面對面
黃金宅男 羅力威
拍照的時候週身不自在、訪問的時候郁身郁勢周圍、回答問題有時候會放空：「可唔可以講多次你條問題？」、等候的時候在埋頭苦讀《飄流教室》…… 26歲的羅力威，正如他自己在歌裏形容自己的，不太會說話亦有點呆，不折不扣是一個宅男。
不過，這個宅男不得了： 09年參加亞視《星光大道》，從頭帶到尾最後眾望所歸拿冠軍； 10年，未出碟先入圍「叱咤我最喜愛的男歌手」和「歌曲五強」，破晒紀錄； 12年加盟英皇娛樂，同名處男碟賣到勇奪金唱片大獎， 8月舉行的首個賣票九展演唱會場場爆滿、兩場加到變五場……「全職宅男」，一不小心，成了年度新人王。
重點是，相比起口沫橫飛的社交男，有時候，我更喜歡天然呆羅力威的答案：「我同新西蘭嘅前度女友係和平分手，有一次佢送嘢畀我，我唔肯收，第二日，見到佢打爛份禮物擺喺我屋企門口，就係咁分咗手……」和平分手？我笑咗。
天上人間
不知道有多少人看過亞洲電視出品的歌曲 MV？不知道有多少人知道亞洲電視也會自家製作 MV？本人強烈推薦，想笑想嘔血想搵娛樂，不防揀隻亞視 MV嚟睇吓。入門作品，可以是羅力威隻成名作〈現實不重要〉。
從亞視出道、在沒有音樂組的亞視，做了兩年歌星的羅力威，說起那段不堪回首的蹉跎歲月，哭笑不得：「簽約唱片公司以後，真正見識到咩叫做 team work，以我個簽約記招為例，公司上下一齊打造，大至場地、背景、流程，小至一杯香檳都有專人負責，絕對係一個全新體驗。拍首 MV，我知道咩叫有思考、有鋪排、有創意，拍一隻 MV出嚟，真係會諗住畀全世界睇，唔同以前，所有人為做而做，淨係諗住喺亞視兩點播一次、六點再播多次……冇預過有人睇，又點會拍得好？」
上月 29日，羅力威在 W hotel舉行同名新碟發布會，師姐阿嬌到場支持。
《蘋果日報》圖片
09年中學畢業從新西蘭回港後，朋友介紹在亞視做過暑期工，順理成章參加《亞洲星光大道》而非《超級巨聲》並大熱勝出，羅力威說一開始覺得理想達到，熱誠高漲，兩年後與亞視解約，卻是打定輸數諗定轉行：「喺舊公司，人事變動好快，合作嘅人日日唔同面口，唔只我自己唔知今日有咩做、未來有咩打算，成間公司都冇目標冇計劃，拍 MV，首歌係我嘅，我諗咗好耐，忍唔住提出嚟：『唔咁樣拍得唔得？好似麻麻哋型喎……』結果俾人鬧：『我拍咗幾耐、你拍咗幾耐？幾時到你出聲？』好長一段時間，我悠閒到好驚，覺得自己根本就唔屬於呢行，我見識到一個人嘅力量有幾薄弱，孤掌難鳴，明知要走，但又唔知走得去邊，真係打定輸數：『最多第時咪擺啲歌上網畀人聽……自己儲錢出碟囉……』。」
09年回港參加亞洲星光大道，羅力威以集集勝出的冠軍王姿態最終回大熱勝出。《蘋果日報》圖片
6歲開始學習樂器，鋼琴八級和小提琴七級，羅力威出道以來以及新碟作品全數自己唱作。
養活自己
歌唱比賽開始已經儲落大批死硬粉絲，羅力威說：「歌迷耳朵係雪亮 嘅，歌好唔好聽佢 哋識分。」《蘋果日報》圖片
去年底，羅力威與亞視完約，在家賦閒四個月後，終於獲《亞洲星光大道》監製引薦，會見金牌經理人霍汶希。一行多個「星光家族」成員，惟獲羅力威一個獲得賞識，於今年二月的英皇春茗上正式簽約，成為英皇旗下藝人：「終於有個唱片公司一分子嘅感覺，終於有有人幫我有人教我嘅感覺， 𠵱家公司上上下下都有過招畀我，每日帶我見唔同嘅人，教我邊個記者叫咩名、教我同記者打交道。」簽約英皇後，羅力威說才有實實在在加入娛樂圈的感覺：「好似返工咁，個個都想入大公司做嘢，真係入咗去，其實人人都係咁做嘢，放 lunch大家都要食飯，滿足咗我個好奇心囉，見過晒公司啲師兄師姐，未見過佢哋輕鬆過，先知道每個人都得來不易。」 
前經理人方國華曾經捲入錄音室偷咪事件，現在與羅力威已無合約在身。
在香港出生、在沙田長大，中二走到新西蘭升學，羅力威說自己的唱作生涯就是從新西蘭開始：「唔好睇我斯斯文文好似好怕醜咁，其實我細細個就鍾意通山跑，行條樓梯都唔鍾意逐級行，係要一跳跳落十二層嗰種……我由細到大讀書麻麻，學琴學小提琴最有心機，每次考級都要同阿哥家姐鬥高分。立志要做音樂養活自己，都係去咗新西蘭生活開始，一個人時間多咗，諗嘢嘅時間就多咗，開始諗吓將來做咩養活自己好，做音樂就梗係最好啦……但係如果每日唱一首歌，人哋唔悶自己都會悶啦，嗰陣時開始立定決心，做音樂，同埋要作好多好多好多歌畀自己唱。可以行到呢一步，真係一啲都唔容易，就算係參加歌唱比賽，得到最多掌聲時，我都知道唔係必然，絕對唔應該驕傲，我反而覺得好驚，驚佢哋會失望，驚自己會表現得唔夠好，辜負佢哋。」
乾物愛情
與另一個網絡歌手出身的同行羽翹傳緋聞傳足年多，羅力威與羽翹雙雙否認緋聞。我問他：「目前是單身嗎？」羅力威說：「係！」我再問：「真定假？」羅力威開始動搖：「嘻嘻……真……㗎……」
羅力威說，有時候為了保護另一半，不得不說謊，不過女朋友是同行，也有好處：「對方都係唱歌，都好嘅，起碼我唔使擔心佢嘅人身安全，佢嘅去向，個個都知，我唔使擔心搵唔到佢，睇即時新聞可以搵到佢，都幾方便……但係，我覺得處理戀情低調係啱嘅，太高調，緋聞會傳得好亂。我唔鍾意搞風搞雨，食個飯都要回應來回應去，其實真係唔答最好。」
去年羅力威為羽翹演唱會擔任嘉賓，面紅紅拖手合唱傳出緋聞。
最愛看日本漫畫的羅力威說，理想中的愛情就應該像日本漫畫裏的一樣：「兩個人一齊放學，一邊係河同草坡，一邊係棒球場，一個人推住單車，另一個人默默跟住，保持距離。愛情對我嚟講就係結婚，結得婚先至係愛情！」吓？那你之前的三次戀愛經驗算甚麼：「細個拍拖係累積經驗，係成長經歷，無呢啲經歷，你唔會知點樣對人好啲。」
偶像周杰倫公開過擇偶條件，說女朋友一定要崇拜他、愛聽他的歌，羅力威的答案倒是跟偶像背道而馳：「最好都鍾意聽我啲歌，但係唔使做出嚟，因為平時歌迷朋友都係咁，返到屋企我想有啲唔同嘅感覺，最好鬧吓我啦。」
少話天王
台灣有個少話天王蕭敬騰，香港的羅力威也有點少話特質，不過話雖然不多、有時候又貌似有些心不在焉，羅力威的答案其實有點驚喜。
我問他，新唱片公司盛產天王天后，有師兄師姐過他兩招，教他怎麼面對事業低潮嗎？
羅力威沉默片刻，然後慢條斯理回答：「所謂低潮，我諗要睇低潮係乜，你哋見唔到我，可能我喺屋企寫緊歌、可能返咗大陸做緊嘢呢……所謂紅唔紅，都係人哋覺得啫。」
亞視版〈現實不重要〉 MV笑料極多， YouTube點擊過十萬。
撰文：朱小博
攝影：范仲良
化妝： Khaki Yan
髮型： Jack Hung@Chin G.
造型： Bryan@the Flaming
服裝提供： indu homme
留言列表
{{ article.title }}
