面對面
幸福摩天輪 傅穎
其實都幾唔公平，男人打女人，被鬧做新聞被雪藏的是女方，男方繼續做大胸男主角，話咁快又有新女落叠，仲要係當家花旦；其實都幾唔公平，無論你有幾多寃屈氣，公司一聲令下「唔准講」！
鬼叫你兩個份屬同一間公司，經理人一到場已經話明：
「手心係肉、手背又係肉，你話我哋幫得邊個？」
被打的、被雪的、被封口的都是傅穎，粉絲們一定心痛爆，不過被放逐北京拍完戲寫完書過完冷河的傅穎女神叫大家慳番，無謂肉赤，去年 8月與羅仲謙情變被打事件以後， 27歲的她終於看清娛樂圈運作法則：「我從來未試過目標咁清晰，知道自己應該搵一個咩人做另一半；我亦從未試過咁錫自己，識得氹自己開心；每一段過去嘅經歷，我都心存感激，就好似坐摩天輪一樣，低潮過去，一定有更好嘅風景等緊你。」
其實女人心智，何嘗唔係同傅穎新書《在摩天輪上》一樣，時高時低時清醒時沉溺。下一次，遇上下一個，但願你還能保持心清眼又明。
一時衝動
09年與金牌大風解約後，傅穎轉投新經理人公司星皓，與同公司藝人羅仲謙的緋聞，也在加入新公司不久後就傳得沸沸揚揚。緋聞傳足年半，當事人次次迴避死口唔認，去年 8月，傅穎卻突然在微博公布戀情、順手公布大波謙花心暴力真面目，更帶着傷痕登上雜誌封面。此舉惹來公司不滿、甚至被老闆點名批評：「私人事要私下解決！」，結果，傅穎的工作暫時抽起、全面雪藏，更要在生日當天公開發布懺悔千字文平息事件。
無可否認，嗰次，我真係太衝動。我有一樣嘢，喺呢個圈十年都未搞清楚嘅嘢，唔好俾人估估吓、唔好留有伏線、唔好俾記者左右，提都唔好提。 𠵱家再出去面對傳媒，深思熟慮啲。 
新書《在摩天輪上》是傅穎連續六年在香港書展推出的個人散文集，剖白去年從事業低谷走出來的心路。
有啲嘢，係要人跌落低處，先至可以睇到好多以前睇唔到嘅嘢……我見到有啲人包容晒我嘅缺點、比別人甚至比我自己更加明白我、每晚輪流嚟我屋企一直陪我度過難關……我見到有啲人露出真面目、趁機抽水……換着以前，我會覺得受傷？會問點解， 𠵱家，我只會更明白呢個圈係點樣運作。呢年幾兩年，我跟咗個師傅學佛，我睇嘢角度唔同以前， 𠵱家我會明，我唔係傷害人嗰個、我亦唔係抽水嗰個，踩多兩腳再講埋風涼話嘅人，傷害嘅唔係我，受嘅係佢哋自己。而呢件事，老實咁講，最大得益係我自己。
沉澱北京
所謂得益，不是做了幾次封面、接了幾套新戲，傅穎說的，是心態。所謂人在江湖身不由己，想停的時候停不得、不想停的時候被迫停下來，反而意外獲得一個自醒吾身的機會。
事業低潮唔算係第一次， 09年轉公司前都唔好過，每日心情好差，好容易喊，朋友個個叫我去睇醫生，我唔想，我覺得一個人要靠藥物過活好恐怖。到舊年被雪嗰段時間，個個都覺得我實會好亂，反而我好享受……因為從來冇試過。我每日早睡早起睇書煲劇、其至可以去睇埋日出；年頭復工去北京拍電影《 3D詭婚》，更加專心，住喺北京市郊五、六環外嘅飯店，冇新聞冇雜誌又冇狗仔隊，每日返工拍戲、返酒店煲碟，然後肚餓去超級市場買嘢煮飯，入行十年，從來未試過咁靜，從來未試過有時間問吓自己，點解做咗廿幾年人要做得咁唔開心……
去年 8月，傅穎突然公開承認與羅仲謙戀情，力數對方一腳踏四船，還在雜誌公開被打傷勢。
自爆被打，原定在北京拍戲計劃擱置兼被雪，經理人公司老闆王海峰亦公開批評傅穎不聽話：「私人事應該私下處理。」《壹週刊》圖片
我今年寫呢本書，係因為舊年我經歷咗人人眼中所謂嘅最低潮。我正想講，當你處於低潮時，咁就要恭喜你啦，你係時候轉上高潮。要變嘅唔係外在環境，而係你嘅心境，當你心境轉變，睇嘅所有嘢都會唔同。
喺嗰個階段我徹底改變自己，出街嘅時間多咗、見多咗媽咪、識多咗唔同界別嘅朋友、睇多咗書、返多咗佛堂。我終於搞清楚，人生得嗰幾十年，真係無謂搞到自己咁辛苦，人知道嘅嘢愈多，愈容易放低。你有冇聽過「吸引力法則」，一個人開心正面，發生嘅事同情緒自然會開心正面，吸引嘅朋友亦都會開心正面。你知唔知我哋諗嘢係可以控制㗎？每個人比你自己想像堅強，亦都比你自己想像脆弱。有時候，可能見到一張相、一個情景，一觸即發喊到崩潰，亦可能會遇到最壞最糟糕嘅嘢，一樣企喺度到屹立不倒……講真，如果真係最差最差嘅已經發生，我嚟緊仲有咩好驚？試過最壞，我嚟緊咪真正可以「歎」世界囉……歎世界，係用你嘅心境去歎。
傅穎圈中朋友不多，與前餅女隊友 Stephy及黨羽 Angela更是公開反目，年初 Angela微博鬧爆傅穎粉絲：「咩人跟咩偶像，影衰晒！」《壹週刊》圖片
02年加入女子組合 Cookies加入樂壇， 09年傅穎與前東家金牌大風解約，還哭訴開工不足食穀種。《忽然 1周》圖片
還信愛情
鋒芝離婚，網友呼叫：「再也不相信愛情了……」
大波謙打人，網友亦喊：「再也不相信愛情了……」
這句所謂潮語，其實用得濫，人哋分手情變關你咩事？在娛樂圈遇過愛情騙子、也遇過大波打手的當事人傅穎說：「我還相信愛情！」
點解要唔信愛情？做人一定要信！我相信我始終會遇到一個人，我可以喺佢面前做最簡單嘅自己，佢一定會畀到安心同幸福我。以前拍拖次次都係人哋追求我在先，我慢慢去發掘對方好處、被對方感動而開始，我話畀自己聽，下一次，我一定要搵一個真心喜愛、喺我眼裏面會發光、我真心崇拜、仰慕嘅男人。
年初復工上京，傅穎與電影《 3D詭婚》男對手陳小春傳出緋聞，後來當事人妻應采兒出聲澄清才平息風波。
一個表面上好美好嘅人、好美好嘅愛情，突然有一日變得陌生、恐怖，曾經，我覺得好驚訝、好可怕，其實過咗去，心存嘅真係只有感激，感激呢段經歷畀我睇清楚一個人、睇清楚一段感情，我嘅眼光，從此以後會變得愈嚟愈好、愈嚟愈準。唔係上一段感情，我唔會有一段日子可以靜落嚟，我唔會改變。唔係發生嗰件事，我唔會好似 𠵱家咁，咁清晰知道自己希望搵一個咩人。唔係發生嗰件事，我仲係以前嘅我，凡事感覺行先，唔識得錫自己；一段感情，我唔識得享受，而係沉溺其中，咁樣做人、拍拖又點會開心？愛情，唔係擦身而過嘅火花，係兩個人堅定不移嘅成果。做人最緊要信，你信，佢一定會來臨。
09年出書自爆在圈中遇過愛情騙子， 11年又被拍拖年半的羅仲謙暴打：「我多謝每段經歷，令我睇人愈嚟愈準。」《忽然 1周》圖片
會改變的
這次見面，我覺得信了佛的傅穎變得不一樣了，跟在她身邊的經理人也說，傅穎真的變了：
「佢以前耳仔軟，信念好容易動搖，人哋講兩句、記者氹幾句，話咁易就左右到佢；佢以前亦都好唔信人，所有嘢要攬晒上身自己做，親力親為唔放心交畀人。
今次出書佢叫我唔好太緊張：『人哋嘅工作你就放心交畀人哋啦，自己攬晒上身會死㗎！』」
改變是好的，有信念也是好的，我真心希望，信的，就真的能來臨。
去年 8月，傅穎與羅仲謙前後腳開記者會，被打的要認錯，打人的則自圓其說。《蘋果日報》圖片
撰文：朱小博
攝影：范仲良
髮型： Linfa@IL Colpo
形象： Bryan@the Flaming
服裝： Rosebullet, Y&Y
留言列表
{{ article.title }}
