目擊名模 C迷幻毒P　林莉：佢哋氹我食！face 週刊 173期 @ 娛樂八掛大放送★

5呎 11吋但得 1百磅多少少的林莉，雖然瘦但從未被懷疑有吸毒習慣，「我畀人嘅感覺都算健康，而且又係港姐出身，啲人覺得我乖啦！」不斷尋求突破的林莉，繼在寫真大玩人體彩繪後，今次亦為本刊嘗試白色噴粉造型，呢個人形冰皮月，係人都想咬一口。

去年尾先轉型做模的林莉，身高 5呎 11吋兼孭住 05年港姐季軍銜頭， 1年未夠已變身行騷王，試過 1星期接足 7日 job，曝光率極高。
女模圈是非奇聞唔少，除了新鮮熱辣有 Rosemary在美國涉藏毒又撞車搞到一身蟻外，身為模界新丁的林莉，短短時間已見識唔少女模真面目，由高貴大方變到道姑一樣，尿頻反眼索鼻不特止，林莉更親身目擊當紅女模在夜店 high爆，喪到認錯林莉係男人。
眼見名模變毒后，自愛林莉講明會向毒品說不：「佢哋有氹我食，不過我見到會即刻走，一定唔會掂！」
大把 job等住接， 30歲林莉話盡量唔會夜蒲以保持狀態，對於近日名模 Rosemary涉嫌在美國藏毒被捕，曾經同 Rosemary行過騷的林莉表示震驚，但就承認見過唔少模界同行，唔只爛蒲爛飲，更疑似搞毒品 party「開餐」。

男女不分

唔煙唔酒的林莉，完騷後多數直接返屋企休息，只會間中參加朋友聚會，「有次朋友生日叫我去中環一間 club飲嘢，飲飲吓見到幾個 model走入嚟，其中一個係近年少咗行騷嘅名模 C，佢哋望一望我就去咗另一邊，點知過咗一陣，名模 C突然衝埋嚟攬住我，又拉我出去跳舞，佢仲同我講：『你好靚仔呀！一齊出去跳舞吖！』我見佢當時嘅眼神好飄忽又口齒不清，連男女都分唔到！當時佢身邊有人問我想唔想一齊 relax吓，我梗係 say no兼即刻走人啦！」

名模 C
．三十多歲
．近年較少出騷
．曾是城中紅模
地點：中環 Fevar（已結業）
事件：林莉見到名模 C同其他朋友玩到反晒白眼，手袋俾人摷到亂晒，更 high到誤認林莉係男人，拉佢出去跳舞。

你好靚仔呀，一齊跳舞吖！

想唔想好似我哋咁 relax吓？

名模 K
．約二十多歲
．混血
．屬二線頭一線尾
地點：名模 K母親生日會
事件：名模 K take嘢 take到天昏地暗，連阿媽生日都唔記得，遲足幾個鐘先神志不清咁出現，激到阿媽喊晒口勸佢戒。

阿女，你快啲甩鋪癮啦！
阿媽，你今日生日咩？

Take到反眼

除親眼目擊名模 C high大，林莉亦聽聞另一混血模有不良嗜好。「混血模 K小姐喺模界出晒名 take開嘢，佢成日落蘭桂坊蒲，好多人都見過佢玩到反晒白眼，可能佢食得太多開始失憶， K小姐經常將日期時間搞亂，有次佢媽咪生日約咗佢同其他親戚食飯慶祝，點知佢竟然 high到唔知時間，遲成幾個鐘先現身，佢媽咪都勸佢戒甩啲癮，但始終搣唔甩！」而林莉更聽聞混血模 K小姐同 Rosemary非常熟絡，二人不時孖住玩。
做模最緊要專業，但林莉話有 model因為長期吸毒引致要頻頻去廁所。「我聽過有 model好似電視廣告咁講，隔十幾分鐘就要小便，有次更要勞煩工作人員周圍搵佢，卒之搞到個騷遲開！」

你又去廁所？得未 o架？

事件：某名模有慣性吸毒習慣，除經常出騷前「上電」，又因為毒害搞到經常急尿，多番連累大會遲開騷。

《蘋果日報》圖片

出事酒吧
寇鴻萍同老公梁廷鏘在中環開設的酒吧 Fevar，曾在 09年 10月被警方當場搜獲 K仔及搖頭丸，事後寇表示當晚有人包場，唔知有人藏毒。

林莉（右）做模只有 1年，但曾與多位名模合作，其中更有涉嫌藏毒的 Rosemary（中），而陳冠希胞姊陳見飛（右二） 04年亦在澳門藏毒被捕，事後罰款 2千元，不留案底。

易賺人仔

毒模唔生性，上週率先頂替 Rosemary出席時裝店開幕的林莉，自從書展推出以人體彩繪做賣點的寫真《 Carrie Me》，除騷量大增，連中國市場亦開始入侵。
計劃在內地推出寫真集的林莉，早前認識了多位國內設計師、攝影師及公關，至今在國內行了兩個騷，亦獲女性雜誌《瑞麗伊人風尚》邀請影 10月號封面，密謀北上搵人仔。
「有幾個內地騷都傾緊，佢哋知我係香港小姐，又成功轉型做 model，都有興趣搵我合作。我會做好香港嘅工作，不過如果可以打入埋國內市場當然更好啦！」內地最著重形象健康，唔蒲唔劈唔掂毒的林莉，北上絕對冇難度啦！

林莉因形象健康性感，獲內地不少製作及 PR公司邀請行騷。

頂瑪莉
林莉上週四取代 Rosemary，與林峯為時裝店行騷。《蘋果日報》圖片

Rosemary避走法國

28歲中法俄混血名模 Rosemary Vandenbroucke，上週一（ 6日）在美國內華達州因涉嫌藏毒及撞車被捕，獲准保釋的 Rosemary，將在本月 29號返回美國上庭。當 Rosemary係女嘅著名時裝設計師鄧達智透露， Rosemary會返法國休息。「佢呢兩日心情本來已經平伏，但見到報紙又登晒佢啲手扣相，所以又有唔開心。佢律師話佢暫時唔適合發表任何嘢，原本安排咗嘅工作都會取消，應該會返法國住一陣，再直接飛美國出庭。」至於其母 Julie則至截稿前仍未回覆。