前週六（五月十二日），從上海返港休息三天的陳鍵鋒，與兩位男友人同往洲際酒店歎法國菜，卻未見有女伴埋身。
高層撐腰 一度成為無綫棄將的Sammul陳鍵鋒，自從三年前憑內地劇《美人心計》爆紅，身價暴升至二十萬人仔一集，今非昔比的他，除獲「電訊魔童」王維基睇中拉攏加盟，連舊東家無綫都想同陳鍵鋒「重修舊好」。據知，陳鍵鋒的表哥，乃無綫新主「殼王」陳國強的財務總監，成為「自己友」，令Sammul的「回頭草價」勁升兩倍有多，拍劇每集袋二萬五，希望重金之下，Sammul願意回歸接拍重頭劇《衝上雲霄II》。

 

戲份被刪
由於非無綫親生仔，陳鍵鋒一直被公司忽略，得寵度從來不及簽了十年長約的鄭嘉穎、黃宗澤，一○年拍罷《洪武三十二》，Sammul亦意興闌珊，不再續約無綫。「無綫要捧自己人大條道理，Sammul唔肯簽經理人約，就算《學警》收得，但續集佢嘅戲份反而愈嚟愈少，呢幾年啲頒獎禮，Sammul連入圍都無份！」塞翁失馬，焉知非福，離開無綫後，陳鍵鋒成功轉攻內地，○九年便因拍重頭劇《美人心計》，創下最高收視紀錄，機會開始一個接一個。「陳鍵鋒都算有運行，《美人心計》爆出，响內地唔同電視台播都攞晒收視冠軍，搵佢拍劇嘅製作人就愈嚟愈多，舊年已經拍咗四個劇，啱啱喺蘇州拍完《女人淚》，接住會喺車墩拍《烽火佳人》，呢套劇，佢已經加到二十萬人仔一集，係以前無綫嘅二十倍價錢！」

對家挖角
一直獨大的無綫電視，隨住政府再發免費電視台新牌照，對手王維基不斷以銀彈挖角，令無綫流失大量小生花旦，為救亡，除了向亞視撬人，連棄將陳鍵鋒都唔放過。「其實舊年王維基都有搵過Sammul過檔，仲親自飛上海同佢傾約，價錢出到十萬蚊一集，係無綫嘅十倍，不過當時Sammul手上接咗幾個內地劇，所以推咗王維基！「依家無綫鬧小生花旦荒，內部立立亂，殼王上場之後，搵咗班親信做左右手，其中殼王嘅財務總監，原來係Sammul嘅表哥，點計都算自己友，所以殼王都有派人搵Sammul，開到聲想佢返無綫拍大製作《衝上雲霄II》，咁啱套劇押後咗開拍，希望可以就到Sammul個期！」

谷底抽身
早年憑《律政新人王》及《學警》系列上位的陳鍵鋒，事業尚算有點起色，但因為拒絕賣身無綫，隨即被打入冷宮，直到轉戰內地發展，才一洗頹氣。

新人
97年，陳鍵鋒接拍恒生銀行廣告被發掘入行，初期在新城做DJ，後來簽約無綫成為旗下藝人，開始做《K-100》主持。

力捧
加入戲劇組，03年在《律政新人王》中首次做男主角，其後，接拍了《衝上雲霄》、《學警雄心》等重頭劇，全部有收視保證，當時更與黃宗澤、吳卓羲等小生被捧為「奧運六星」。

冷宮
07年因拒絕同無綫簽經理人合約，地位即時變天，在新劇《王老虎搶親》中要扮女人演出，其後的《學警狙擊》、《洪武三十二》等戲份大減，由主角變配角，在台慶頒獎禮中更加連入圍都無份。

發圍
離開無綫轉戰內地拍劇搵「人仔」，作品《美人心計》、《搜神記》、《亂世佳人》等口碑極佳，現時拍劇身價已跳升至二十萬一集。 ####

 


發現記者後，陳鍵鋒的兩位男性友人立即彈開，孭住大背囊的他，獨自行去搭上頂樓的法國餐廳。


六嬸離任後，「殼王」陳國強正式成為無綫話事人。


○七年台慶頒獎禮，鄭嘉穎首奪視帝，陳鍵鋒（灰色衫）坐足全晚只有戥人高興。（《蘋果日報》圖片）


《美人心計》為陳鍵鋒殺入內地市場。


陳鍵鋒去年一口氣拍了四個內地劇，豬籠入水的他計劃在香港和上海置業。


王維基去年已出口術邀請加盟新電視台，可惜陳鍵鋒寧考慮出手較低的無綫，純粹感情分搭夠。


在無綫期間，陳鍵鋒氹唔掂樂易玲，卻與陳志雲老友鬼鬼。（《蘋果日報》圖片）



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄