錢最親
男友外借媽模 周秀娜北京趴地搵食
成功洗底脫離剝模行列的「模始祖」周秀娜（ Chrissie），自從 10年推出第二本個人寫真集後，就退下寫真戰線，一直忙於拍廣告及電影，近年更主攻內地市場，專心掘人仔。
娜姐喺內地愈做愈吃香，帶挈埋拍拖快 7年的髮型師男友 Avis（陳偉成）轉型做幕前，孖住師妹媽模 Mia（陳靜儀）一齊拍《喜愛夜蒲 2》。雖然男友成日被指搞三搞四，不過娜姐眉精眼企，仲超淡定話：「咪當借個男友畀佢（ Mia）幫我湊囉！」搵到錢，你慌男友走得甩咩？
搵食艱難
幾乎長駐內地的周秀娜喺內地撈得掂，不過人仔有時都唔係咁易賺，上週五（ 13日）本刊眼見娜姐拍呢個 shot都要跌低趴地 10幾次，娜姐小心右腳舊患喎！
狼狽換鞋
可能娜姐喺內地生活得耐，所以仆完都未見即刻起身，仲踎得好鬼自然。學埋強國人的率性，娜姐換鞋搞到上下失手咁滯，睇住走光呀！
激讚陳漢典
同娜姐有多場對手戲的陳漢典，被娜姐大讚細心又風趣，娜姐話：「同漢典拍戲真係會令人好開心，我 𠵱家見佢多過見男友啦！」
周秀娜自 09年連續出咗 2年寫真就一直愈撈愈掂，成功洗底轉型，拍完廣告撈埋電影，近年更成功打入內地市場，電影一套接一套，剝模之中以佢最成功。
仆街十幾次
周秀娜月前與台星汪東城和陳漢典拍電影《我的美麗王國》（前名：《名模》），除咗喺北京拍攝外，亦遠赴巴黎取景。戲中講述一眾模特兒血淚史，開正娜姐戲路，而周秀娜更會周旋於型男汪東城和《康熙來了》笑星陳漢典之間，雖然擺明做女主角，不過內地女角競爭激烈，上週五（ 13日）本刊於北京探班時，就見娜姐同陳漢典對戲超認真，娜姐為拍一場仆地情節，不惜趴地 10幾次，而對手陳漢典亦大讚娜姐夠專業。
娜姐長期於內地開工，男友 Avis卻經常被指作反，尤其跟同公司媽模 Mia玩得特別投入，不過娜姐見慣世面，邊啲係堅邊啲係煲水，點逃得過佢雙眼。難怪娜姐仍超淡定話：「我一路都忙住拍戲冇停過，其他嘢都冇時間理，佢（ Mia）咁鍾意細路咯，咪當借個男友畀佢幫我湊囉！佢鍾意咪由佢囉！」 Mia真係要做好「奶媽」呢份工啦！
大東有 fans圍
同一日，另一男主角汪東城喺另一個地方拍一場揸車戲，留鬚扮滄桑轉 look嘅佢就有成班 fans及市民圍觀睇佢拍戲，贏咗！
有艷遇
娜姐同汪東城首次合作拍戲，早前電影更遠赴巴黎取景，娜姐自爆喺巴黎期間有法國男人對佢有興趣， Avis要睇緊啲好喎！
霜霜被飛
原先電影選角上有潘霜霜份，但去到第 2次選角時，霜霜已被飛出局，可能驚咗佢亂講嘢！
男友輪住用
2年冇出寫真的周秀娜，上年有寸嘴師妹 34D Jeana（何佩瑜）姣黐 Avis，擺明借娜姐名氣上，今年又輪到媽模 Mia出寫真，又孖 Avis一齊拍《喜愛夜蒲 2》，又傳出因拍戲而愈行愈埋，橋用兩次，難怪娜姐咁淡定。本周一（ 16日） Mia出席活動時回應：「幫佢湊仔？我自己都有兩個細路要湊，唔得閒幫佢睇住啦。」
上月中 Avis與 Mia出席完一籃球活動後雙雙離開，兩人有講有笑，狀甚甜蜜，期間 Mia更細心為 Avis抹汗。
雖然係宣傳橋，不過喺電影《夜蒲 2》中，兩人戲中大量情慾戲，有真火都唔出奇。
乜片都接
呢一年周秀娜幾乎絕跡香港，全力打入內地市場，都算有回報，電影一套接一套，成績比起其他北上的港星更佳！
喜劇《 Hold住愛》
早前與劉愷威、楊冪合作的愛情喜劇。
古裝《唐朝浪漫英雄》
聯同方力申、吳倩蓮、陳奕等一眾演員合演，陣容鼎盛，屬古裝懸疑片。
驚慄《夜店詭談》
與《海角七號》演員范逸臣、 黄義達等合演的台灣驚慄片。
留言列表
{{ article.title }}
