我得寵：陳柏宇晒命狗女爭風呷醋

■經過一年多的磨合，陳柏宇的兩隻愛犬終能和平共處。攝影：陳俊強

歌手陳柏宇（Jason）跟女友符曉薇感情穩定，自二人拍拖後鮮有緋聞傳出，不過在養寵物方面Jason卻享盡齊狗之福，而且亦充份印證了異性相吸這定律。Jason飼養的兩隻狗女Bessie及Victoria試過為爭寵打大交，但經過一年牠們已能好好相處，跟Jason建立開心三角關係！撰文：文國駿

陳柏宇日前帶同兩隻愛犬，分別是四歲半的老虎狗Bessie及歲半的鬆獅狗Victoria，到西環寓所樓下的公園散步，兩隻狗女性格分別甚大，Bessie非常乖巧而且聽話，不用狗繩也會自動跟着Jason的步伐而走，不會超出主人五步範圍，而且彷彿眼裏只有Jason一個，無論其他人或狗怎逗牠玩也沒反應；相反Victoria一落街就異常興奮，而且非常喜歡看着球場上的人打籃球，更數度想衝進球場。

抹口水好服侍

雖然Victoria已經繫上狗繩，但每每希望追波時也會忽然失控狂奔，難怪Jason笑言自己的手經想被Victoria扯到甩骹！Jason又爆Victoria是名副其實的口水怪：「呢個女係超多口水，一抹少陣就會整到個地下濕晒。」他所言非虛，短短一小時的訪問過程中，Jason用了一整盒紙巾替寶貝女抹口水善後，而且非常溫柔。

■Bessie外貌兇惡，但其實很嬌嗲，Jason也忍不住親一啖。

■鬆獅狗不時流口水，陳柏宇要經常為牠抹乾淨。

Jason四年前開始飼養Bessie，他坦言當初對這隻老虎乸另眼相看的原因，是貪牠的樣子夠笨，他說：「我就係鍾意佢個樣夠蠢！會成日用佢個儍樣戇居居咁望實你，真係好搞笑。同埋見住佢好似可以乜嘢都唔使諗咁，真真正正放鬆一吓！」而年多前Jason亦開始飼養Victoria，兩隻狗女會否爭風呷醋？Jason表示：「都有㗎！嗰時我如果摸緊Bessie，Victoria就會自己行埋嚟塞個頭埋嚟，要我摸佢一份。同埋兩隻嘢一開始時成日會打交，打到塊面都損晒流血㗎。」

嫌棄狗仔難湊

問Jason用甚麼方法令兩隻狗女不再打交？他說：「哈哈！冇喎，佢哋係打打吓自己冇打，同埋打親都唔係好嚴重，唔需要過份擔心嘅。」Jason又坦言自己特別鍾情狗女，原因是比較愛撒嬌及易打理，他說：「如果係仔嘅話，屙尿會周圍『啡』㗎！都係女易打理啲，同埋最緊要係狗女嗲啲，仔就會貪玩啲。」問到Jason女友跟兩隻狗女是否合得來？他表示：「佢哋又相處得好好喎！冇爭寵，哈哈。不過女友就同Victoria夾啲，佢哋成日玩得好開心。」

■雖然起初Victoria及Bessie狗咬狗骨，但現在卻感情要好。

■陳柏宇和女友符曉薇感情要好，女友亦跟愛犬關係融洽。資料圖片

皮膚病手尾長

Jason表示鬆獅狗跟老虎狗也是很易患皮膚病的品種，當中尤其以老虎狗更為嚴重，他說：「Bessie喺好細個時患過一次好勁嘅皮膚病，嗰次手尾都幾長，我都擔心佢捱唔住。」

■陳柏宇拉着狂奔的Victoria，而Bessie則乖巧跟隨。

老虎狗識嘆

Jason又向希望養老虎狗的新手作溫馨提示，他說：「佢哋係要好嘆嘅品種，夏天時一定要開冷氣，冬天就開抽濕機，仲有係個嘴嗰啲摺痕要多啲清潔，因為嗰度係最容易藏菌嘅，同埋我都好少帶佢哋落街，因為佢哋天生心臟機能麻麻哋，同佢哋散步要量力而為！至於鬆獅就記得夏天幫佢哋剃毛，唔係佢哋會熱得好辛苦！」
服裝提供：Musium of I.T