沙灘更
猛料老豆實 陳嘉桓三點式高設防
自從發生在橫店被陳浩民抽水事件，受害人陳嘉桓一直唔敢再同男性單獨出街，夜蒲更加見過鬼怕黑。
事隔 8個月，本刊上週六（ 14日）發現罕有着三點式的陳嘉桓，趁唔使開工，去屯門黃金海岸曬太陽。雖然日光日白，陳嘉桓今次沙灘大解放，仍要出動家中兩大壯男陪玩，全程有畫滿紋身的陳父實，又有細佬幫手推油，確保再冇狼爪潛伏。
如果當初帶埋爸爸上橫店，剩係睥兩眼都嚇走班狼隊啦！
陳嘉桓火熱沙灘
三父女去沙灘曬太陽，陳嘉桓同餅印細佬（右）食雪條甜筒降溫，陳父（中，小圖左），就負責睇水防仔埋身。擁有多個紋身的陳父，背部除咗有梵文外，右邊更有彩色鯉魚圖案，唔似一般青龍白虎咁有江湖味。
上週六（ 14日）下午 4點，俾高登仔當女神的 19歲「嘉桓 BB」，同外形似阿哥多過似老豆的 38歲陳父 Jacky，加埋細一歲的細佬陳肇桓，一齊到屯門黃金海岸曬太陽，同行仲有一男一女友人齊齊提早暑假。平日極少作性感打扮的陳嘉桓，當日着住黑色綁帶泳衣同短褲，驚現 34B立體身材，雖然戴住巨型反光超，仍被沙灘泳客認出，連救生員都圍埋一齊。
Rose今年 4月行內衣騷時表示再度發育，比之前 176cm再高咗 2cm，上圍更由洗衫板變 34B。小圖是陳父為愛女畫的掃描像，非常像真。
細佬推油
要曬太陽又唔想變賓賓，陳嘉桓一坐低已經即刻搽太陽油，又叫細佬幫手搽背脊，由於怕被附近男性眼望望，陳嘉桓刻意背向多人的海邊，確保冇人睇到先伸手入泳衣帶搽心口。曬太陽期間，陳嘉桓去士多買汽水消暑，擘大口食雪條雖然勁誘惑，好在陳嘉桓有爸爸同細佬做保鑣，即使不時有人指指點點，但冇人夠膽埋身向女神攞簽名或者求合照，高設防成功。
當眾搽油
似未瞓醒的 Rose，戴咗彩色鏡遮素顏，伸手入胸搽油時更呆呆滯滯，好在冇走光啫！
細佬推背
Rose同 18歲的細佬雖然唔係一齊住，但感情非常好，細佬仲幫手推油，一啲都冇尷尬。
紋身潮爸
陳父（右）除咗打扮潮爆，亦愛用 GalaxyⅢ上網 post相，仲開埋微博同 Instagram戶口，同仔女肯定冇代溝。
着上螢光橙沙灘褲的陳父，造型潮爆，左邊頭剷青，而且手臂和半邊背脊及大腿都有多個紋身。
據知陳父年約 38歲，現時在元朗開手機用品店，亦替人畫人像掃描，其微博放了大量明星的掃描像，像真度極高，甚至有粉絲專程到元朗搵陳父合照，果然畫藝過人。雖然父母早已離婚，陳嘉桓亦並非跟父親同住，但兩父女感情相當好，除了用同一型號手機，又經常相約一齊食飯行街，當日無論買雪糕定落水玩，陳父都跟到陳嘉桓貼一貼，又自備相機幫阿女影靚相。
惹火沖身
玩足兩粒鐘，陳嘉桓準備冲身走人，玩到散晒的陳嘉桓戒備心忽然下降，即使洗腳位迫滿一家大細兼中佬金毛飛，不過嘉桓 BB仍不停用水捽走身上太陽油同沙粒，不料女神一鬆懈，身旁一名金毛男卻眼都唔眨，嚇到陳嘉桓急撇去隔籬花曬位再沖過。不過再遇狼人的陳嘉桓，極速淋兩淋就搵毛巾遮身走人。
冇爸爸睇住即刻出事，陳嘉桓週一（ 16日）在電話中死撐，話冇俾狼死沙灘男嚇親：「嗰日我同爹哋細佬去玩，諗住好快沖完身，咪叫佢哋唔使陪我去囉。我又唔覺有人望我喎，可能佢唔係我呢！」大個女要識保護自己，嘉桓 BB咪再傻更更啦！
女神沖身
發現周圍埋伏狼男後， Rose一支箭衝入花灑區避狼，不過隔籬仲有男泳客洗緊 pat pat，避唔晒！
一時鬆懈
Rose最初冇理隔籬左右，迫喺人堆中間，一開水就不停沖身捽。
泳客勁望
點知身旁男泳客超關注，視線冇離開過女神 Rose，好誇張！
書展硬撼模
留言列表
{{ article.title }}
