謝金燕响電單車上瞓低拗腰兼趷籮晒長腿，38歲做咗人阿媽一樣有本事性感。
出道22年、有「電音女王」之稱嘅謝金燕，終於有機會舉行首個小巨蛋演唱會。開騷前立下「四不條約」，不宣傳、不受訪、不安歌、不慶功，但入座率都有八成，預計主辦單位要倒蝕200萬台幣，但並無影響女王心情：「今天演唱會，雖然沒有全部坐滿，但是我相信，總有一天，我也可以秒殺，讓今天沒有來現場，看我演唱會的人後悔。」

舞台變賭枱
製作費高達3,000萬台幣嘅《2012謝金燕一級棒世界巡迴演唱會》，成本大部分集中响燈光同舞台，山頂嘅觀眾居高臨下，仲會發現舞台用咗啤牌嘅葵扇圖案。「大家想到我們這家人就聯想到賭博，雖然自己不賭，但要就要最大的，所以選黑桃（葵扇）。」自己俾錢買飛入場睇騷嘅豬哥亮，當年賭錢賭到妻離子散，同親生女謝金燕已經12年冇傾偈冇見面，為咗爭取機會父女重逢，開騷前一個禮拜，豬哥亮一次過送咗12個花籃俾個女，借用當年岳飛收12道金牌被迫班師回朝典故，希望個女會見吓佢。咁都俾豬哥亮諗到，但當年岳飛返到去就俾人以「莫須有」罪名處死，所以謝金燕對老豆呢番「心意」根本冇理會，仲喺開騷前獨自閉關一粒鐘，所以到完騷先知豬哥亮有嚟捧場。

 
慢歌環節，巨影LED熒幕播放多款舊照，包括呢張豬哥亮抱住謝金燕嘅一家四口珍藏，配合獻唱已故歌后鳳飛飛作品《心肝寶貝》，謝金燕哭成淚人。

大唱廣東歌
成個騷換咗11套衫、唱咗36首歌、有51個dancers伴舞，十足十大型跳舞派對，謝金燕出力盡騷42吋長腿，以三首經典快歌《練舞功》、《叉燒包》、《YOYO姐妹》揭開序幕，之後仲唱廣東歌，就係鄭伊健嘅《極速》。睇嚟謝金燕响咬字方面下過唔少苦功，起碼我知佢唱緊乜！其實當晚謝金燕唱咗唔少別人的歌，包括陳昇作品《把悲傷留給自己》，聽講呢首係佢嘅「死穴禁歌」，因為20年前謝金燕遇上嚴重車禍毀容，養病期間佢一直聽住呢隻歌，謝金燕選擇對住過萬歌迷獻唱，無非想忘記以往嘅傷痛。話明係巡迴演唱會，又點會少得香港站，據主辦單位講，希望今年年尾申請到紅館檔期，而家正辦理緊手續，踏上紅館舞台，係謝金燕嘅心願，話晒佢首洗腦電音歌《嗶嗶嗶》，唱到連高登仔都撐，謝金燕嚟香港更加要練多幾首廣東歌。 ####

 


自己買飛捧個女場，豬哥亮話：「因為我的女兒變成電音女王，我還沒看過她表演，所以不要誤會，豬哥亮不會炒新聞。」仲讚個騷好睇值100分。


開騷前立下四不條約，但眼見台前幕後做得咁辛苦，謝金燕（箭嘴）破例現身慶功宴，以茶代酒同班dancers飲杯。


劉華呢排忙照顧老婆同啱啱出世嘅小龍女，但依然託人送花俾謝金燕祝佢小巨蛋處女騷演出成功。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄