o靚模奇招衝擊書展忽然1周 782期 @ 娛樂八掛大放送★

性感無罪，不過在貿發局眼中，着三點式夾出事業線及半裸真空的一班o靚模，就被列為「未達健康形象」人士，在書展簽名唔使旨意。
簽名事大，周秀娜於是率領師妹出動金魚缸式簽名車搞簽名會，泊正會展隔籬，明剃大會眼眉。入書展緊要，「浸大E神」楊梓瑤惟有喬裝入場實地視察，仲大派唇印造勢。
總之為了成為今年書展的寫真女王，個個奇招百出搶銷量。拍過三級片、出過粗口碟，早前狠批o靚模為「群妖亂舞」的黃秋生，喺書展首日即炮轟：「佢哋唔係o靚模，係加多個字，叫o靚模…賴！」

周秀娜忍尿六個鐘
書展正式開波，冇得在書展搞簽名會的周秀娜，出動猶如金魚缸的貨車搞流動簽名會，走勻港九多個旺區谷書。
周三（21日）書展首日，她早上十點先到中環化妝整頭，為衝擊書展作準備，不過其火紅色連身褲略嫌密實，作為書展首日戰衣的確輸蝕。她向記者解釋：「今日我會用手上嘅事業線幫fans簽名，更加珍貴，而且依家三號風球，加埋我嘅紅色暴雨（乳），效果都好震撼。」
兩點前要到達金紫荊廣場為二百個fans簽寫真，周秀娜全日齋食三杯乳酪，吃到最後一口時，終於忍唔住自爆：「我不嬲大食，但今日真係唔可以食咁多，件衫好靚，但每次去廁所都好麻煩，要除腰帶，成件衫剝，所以我依家下面係忍住度氣，唔可以亂咁爆發。」

流動簽名車　走勻港九
周秀娜所屬的公司想出以貨車改裝而成的流動簽名車作為今次書展的秘密武器，備有20呎透明膠片，從車外望去，恍如一個大金魚缸，甚具綽頭。租用5日，連車內布置，花費六位數字。
在21至25日期間，簽名車除了指定時間停泊在特定地點用作周秀娜、A.Lin、DaDa、Annie G.、Hailey C.及新八模的簽名會戶外場地之外，每日其餘時間更會來回走勻香港軒尼詩道及九龍彌敦道等主要街道，成為一個十分搶眼的流動廣告牌。

唔怕警察趕車
由於天雨關係，原定停泊在金紫荊廣場的流動簽名車，被迫泊在隔籬有瓦遮頭的行車通道。周秀娜和師妹共十二個o靚模，亦足足遲了半個鐘先到，令到過百傳媒及二百位等候簽名的fans一度鼓譟。之後周秀娜率領師妹坐旅遊巴到達，全場fans叫囂。雖然其經理人公司自費出動四個保安維持秩序，而貿發局亦俾面派了幾個專員助陣，但由於現場太過混亂，警方一度介入了解。「我哋都係簽名啫！如果警察嚟趕車，我哋就兜個圈再返過嚟，俾條路嚟行吓啦！」周秀娜說。

寸E神：胸大唔係大晒
周秀娜在簽名車上簽足一個鐘，由於貨車一邊改成透明巨窗，吸引不少龍友和趁熱鬧的市民影相，周秀娜和師妹驟變成人肉金魚缸任影唔嬲。「流動簽名車個idea好正，大家可以隨便欣賞我，我今年唔會偷雞喺書展造勢o架喇！」不過「浸大E神」楊梓瑤同日戴口罩混入場，之後又高調做sales入書展賣書，周說：「佢咁做好矛盾o架喎！唔想俾人知先要混入場，但又換衫去賣書，佢知唔知自己sell乜o架！佢係咪着黑旋風套衫入去呀！胸大唔係大晒，夠就得喇！」句句有骨。

秋生：佢哋係叫o靚模…賴
今次o靚模衝擊書展，可謂完成歷史任務，而曾大罵「群妖亂舞」的黃秋生，就繼續狠批o靚模，他說：「生存有好多空間，咩3D洞房、撕開件衫，唧啲冰滴落大髀，唔通我攞住碌蕉磨下磨下又話係健康嘅相？……佢簡直係性騷擾緊我同其他唔想睇嘅市民，再咁落去，佢哋唔係o靚模，係加多個字叫o靚模…賴！」
對此周秀娜說：「佢嘅嘢冇興趣回應，好多謝黃生一直咁留意我，希望今年書展冇咁多人，佢同個仔唔使咁逼，唞大啖氣慢慢行啦！」

貿發局築人肉圍牆
o靚模各師各法衝擊書展，主辦單位貿發局強調一旦發現展場出現混亂，會以鐵馬隔開群眾，甚至考慮趕o靚模離場。觀乎首日書展，面對「o靚模游擊戰」，在場保安嚴陣以待，每逢o靚模在某個攤檔出現，吸引過百宅男圍觀，造成混亂，附近保安一聽到對講機上級指示，馬上到場增援，更手牽手築成人牆，包圍o靚模和fans，與其他人保持距離。問到何時會以鐵馬侍候，貿發局有關方面表示：「要睇實際情況，今日始終係第一日，其實安排算做得理想。」

Jessica C搏到盡
書展前，不少o靚模先來個埋身肉搏鬥球技。本周一（19日）晚，記者發現周秀娜、傅穎、A.Lin等人為新片《Beach Spike》練排球，其中以鬼妹Jessica C最為搏命。她又烏又趴，更經常練習打波姿勢和做熱身，搞到警鐘胸乍現。

出書撼o靚模
一眾o靚模被貿發局禁在書展為寫真簽名，部分o靚模心有不甘，各出蠱惑招數突圍，至於其他有份為新書舉行簽名會的作家，對o靚模睇法則各有說法。

陶傑：我會買周秀娜寫真
今次推出新散文集的才子陶傑說：「如果俾o靚模搞簽名會，佢哋可能着到好少布嚟sell肉照，話晒香港係國際都市，今年又有咁多英國大作家嚟演講，俾佢哋返去祖國唱通街就唔好啦。之但係personally，我絕對尊重呢個行業，其中好似周秀娜，佢有政治家潛質，俾人鬧都唔會黑面，叻過好多人，我會買佢本寫真。」

Mani：o靚模犧牲好大
首次出烹飪書的Mani，與浸大E神同時段現身書展，一聽自己要硬撼o靚模，即耍手擰頭說：「我邊夠佢哋撼，我都冇事業線，日日睇報紙佢哋都『波』光劍影。其實佢哋都犧牲好大，呢啲嘢各為其主啫，冇話邊個唔着！」

陳七：佢哋有佢哋賣點
南華前鋒陳肇麒今年處男出書推出自傳，對於o靚模硬闖書展，他笑笑口說：「其實我同佢哋冇得比較，始終本書內容唔同，佢哋有佢哋賣點，會唔會幫襯？睇吓點先啦！」

黎先生：o靚模阻住做生意
賣地圖書的黎生直斥o靚模阻住地球轉：「生意差過上年好多，我個檔喺正佢哋對面，啲人想入嚟買都塞實晒。早知佢哋喺度，今年我就唔揀呢個位。」

周秀娜出動
金魚缸簽名車