周耀輝既是填詞人，亦在浸會大學為人師表，他個子瘦瘦，架着黑框眼鏡，衣着整潔亮麗，說話溫文儒雅，外形儀表活像個聽教聽話的文藝青年。

但查實，他從小到大都是個不屑規範的人，至今活了半個世紀，他一直活得猶如他為達明一派填〈忘記他是她〉的詞那樣「如烈火紛飛的率性」，只選擇走自己喜歡的路，故此，他照計應該可以做政府新聞高官，但他卻不甘為政權工作而辭職；也照計，他可以當報館或電台高層，但他卻難忍香港生活的壓迫感，毅然遠走荷蘭；明明可以在荷蘭享受每年兩個月大假、賺取政府播音員的高薪，他卻在人到中年選擇全職修讀博士，再回港教授年輕人「性別研究」。

「我想班年輕人上完我嘅堂，會清楚自己鍾意啲乜，接受唔到啲乜，更重要係希望佢哋鍾意自己多啲！生活唔係要跟某種方法，唔係以賺錢、得到某種地位或買到幾多層樓作為標準，我會話畀佢哋知，我呢個佢哋爸爸年紀嘅老師，喺自己生活度，都做咗啲好古靈精怪嘅選擇，但我都好開心！」

年輕人

周耀輝很喜歡接觸年輕人，他自八九年開始填詞至今，填過王菲的〈色盲〉、陳奕迅的〈第五個現代化〉、黎明的〈DNA出錯〉，還有鄭伊健的〈動地驚天愛戀過〉等近千首作品，只因有很多話想跟他們說；去年決定由荷蘭回來教書，亦因為想跟他們面對面。「我始終唔喺香港，把握唔到歌詞會點流傳；但返嚟教書，一個course十三個禮拜，佢哋鍾唔鍾意都好，都要坐喺度聽我講嘢，接觸我畀佢哋嘅意念、問題、質疑同挑戰。如果要數接觸得最多年輕人嘅詞人，我一定係話我o架！我對佢哋好有期望，覺得佢哋有改變嘅可能！」

周耀輝（左一）因為達明而晉身填詞界，更與黃偉文（右二）和林夕（右一）被稱為「香港三大詞人」。

他想他們改變的，是對自己人生的選擇，希望他們不一定要依所謂的「常規」去活。「我同佢哋講到理想兩個字時，佢哋就會謝晒，我覺得好開心o架！至少代表呢兩個字喺佢哋心入面好重要！有次個學生講：『講乜嘢爭起步點呀？根本我哋由一出世嗰日已經輸晒！人哋已經喺終點啦！』真係o架，佢哋依家要諗點寫CV好睇啲，又要做好多份兼職，學業功課負擔又多好多，但事實根本冇得追！個競爭一開始嘅時候已經唔公道，但我哋個社會仍然係咁推佢哋去爭起步點！所以我好希望佢哋可以攞到啲力量，過佢哋想過嘅生活。」

在荷蘭居住時，電台的工作只需他每天返公司兩個鐘，他用其他時間來填詞，以及跟朋友享受慢活。

懶巴閉

他生於單親家庭，上有一個姐姐，小時候家住徙置區，母親以穿膠花、珠仔維生，有時要向別人借錢度日。因為窮，姐姐讀至中三便要輟學，母親則希望他可以入讀工業學院方便將來搵工，可是他揀了讀英華文科，更遇到一位令他「耿耿於懷」的中文老師。「我哋要做蘇軾嘅《水調歌頭》作業，我有我自己一套解讀方法，好畀心機寫寫寫，結果畀個老師改到呢！佢話我冇跟書喎！咁咪即係死唸死抄？我係有諗嘢，唔係亂咁作，所以我好嬲！」

高考3A1B入到港大，他寧修讀英文與比較文學，也不選擇讀法律。八三年大學畢業後，他加入政府新聞處工作。「發新聞稿，好好人工，都OKo架！」

一直工作至八九年，他被派往倫敦受訓，前途看來無可限量，奈何正值發生民運事件。「我嗰陣喺倫敦，好強烈唔想幫政權做嘢，於是就懶巴閉咁辭職！因為受訓呀，我仲要將當時有嘅畢生積蓄賠番畀政府，都好多萬o架！嗰陣同我一齊喺新聞處都係第一份工嘅黃偉綸，依家已經係新聞處處長喇！如果以某個常規去睇，我呢個係一個好愚蠢同好天真嘅行為嚟o架！哈哈哈！」