媽咪姐
我要有得揀！
我哋香港人，係慣咗等嘅。飲茶等位、報學校等攞表、買金多寶等運到，等完又等，但總算有目標有限期吖。估唔到嘅係，依家媽咪姐呢啲師奶仔只係想多幾個電視台睇吓啫，竟然等咗成 3年都仲未有得睇！嬲，好嬲！
政府一味拖延免費電視發牌，但魔童王維基唔理嘞，周二（ 4日）就 call齊全台 188個藝人出席新台節目試映會，即席公布電視台名為「香港電視網絡」（簡稱香港電視），更聲稱：「公義同民意都企喺我哋呢邊，開台係事在必行！」之後又暗寸 TVB：「我哋好多員工都嚟自同一個機構，不過佢哋之前就好似被困咗喺動物園咁，依家過到嚟，就好似嚟到 safari咁，可以 112公里時速咁奔跑！」係咪咁勁呀？等媽咪姐睇吓啲預告片先。
嘩，唔睇猶自可，一睇就覺得畫質音效勁 sharp，有睇電影嘅感覺。講到 gimmick，就有廖碧兒「 lam爆」蘇康，好戲嘅有夏雨決戰鮑姐，仲有黃宇詩同曾國祥去到瓦努阿圖火山口拍紀錄片，唔係坐住架車兜兩轉反政府軍嘅民居就話「行過烽火大地」囉！
嗱，梁特首，你話至今未發免費電視牌唔係「官商勾結」，又叫人攞啲證據出嚟。咁媽咪姐都好想講，好多嘢唔係得把口嘅！「嗱嗱聲」發多幾個免費電視牌照，還我哋一個選擇嘅權利，咁先係你否認「官商勾結」嘅最好證據！
「末日」都就嚟到啦，仲拖！？（設計對白）
試映會開始，有幾個特技演員戴住王維基面具上台耍刀玩軟骨功，搞笑又有寓意！之後王之真身先出現，講明要挑戰電視霸權。
無綫知王維基周二（ 4日）晚搞晒冷 show，臨時臨急喺同日下晝， call晒班視帝視后候選人同大班藝員返電視城撐場抵抗。你睇，楊怡同陳豪嘅打扮幾咁隨意，呢勻 TVB真係急嘞！
自認係「一哥」嘅黃日華喺台上就話要帶埋其他藝人，好似身邊嘅廖啟智一齊去政總爭取發牌，仲話要「以暴易暴」咁話喎。咁激？哦，原來佢只係搞爛 gag話要暴飲暴食爭取發牌啫！
話明全台晒冷，林文龍就算傷咗隻左腳，坐住輪椅都要 嚟捧場！咁識做，難怪王維基重金禮聘都要斟佢過檔。
《童話戀曲 201314》
香港電視試映會上，第一套就播廖碧兒喺《童話戀曲 201314》度「脷誘」蘇永康。咁搏命，睇嚟佢好想「 lam」到個一姐地位返 嚟。
《客家女人》
視后張可頤大戰影后劉美君，講一對客家姊妹分開中港兩地，借勢講埋中港融合、核心價值。咦，聽落個古仔真係有啲 heart喎。
《歲月樓情》
演技同樣備受認同嘅夏雨同埋鮑姐（鮑起靜）首次劇中聚頭，兩人 喺親情味濃嘅《歲月樓情》入面大鬥演技，雖然未知劇情會唔會又係老土路線，但媽咪姐都好期待呀！
《歲月樓情》故事橫跨 30年，係香港電視重頭劇，黃日華同關寶慧都有份做。睇呢一幕，有啲《大時代》 feel喎！
仲有吳君如？
吳君如都簽咗香港電視？非也！王維基努力拍劇之餘，都仲傾咗唔少綜藝節目嘅播映權返 嚟，吳君如幫奧比斯拍嘅特輯就係其中一套，睇預告片都幾感人。
《挑戰》有料到！
黃宇詩同曾國祥為資訊節目《挑戰》去瓦努阿圖火山口拍熔岩，王維基仲會派人跟戰地記者去利比亞拍攝。有圖有真相，一個字，堅！
你今日投咗票未？
唉，講起連睇電視都冇得揀，就真係勞鬼氣！都係《忽周》好，為咗俾我哋啲師奶仔可以自己揀視帝視后，專誠搞咗個《忽周讀者視帝視后選舉 2012》，絕對公平公正，等大家有機會發聲，又唔使擔心上網投咗票之後，突然話系統有事咁啦。最緊要嘅係，投完仲有機會攞勁獎，嚟個台東豪華遊吖嘛！仲等？快啲去 http://sw.hk/vote睇吓參加詳情，投票撐偶像啦！
上年視后係杏兒，今年唔通要揀楊怡？嗯……諗吓先。
留言列表
{{ article.title }}
