長頭鹿邁文、獅子亞力、斑馬馬提同河馬歌莉亞，上集去過非洲，今次攀山涉水去到歐洲歷險，一班騎呢動物走勻半個地球。
卡通巡禮
暑假動漫大晒冷
《荒失失奇兵 3：歐洲逐隻捉》
上映日期： 8月 2日
由夢工場出品的《荒失失奇兵 3：歐洲逐隻捉》，一班動物好似獅子阿力，班馬馬提及河馬歌莉亞等，第 1集由好食好住的紐約中央公園動物園，流落到馬達加斯加，上集就信錯企鵝上錯機，最後空降非洲大草原要流浪。
史 sir慳皮
今集仲慘，講班動物追蹤企鵝去到歐洲，為咗返回紐約，千方百計加入馬戲團，點之被人虐待到暈，搞到要逃難。
《荒》片勝在故事簡單，細路仔一定睇得明，仲笑到碌地。難怪頭兩集票房夾埋已大收超過 11億美元（約 86億港元）。雖然夢工場老闆史匹堡，為慳皮原本打算唔玩 3D，但最後要跟隨大趨勢，決定搞 3D製作。此片早於 6月 8日美國上畫，一出即打低科幻大片《普羅米修斯》成票房 no. 1，作為夢工場其中一套皇牌動畫之一，果然有番咁上下水準。
做埋馬戲
一班動物為咗返美國家鄉，於是混入馬戲團，打算隨團返回紐約，但個個新丁，好似巨熊桑妮雅，咁大份都要着住迷你裙扮 cute跳舞，睇見都想笑。
尋找企鵝
斑馬馬提及一班動物好友，因追蹤企鵝隊長，然後帶佢返屋企，點知流落歐洲，由蒙地卡羅一直走到去倫敦，仲搞到一身蟻。
惡女施虐
今次班動物敵人就係動物管制組組長杜娃，呢個惡女對動物零愛心，唔只鍾意虐待動物，今次仲當獅子亞力係通緝犯，追到佢瘦。
嘟姐出馬
《荒》片話晒係名牌動漫，今次搵嘟姐鄭裕玲擔任惡女杜娃的配音，第 1次做配音嘅嘟姐話：「我做每件事都準備充足，甚少蝦碌，希望今次表現可以有 98分。」嘟姐果然信心爆棚。
鬥冒險
《冰河世紀 4：玩轉新大陸》
上映日期： 7月 12日
《冰河世紀》系列由 02年第一集至 09年第 3集，夾埋已大收 150億港元票房，電影公司梗係狂拍續集繼續賺錢。
玩足十年
故事繼續發生於一班趣怪古代生物上。長毛象 Manfred同創意虎被大洪水分開，途中被各國異獸偷襲，好彩最後發現新大陸過新生活。《冰》片是近年暑假必上動畫，睇開嘅大人同細路，一定照舊買飛捧場。
《海盜王之超級無敵大作戰》
上映日期： 7月 26日
由 Sony炮製的《海盜王之超級無敵大作戰》，劇情係海盜船長為打低死對頭，迫住要同英女王交易，當中竟發現一直隱藏住嘅驚天大陰謀。套片由《超級無敵獎門狗》班底炮製，有一定口碑，今次更用泥膠公仔配合動畫技術製作，生動得嚟又極有創意。
最強泥膠
今次《海盜王》一片，唔只用泥公仔做戲，仲要玩埋 3D，唔怪得製作歷時 5年。
《海賊王×為食獵人 3D大電影》
上映日期： 7月 26日
主角路飛，在尋找對佢嚟講極有意義嘅草帽時，途中竟闖入充滿危機的海軍基地，但路飛不怕危險誓要尋回草帽。《海賊王》曾出過 64本單行本，銷量突破 2億 2千萬本，連木村都爭住認做 fans，絕對係星級動漫。
日本片霸
今個暑假除荷里活動畫，日本代表就有《多啦 A夢》同近年 hit爆日本嘅《海賊王》反擊。
《勇敢傳說之幻險森林》
上映日期： 8月 9日
暑假檔期咁大嚿肥豬肉，同夢工場係死對頭嘅彼思亦推出《勇敢傳說之幻險森林》爭食。講述 16世紀一個文武雙全的公主 Merida，為逃避招親而離家出走之後，誤闖森林又用錯女巫咒語，搞到阿媽變成黑熊，為求解咒母女一齊踏上冒險之旅。
套戲有齊魔幻、動作、親情及友情等元素，仲由《海底奇兵》班底，用咗 6年時間炮製特技，唔怪得製作費高達 14億港元，真係繞銀紙。
3D女將
留言列表
{{ article.title }}
