古明華驀然回首 22載辛酸冷暖
無綫藝人古明華（古佬）憑「蘇基」被視為台慶男配角的大熱門，成功上位！但驀然回首，古佬試過受盡冷嘲熱諷，亦試過囡囡險些未能安全出世，種種經歷對他來說，確是百般滋味在心頭！
憑劇集《巴不得媽媽》中「蘇基」一角而彈起的古明華（古佬）除早前在大馬ASTRO頒獎禮奪得「我最喜愛出位人氣王」獎，即將舉行的台慶頒獎禮也是《最佳男配角》的熱門人選，面對後來居上、在《大太監》扮演陰險太監而大受歡迎的陳國邦，古佬說：「陳國邦係我前一屆演藝學院師兄，邊個攞都係為同一間學校增光啫！」
怒爆主角恃勢凌人
古佬入行22年，今年終苦盡甘來，成功確是得來不易！回想以前，古佬坦言也經歷冷嘲熱諷，除試過被路人以不禮貌口吻直指是「茄哩啡」外，在片場亦試過被主角恃勢凌人：「拍劇唔使埋位時，平時就會同班演員企埋一邊傾偈講笑，當時主角喺度用威吔拍緊戲，跟住佢對我講：『古明華，你唔好再講笑得唔得呀？』我心諗，當時又未roll機，我同其他同事傾偈又唔係好騷擾佢，點解主角就可以咁？最後我仲竟然畀監製照肺，真係幾難受！」
古明華自後生已經留鬚，而他更笑言：「太太都係因為咁識返嚟！」
古明華與太太十分鬼馬，連拍結婚相也用《唐伯虎點秋香》橋段。
感激妻女風雨同路
演藝之路不易走，幸古佬一直以來也有妻女與他風雨同路，回想起囡囡出世時，他也十分感觸：「記得太太穿咗羊水，但又未生得，之後幾日我一放飯就由葵涌揸車去東區醫院，都幾攰！直至有次太太又作動，我趕過去但佢又未生得，跟住我揸車趕返去開工。去到一個燈位時，我突然感覺到個女呼喚我，當下覺得如果囡囡出生我唔喺度，我一世都唔舒服！」
沒想到返抵醫院後，最戲劇性的畫面出現了：「醫生好緊張捉住隻手同我講『古生，你老婆生啦，但BB個頭出唔到，一定要搵人簽紙開刀做手術！』囡囡出世之後，我深深覺得爸爸同o靚仔分別就喺呢度！」
文：文珊 攝：吳文聰
留言列表
{{ article.title }}
