電訊型科

追新款行 4G　平玩韓系潮手機

2012年07月25日 ~~ 第270期 Face

香港話就話已踏入 4G年代，但 4G手機來來去去都係寥寥可數，仲好多時都係由 3G舊機 upgrade上嘅 4G版，又貴又唔吸引！眼見韓劇《屋塔房的王世子》、《紳士的品格》入面班靚靚主角都用緊最新 4G手機真係心有不甘。所以呢期中港台都開始興玩韓系水機，久違了嘅 SKY、 4G四核嘅 GALAXY SIII都有得玩，最正係呢批機除對應 3G之餘，有啲型號更行到香港 4G單頻。筆者更親身訂咗部行 4G嘅 SKY A810K返香港試玩！

SKY Vega LTE M A810K

韓系機中最平嘅 4G機之一，但都有 1.5GHz雙核心處理器，屏幕竟然係 SONY做嘅 IPS，規格介乎 GALAXY SII與 III之間。

Spec.
4G 1800MHz、 3G 1900、 2100MHz． Android 2.3系統． 4.5" 1,280× 800屏幕． 1.5GHz雙核心、 1GB RAM． 800萬像素鏡頭．售價：$2,680（ a）

Samsung GALAXY Note E160K

韓國同香港同樣大賣嘅 GALAXY Note， CPU、 RAM、容量都同港版一樣，韓版只係多咗 4G。

Spec.
4G 1800MHz、 3G 1900、 2100MHz． Android 2.3系統． 5.3" 1,280× 800屏幕． 1.5GHz雙核心、 1GB RAM． 800萬像素鏡頭．售價：$4,080（ a）

LG Optimus LTE II F160K

香港行貨暫未有消息推出嘅型號，推出時以 2GB RAM嘅 4G機做賣點，但剛被韓版 GALAXY SIII追上了！

Spec.
4G 1800MHz． Android 4.0． 4.7" 1,280× 720屏幕． 1.5GHz雙核心、 2GB RAM． 800萬像素鏡頭．售價：$3,880（ b）

Samsung GALAXY SIII E210K

首部四核心 4G手機，外形同功能都同香港 3G版一樣。傳說中嘅長方外形係吹水，反而內涵再加到 2GB RAM、 32GB容量，仲跟雙電。

Spec.
4G 1800MHz、 3G 1900、 2100MHz． Android 4.0． 4.8" 1,280× 720屏幕． 1.4GHz四核心、 2GB RAM． 800萬像素鏡頭．售價：$5,380（ b）

LG Optimus LTE LU6200

雖然係 4G機，不過在香港只對應 3G。勝在屏幕靚、價錢平，而且外形同港版 P936唔同樣，又係首批可以喺香港玩到嘅韓系機之一，引嚟唔少人玩。

Spec.
4G 800MHz、 3G 1900MHz． Android 2.3系統． 4.5" 1,280× 720屏幕． 1.5GHz雙核心、 1GB RAM． 800萬像素鏡頭．售價：約$2,070（ c）

Shop list：

（ a）豆腐屋（ 2396 2818）、（ b）三禾電氣（ 2374 0718）、（ c）淘寶網（ http://www.taobao.com/index_hk.php）

4G單頻上網　 SKY A810K

貴為韓國第 3大手機廠嘅 SKY，以前都試過以 Pantech名字打入香港，不過論款式就完全唔係內銷嘅 SKY嗰皮！好似呢部 A810K，既用上 1,280× 800嘅 IPS屏幕，而且更配上 1.5GHz雙核 CPU、 1GB RAM同 NFC等頂級 Android手機規格。而最吸引係佢支援 LTE 1800MHz頻譜，即係同 CSL、 PCCW、 3HK其中一條 4G頻譜，以至數碼通今年內推出嘅 4G頻譜相同，當然行 3G亦冇問題！筆者喺 Times Square試過用 CSL嘅 4G咭，真係可以成功上網，並做出近 30Mbps上網速度。

A810K雖然係行 Android 2.3，但介面經 SKY大幅優化，篤芒反應更快絕雙核機，唔使 3,000港紙超抵玩。

原來韓系機唔只 LG配備 IPS屏幕， SKY都有，用佢睇高清片， 4.5吋芒夠大之餘，更夠 detail！

上網 load得快，睇中文同 flash完全冇問題，換上 SKY自家 browser，介面同 Chrome幾似。

韓國人成日傳聞 SKY有 Samsung喺背後支持，所以 SIII有嘅動作指令，呢部機都有，凌空用手一撥就可以轉 speaker模式聽電話。

冇 SIM Lock即玩　 SMS改用 WhatsApp

可能你會擔心，韓系機會同日系機一樣有軟解等麻煩問題，但其實呢批韓系機本身係預韓國人去外國漫遊時用，好似 A810K都係一插香港 SIM咭落去就用得。加上佢行 Android，好似中文輸入法同其他 app都係上 Play Store裝就得。唯一係唔少型號只得英文或韓文介面，發 SMS亦未必成功，想改中文介面同發 SMS就要靠水貨商或自己上網改 ROM至得。不過睇中文、收 SMS，以及用 WhatsApp同微訊就完全冇問題！

最近有香港網友發現自己部韓系機竟然收到 4G，此消息即時喺各大 forum散開，仲引嚟大堆手機迷同 K-pop迷話換機。

國內吹韓風比香港更烈，所以更引嚟唔少高手改 ROM，中文介面、發 SMS等問題，其實跟住佢哋直接下載個 ROM就解決到。

韓國劏機　價錢夠平

除咗 SKY A810K之外，其他韓系 4G機好似 LG首部 2GB RAM手機 F160K，以至三星 GALAXY SIII 4G韓版 E210K都有得玩，兼容程度同 A810K一樣。由於韓國出機全部要簽約上台，所以水貨商都係以劏機形式，搵韓國人上台出機，再賣機到其他地方，形式同日系機，以至我哋賣台機 iPhone一樣。價錢方面，韓國出機通常都係零機價，嚟到香港價錢唔太貴，以 GALAXY SIII為例都係$5,300左右，但有齊 4G、四核、 2GB RAM、 32GB容量同雙電，對比香港行貨$5,598唔算貴！

3大買機途徑

韓系機愈嚟愈興，購買途徑亦愈嚟愈多，喺香港可以直接搵水貨手機店同上 Yahoo拍賣，而淘寶更係乜款都有！反而去韓國就只可透過網上商店 G Market買二手機，事關喺韓國上台出機要有韓國身份證先得，咪傻吓傻吓衝入手機店啊！

水貨店

喺旺角、銅鑼灣賣開日系機嘅水貨店，家都會兼賣埋韓系機。佢哋價錢可能貴網上少少，但勝在現場 check貨，要維修亦有轉介，售後服務較好。

Yahoo拍賣

家陣上 Yahoo一打韓系機型號，就會搵到唔少拍賣，直購價比水貨店平少少。不過，通常會在港鐵站交收，要 check機就煩少少。
網址： http://hk.auctions.yahoo.com/

淘寶

最多款式嘅地方，價錢最平，好多時更免費改埋中文 ROM，發 SMS問題亦解決埋。缺點就好似電機兒所講，有機會遇到奸商，所以要搵多啲好評嘅商店。
網址： http://www.taobao.com/index_hk.php

認住 K版最穩陣

韓國機型號尾有英文字辨別網絡商，認住 K字最穩陣，而機身則會有「 Olleh」標誌（ KTF的 logo）記認！

睇呢類機時會發現同一型號有 K、 S、 L字母喺最後，其實呢個字母意義重大！佢哋分別代表 KTF、 SK Telecom同 LG Telecom三大韓國網絡商，由於 KTF係行 1800MHz頻譜，因此 K字尾嘅機喺香港先用到 4G。而 SK Telecom就行 800MHz同 1800MHz雙頻，所以部分新機都可以喺香港用到， LG Telecom嘅機喺香港就只可行 3G，留意！

韓系 4G攻室內

筆者用 One2Free嘅 4G咭夾 A810K，喺 Times Square入面，以至外面大電視都收到 4G， check過網連數碼通 4G都見有訊號！

好多人誤以為香港同韓國 4G完全唔通，其實 CSL、 PCCW、 3HK都係行 1800MHz同 2600MHz 4G雙頻；而數碼通更只得一條 1800MHz頻譜，所以韓系機唔少兼容 1800MHz都可以對應呢幾個台。反而要留意 CSL、 PCCW、 3HK主力用 1800MHz鋪設室內網絡，室外就用 2600MHz，所以韓系機用呢 3個台，喺室外有機會跌番落 3G！