拍檔傳緋聞）呢啲嘢如果冇發生過，我自己唔會假設佢發生。其實呢樣嘢好難呃得到，唔會假設呢樣嘢會唔會發生而去做預防，我覺得感情呢樣嘢冇得好預防。」如果像她演出的Goyeah.com微電影片名《兜售回憶》般，能把不快的記憶賣掉，娜姐的語氣或者沒有那樣無奈、沉重。如果，命運能選擇……

 

分開

娜姐與拍拖六年的陳偉成（Avis）分手原因，眾所周知是她口中說的「步伐同目標唔同咗」。至於實情，他們兩個人最清楚。若有稍為留意娜姐，她一年並沒有很多個月留港。

「各有各忙囉！哎，情侶之間實係咁o架啦，實有啲嗌霎呀，跟住又好吓。」

娜姐不在港時，Avis也有不少性感演出，拍檔也夠火辣辣。

「性感演出？佢吖嘛！係呀，唔好嘥，咁佢身形好吖嘛，佢OKo架。佢都成日keep住去做吓gym，男仔我又覺得冇所謂。」

講到尾，兩人的確聚少離多，Avis也三番四次與女拍檔傳緋聞。

你估只有Avis和索女火辣辣？周秀娜在微電影《兜售回憶》中一樣和肌肉型男在桌球枱上激咀纏綿。

「你唔鍾意嘅最多唔睇囉，但我冇嗌佢咩都唔做。我自己拍過呢類嘢，自己知道邊一啲位係真，邊啲係假。就算佢有投放過感情，甚至乎出事嘞，大家一齊咁耐，我覺得女人嘅第六感、或者直覺好準。

「喺好唔開心嘅拍拖經驗中，雖然未致於唔見咗一個人，但係會無奈囉，你唔知點樣好。繼唔繼續好呢？搵唔搵你好呢？會有一樣嘢心掛掛。我唔係冇耐性，但發生咩事都好，點都要有個交代，都要講聲o架！點呢？我哋兩個點呢？我覺得有啲嘢，起碼都要得個知字！」

終於，娜姐以短訊通知Avis分手。交代清楚，得個知字，乾手淨腳。

周秀娜在《十大中文金曲頒獎音樂會》宣布單身，呼籲別人熱烈追求後，遇上了方大同。

娜姐

兩年前，叫娜姐做「翻版樂基兒」，已有突兀的違和感。正如，你仍視今天的周秀娜做o靚模一樣。原因？她本人最清楚。

「o靚o靚吓就唔o靚啦。」

大家喜歡叫廿七歲的她「娜姐」。

「呢個名唔係我嗌o架，我都唔想要呢個娜姐呀！名呢樣嘢我不嬲都冇乜所謂，但我會覺得好唔慣，受唔起咁，可以直接嗌我名。就算去到內地，佢哋好興哥前姐後咁，咁我都會好唔慣，佢哋都會（國語腔口）『娜姐！娜姐！』佢哋慣咗對人咁樣。我自己嚟講，名點嗌都冇所謂，唔係侮辱性就OK。」

對了對了，內地人來港搶奶粉，香港演員北上賺人仔。娜姐逗留北京、上海時間最長，間中回港出席活動，也到過馬來西亞、澳洲賺賺快錢。

和不少香港演員一樣，回內地拍劇才是生存之道，這是央視播映的《唐朝浪漫英雄》。

「我搭飛機多過搭巴士！我覺得我啲時間都喺飛機、喺車度過！都係機場呀、飛機呀、又轉車呀。以前我志願做空姐好想周圍飛，如果嗰排飛得好緊要，每一日都要飛嘅話，我有一刻就覺得……啲空姐真係好辛苦！你發覺飛得多真係會出事，身體真係差咗。我試過病住上機，起飛降落係最辛苦，鼻塞呼吸唔到耳仔就好痛。」

剛剛傳出娜姐為情想過自殺，她一眾師妹紛紛嘖嘖稱奇。娜姐是工作狂，死了哪還能工作？

「係o架，機會嚟到，錯失咗就錯失咗，有時都恨自己想做多啲嘢。冇辦法，一日得廿四個鐘頭，真係做唔到咁多嘢。除咗做嘢之外，我都想學吓其他嘢，成日都講囉，但唔夠時間。」

不問不知，曾在東京著名時裝表演Tokyo Girls Collection行騷，簽下日本經理人的娜姐，日本業務和她的感情一樣，已經停頓了。

「冇喇，其實完全停晒喇。輻射事件後，日本經理人有安排廣告過去拍，仲有其他電視台節目、雜誌，本身都想過去，但叠咗拍劇時間走唔到，變咗日本依家完全停止。北望神州啦！」

澄清

當娜姐事業如日中天時，我們見她事業線的難度也開始難過登天。

「我諗睇情況，我又冇特登話我要轉型，我覺得好多嘢都係好似冥冥中自有安排，事業上有啲嘢會慢慢、慢慢變咁，我唔係話畀大家聽我唔性感，要睇吓嗰樣嘢夾唔夾。」

騷與不騷事業線，竟可以與「冥冥中」扯上關係。賺到盤滿缽滿，卻上不到車，當不上業主，該怪誰人？

「成日啲人都覺得我搵好多錢囉！（你的確搵好多錢喎！）咁客戶都好好嘅。買樓夠畀首期，仲未可以一筆過，因為我要買嘅三百萬係冇可能買到。如果全數畀晒成層樓就真係唔得，香港啲樓價呢，哎吔真係好難買到樓，真係買唔落手，哎吔真係好貴呀！」

這是當年周秀娜有化妝的樣子，和現在沒有化妝的她差別不大。

周秀娜演繹自己有份設計的內衣，睇事業線惟有靠此。「如果我着住T恤短牛仔褲話畀你知，我賣緊內衣產品都係呃觀眾！」

娜姐在港的居住環境沒有進步，仍然和家人同住七百多呎舊樓。當年的她，或許未預計到有今天成績。

「好彩我成日唔喺香港，我有去其他地方試過，知道有啲嘢唔係真係咁易得嚟，所以返到香港就會好好珍惜，就算喺香港幾多人識都好，我去到內地要慢慢再起步，做番啱啱出道時嗰個感受，好多嘢都要由低做番起。

「自己睇番轉頭，都有一步一步達到自己想要嘅目標，可能呢四年只係開始階段，到依家先至真正畀大家認同。」

兜兜轉轉、上上落落，才到達她口中的真正起點。六年感情完結，當然也是另一起點。

希望當年售五百九十八元的周秀娜攬枕，現在仍然軟滑好攬。

周瘦娜

Avis玩微信搞出大頭佛，和娜姐訪問當天，小弟碰巧也和幾位朋友在微信。我叫娜姐向我的朋友打個招呼，她也照辦如儀，更扭曲自己十分易認的聲線，扮cutie地說：

喂！我係周秀娜呀，你信唔信呢？（狂笑）唔哈哈哈……我哋依家等緊影相呀，好慢呀攝影師哥哥！（大俠式奸笑）哈哈哈哈……呀哈哈哈……

很快傳來一位約三十歲左右的女性朋友回應，向她送上打氣說話：

周秀娜你好靚呀，我支持你呀，我覺得你好醒呀，同埋好正呀，同埋唔好咁瘦啦！

娜姐聽罷即鼓起兩腮嘟嘴扮肥妹。

「我係周肥娜，唔係周瘦娜。」

她告訴我會在農曆年後放幾天假，去曼谷四面佛還神。無論她希望增肥、收身、大紅大紫也好，靈驗過，失望過，也希望她手腕上的紅繩能帶給她好運。哪怕，用了四年才走到起點，花了六年在某位沒結果的男士身上，也不覺浪費。

以娜姐今天的地位，毋用「上太空」，在地平線上，總有個寬敞樂園，讓她繼續展現大俠式奸笑。