面對面
致青春 胡鴻鈞
以前覺得年青真好，現在覺得年青很「渣」：
一個星期裏，十宗八宗自殺個案，最小的才 11歲，時代不同，年輕，等於輸不起。
尤其是那些贏慣了的，像是《巨聲》出身的胡鴻鈞：
中學讀拔萃、預科讀恒商、大學入理工工管，從小就出類拔萃； 10年參加《巨聲》，從頭帶到尾做「高分王」，決賽只比人氣超班林欣彤落後 0.2分；一入行專唱重頭劇主提曲，去年的《天梯》、今年的《師父．明白了》，碟未出，單曲先在 iTunes贏開巷…… 23歲仔，從來未輸過。
當事人說，非也，非也。
「小學我喺藍田考入拔萃，由一間社區學校嘅翹楚，變咗名校地底泥，本來年年第一，變咗全級第 170名……我都輸過，不過我唔怕輸。
環境惡劣，但係亦都可以時勢造英雄。」
環境惡劣，胡鴻鈞講緊現時的粵語流行樂壇。
當前輩們都把歌手身份當副業、唱到心灰意冷、一心只想賺人仔時，竟然有個小朋友發着時勢造英雄這個偉大的夢……這，就是青春。
前人種樹
有關樂壇，這些年聽到的評語和感言，一概負面。最常聽到的，是當今只剩陳奕迅和容祖兒兩個撐起整個樂壇，其他歌手出碟，沒人當成一回事……翻看討論區留言，我有點意外，電視劇《師父．明白了》播畢一個月，一直有歌迷在等唱片頭、片尾曲的胡鴻鈞出碟；片頭曲〈明白了〉點擊過百萬，片尾〈化蝶〉都說一點不比原唱何韻詩失色。 10月 2日，收錄兩首冠軍歌、第二張個人專輯如期推出的胡鴻鈞說，這就是爭氣。
「𠵱家唱歌唔同以前，以前係大歌星，𠵱家係歌星仔。以前廣東歌輝煌、喺領導地位。𠵱家，愈嚟愈少人聽，日日都有人話香港樂壇滅亡緊……以前真係以為做歌手，唱歌好就得。但係入行以後，發覺多數人當音樂係生意，唔係藝術。每個行業都有遊戲規則，我明白呢個係香港樂壇嘅遊戲規則，但係可唔可以賺錢之餘，唔好偏離軌道呢？ Focus擺番喺唱歌度呢？唔睇香港電視、唔聽香港歌，去到邊都係聽到人咁講，但係香港人可唔可以團結啲，唔好踩自己人呢？我好慶幸，我同我身邊嘅人都係一班爭氣嘅香港歌手，條路係難行啲，但係我哋要更加爭氣！」
父母一向不贊成胡鴻鈞荒廢學業愛唱歌， 10年參加《巨聲》初期要瞞着父母，奪得亞軍後簽約，亦要保證以大學學業為重。《蘋果日報》圖片 
去年唱完《天梯》主題曲人氣急升，今年再唱《師父．明白了》，主題曲〈明白了〉在 YouTube點擊近百萬。 
新碟 10月 2日才面世，不過上月推出的〈明白了〉和〈化蝶〉，一早已經是 iTunes單曲銷售冠軍歌。
拔萃人生
會考 22分、 14歲已經是八級鋼琴、理工工管系畢業、又是籃球高手校隊成員，看起來文武雙全、高人一等，胡鴻鈞說， 22分在拔萃是中游、學琴只不過是向媽媽妥協，尖子生亦曾經試過被人當地底泥分在最差的 F班。
「我屋企係普通人家、小學讀藍田循道衞理，小一至小六年年考全級第一，試過有一次考第三、英文試卷揭漏咗一版得七十幾分，對我嚟講已經形同世界末日。升中嗰年，校長寫推薦信送我去考拔萃，從此以後，我嘅世界完全變樣……」
胡鴻鈞說最記得開學日人人用英文對話似足第二個星球、學校門口停的都是勞斯萊斯和入門價五百萬的 Bentley、二世祖同學們整天晒名牌視錢財如糞土、階級觀念重到全級只有精英 A班得以使用落地玻璃全新班房：「嗰度就好似一個社會縮影，同學來自港九新界社會各界，有人有錢、有人有勢、有啲人草根、有啲人似我一樣普普通通……我自細都係全級第一，但係一入學分班試就畀份中五會考英文卷我哋做，被分咗去最差嗰班，全級二百人，我第一年嘅成績係第 170。考入拔萃，父母開心、小學校長引以為榮，但係我唔開心，企喺嗰個大到似迷宮一樣嘅校園、聽到身邊人個個講英文，淨係覺得好自卑，覺得自己做錯選擇，去咗一個完全唔屬於自己嘅世界。」
去年 12月首個個人音樂會，最感激偶像張敬軒拔刀相助：「第時如果我上咗位，都一定會咁做，新人真係好需要前輩提攜。」 
人人話香港樂壇已死，胡鴻鈞不同意：「愈係俾人咁講，我哋愈係要做好啲。其實我同許廷鏗都一樣，唔係讀唔成書先嚟唱歌。」
自稱小時候名列前茅是靠小聰明，進了拔萃以後，胡鴻鈞說二世祖的嘴臉難看，和一班窮學生因此被激發出小宇宙：「有錢好叻咩？我窮，但係我成績好過你！」
「嗰年我第一次發力讀書，第二年已經考前一百名、第三年已經係全級第四十名，連老師都對我刮目相看。中三分科嗰年，我考第四十三，理應全級頭四十名可以入到理科精英班，計埋數當中應該有唔少人揀文科，我機會應該好大，點知最後都係入唔到，有人靠關係留咗位……所以我話拔萃就係一個濃縮嘅社會，有時明文規定、白紙黑字，原來都唔係必然，都要靠關係……所以我話我唔怕輸，最怕冇努力，冇努力過，就一定會輸。」
童言無忌
外形沒有許廷鏗俊俏、身家沒有羅孝勇富足，我沒想到胡鴻鈞其實也有女人緣，中學跨區戀上聖士提反女尖子、大學成功溝得戲劇社校花，入行以來未有新戀情，胡鴻鈞說：「因為呢行好複雜、入得呢行嘅女仔都好似好有機心咁，我有諗過㗎，可能同紅過我嘅人拍拖就冇咁多嘢要擔心啦……比如話薛凱琪……」我笑咗， 23歲，果然口不擇言，就當你是童言無忌好了。
「初戀女朋友好上進、好乖巧，比我更緊張成績，成日叫我溫書、幫我影印 notes，唔係佢，可能我會考冇 22分添！佢就係嗰種成功男人背後嘅女人……𠵱家，去咗讀劍橋，飛咗我囉……到咗入理工，我留意咗個 dram- so女神好耐，偷偷上佢 facebook、成日睇佢啲相、幻想同佢一齊。跟住拜托朋友、製造偶遇機會、成功一齊……估唔到呢？可惜到參加《巨聲》後，都分咗手。入行呢幾年，我真係冇動過心，身邊嘅女仔都好似有幅牆隔住咁，冇機會了解、亦都唔放心發展。你睇吓咁多𡃁模借人上位，好似入親呢行就不擇手段好有機心咁……講真，我有諗過，如果搵個紅過我嘅女朋友，咁就一定唔使擔心被出賣啦！反正我青春，夠薑越級挑戰！」
讀書拔尖、愛打籃球還有八級鋼琴造詣：「六歲開始被媽咪迫學琴，我哋一早講好考到八級就唔再迫，我就 14歲考到八級畀佢睇。」 
出道與現在相比，兩頰削晒被質疑整容：「我要返學，唔得閒整！」《忽然 1周》圖片
賣才
網上流傳胡鴻鈞出道三年的大頭對比照，疑似有人削骨整容進化變靚仔，對此，胡鴻鈞否認：「我賣才唔係賣樣，冇可能！我要返工又要返學，邊有咁嘅時間！」
今天我想討論的不是胡鴻鈞有沒有修飾過他的臉，而是除了歌藝以外，他沒有被修飾過的性格和言辭，有點自負又有點輕率、有點調皮但也非常熱血，我不反對電視台和唱片公司建議旗下藝人施刀變成一樣的臉，但是能刀下留情，讓他們繼續做有趣的自己，而不是變成樣板青年，好嗎？
留言列表
{{ article.title }}
