FACEweekly
轉行寫愛情小說 杜如風
飛足日本、英國、美國、中國多地，以喪玩冇厘正經姿態在 now TV介紹旅遊節目， 5年間冇時停舟車勞頓，自認又癲又喪的杜如風（ Helen），今年終於要做隻有腳的雀仔，留在香港休養身體。
留在家中也擋不住過度活躍的細胞，趁明天書展開鑼出旅遊散文書，還首次落筆寫愛情，大家到時要放長雙眼睇 Helen點寫呢個蕩氣迴腸愛情小說！
五癆七傷造就新節目
旅行喼 5年冇執過，只因要周圍飛，上年試過連食 5隻大閘蟹過涼病倒杭州入院。訪問前還要去身體檢查， Helen自知身體弱，「唔想飛，但要講旅遊，於是諗到講日本文化怎影響香港。」講日本飲食、音樂、攝影，題目來得正經，但落在 Helen口中還有得正經？「所以碌爆人情咭，搵專業老死傍住。」先有蔡瀾講食、又搵柏豪去銅鑼灣世貿夾公仔，前幾日仲搵埋杜汶澤「爆房」，「佢帶我去香檳大廈講相機，之後就去酒店私影。」不過最 sweet，就係夾住爸爸講日本藝能界，「爸爸係老行尊，之前寫日本藝能界專欄，佢會晒冷自己珍藏，不過我就好冇癮，冇得玩佢，話晒都養咗我咁耐！」
《風行風語 3》可以話係 Helen粉絲必備，講旅遊外，仲會重溫電視節目中的爆笑位，圖為上年去杭州蘇堤扮詩人蘇軾着唐裝！
Helen最近家裏添丁，養了兩隻分別 3及 10個月大的芝娃娃 River及卡斯拿斯，改呢個名，因為 Helen超級鍾意西班牙國家隊門將卡斯拿斯！
過度活躍造就爛命倫
車撞男友愛情狗咬狗
新書《風行風語 3》附送愛情小說《狗咬狗》，連封面都疑似無印， Helen日本風入血喇！
精力控制得宜，現已推出第 5本書的 Helen，新書《風行風語 3》除了集合自己在雜誌的專欄外，還有講台北、中國旅遊爆史，最破天荒，係首度寫愛情小說，「媽咪教中國文學，屋企有好多小說，小學 3年級已走去睇亦舒的愛情小說。今次終還心願寫。」名為《狗咬狗骨》的愛情小說隨書附送，「係講我 18歲初戀有幾癲。」自認「待」人不淑，初戀在加拿大的時候，就試過開車撞男友，「佢同我嘈交，我好嬲開車走，佢諗住截停我，咁就撞傷手。」我問 Helen如果要繼續寫下一本小說，最想寫甚麼，「親情。上年爸爸（杜惠東，前嘉禾電影宣傳部經理）腎衰竭入院最難忘，趁住家吓在香港休養，就會好好陪佢！」咁應該好快推出《狗咬狗骨 2》喇，因為杜爸爸現已退休全職歎女福！（笑） 
撰文：陳家豪
攝影：謝耀恆
化妝： Kathy Chow
髮型： Heibie Mok@ Hair Culture
場地： Hair Culture中環擺花街一號 6樓
留言列表
{{ article.title }}
