娛樂八掛大放送★

死妹釘，阻住晒！（設計對白）
唔敢，唔敢！（設計對白）"
花旦病發
唔妥胡杏兒搶戲　宣萱生人勿近
2010年09月16日
拍拖大晒！為求騰出時間陪獸醫男友 Ruan，正在拍無綫新劇《萬凰之皇》的宣萱不時要求跳拍自己戲份，催收工唔在講，遇着對手頻頻 NG阻住晒，更「花旦病」發，即時黑面。
劇集開拍無耐，宣萱又眼紅同劇的胡杏兒角色較搶戲，擔心自己被比下去，多次同高層交涉，但無反應，於是當正對方眼中釘，極麻煩！
高層拒配合
一向惹火的宣萱，周不時同拍劇對手有牙齒印。新近被她視為眼中釘的，是一同拍攝《萬凰之皇》的胡杏兒。
因為宮廷劇大收，無綫於是開拍《金枝慾孽》同《宮心計》混合版的《萬凰之王》。不過開拍不久，女主角宣萱卻發現胡杏兒飾演的王后，如同《宮心計》中楊怡所演的麗妃一角，角色奸到出汁，十分搶鏡；左秤右秤下，宣萱暗地向高層提出修改劇本要求，可惜一直不獲有關方面配合。
「宣萱人氣不及以前，又唔係公司親生女，啲老細自然當佢講嘢耳邊風。」一名幕後人員透露。 
記者會當日，胡杏兒見到宣萱影大合照靠邊站，馬上嗌停，讓位俾對方企中間。
杏兒嗌驚
宣萱算盤打唔響，偏偏胡杏兒亦有備而來，明知同麻煩宣萱合作，準時開工、熟讀劇本做足本分，無位入，宣萱侷住表面扮 friend。對於被對手當作眼中釘，胡杏兒查詢先暗笑後驚叫：「點會呀？唔會唔會，好驚喎！」
同外籍獸醫男友 Ruan拍拖唔夠一年，有指宣萱已向男友逼婚，可惜男方唔肯就此被縛，她唯有繼續努力，改變 Ruan抱單身主義的睇法，即使每日開工開到天昏地暗，盡量抽時間陪伴對方。
為求理想早日達到，宣萱每日開工就催收工，又試過要求先跳自己的戲份，走得快好世界，遇着對手 NG，宣萱亦毫不收埋，黑面示不滿。深受影響的莫過於一班等多過拍的二、三線，但礙於她是阿姐級，又出名麻煩，大家唯有敬而遠之。 
愛得黐纏，宣萱開工期間都盡量抽空陪伴獸醫男友 Ruan。
 
胡杏兒事事提點宣萱，但擰轉頭，對方卻擺臭面，藐晒嘴。

走夾唔抖
早前，《萬》劇在荔枝角拍外景，除了必要的對稿試戲，宣萱未埋位永遠坐埋一邊，用背脊「得」住工作人員做獨家村，其他人更加唔會主動同她偈傾。就算一早埋完位，在公司車等拍尾場的胡定欣，一見宣萱拍完上車，即走夾唔抖，急急腳落車離開，寧願在蒸爐一般的公園暴曬，等多兩個鐘埋位，都不願同對方同車涼冷氣。
宣萱人緣有幾好，一眼睇晒。

等埋位，宣萱（箭嘴）「柄」埋一邊，同程可為、陳美詩零交流。 
宣萱（箭嘴）生人勿近，同劇對手，冇個願意埋身。
 
一早拍完吊頸戲的胡定欣（右），寧願去拍攝現場睇胡杏兒（左）開工，都不願與宣萱同車涼冷氣。
牙齒印多 
張可頤

宣萱入行十七年，與同劇對手鬧不和，可以話係眾多花旦之冠，其中同張可頤不和延續多年，雙方隔空罵戰，經典一時。

郭藹明
96年合作《天地豪情》期間，郭藹明因為做港姐嘉賓而須一度停廠，受影響的宣萱唔理對方是為公司做嘢，竟當面破口大罵。

張可頤
二人早在拍攝《難兄難弟》已經唔啱， 97年合拍《天地男兒》，宣萱再煽動工作人員杯葛對方，其後又放料指張可頤經常遲到，更當面罵她「係老幾」。

梅小青
00年拍賀歲劇《夢想成真》，因不滿監製梅小青偏袒胞妹梅小惠而向傳媒力數兩人，甚至扮病曠工搞到停廠，事後被發現當日原來與郭富城出席電影開鏡。 

馬德鐘
03年合作《烽火奇遇結良緣》，嫌棄對手人氣不及自己，全程當對方透明。
林峯
07年開拍《歲月風雲》，林峯開工頻頻遲到惹來宣萱不滿，但人前攬頭攬頸，人後則面左左無兩句。

商天娥
09年合作《掌上明珠》，宣萱扮大牌， NG掟劇本鬧人失場，同劇的娥姐因不滿對手無效率阻收工，失控燥爆，雙方互當透明。