音樂人涉嫌強姦無綫女藝人的案件，震驚整個娛圈。其實類似之事，時有發生，為了提醒各位女士要隨時保持警惕，近日一眾女星紛紛挺身出來，自爆遭侵犯的經過，就連樂壇的一位天后，亦大方承認年前曾遇醉漢拍大髀及擁抱。

DaDa：忽然露械

「百果園E神」陳靜（DaDa）身材驕人、樣子清純，表面好似好弱不禁風，但遇上色狼，她便會毫不留手地喪鬧，令到色狼無地自容。

DaDa自小就好惹色狼的垂涎，中學時期，放學返家途中，她便撞過身穿乾濕褸的露體狂。DaDa憶述：「當時佢一直行近我，我都覺得有啲古怪，企到我面前之後，佢就立即打開件褸，向我露下體。當時我好驚，即時飛奔返屋企。」

DaDa在大陸登台時，竟然被當地的保安非禮，慘遭全身摸勻。

她續說：「其實入行初期我都遇過一啲鹹濕佬，以前casting最方便就係搭地鐵，喺車廂內，佢哋趁人逼就用手踭頂我個胸，後期我學精咗，會用本書擋住。我試過見到有個菲傭畀人頂胸唔敢出聲，我就行埋去捉住個鹹濕佬嚟鬧，呢種人你唔鬧佢，佢就會有第二次。」

最近，DaDa到大陸登台亦試過畀人鹹豬手，面對色狼絕不留情的DaDa，在夜場內眾目睽睽之下照鬧。「嗰次個場派咗啲保安嚟保護我出入，點知其中一個保安一直攬住我入場，全身畀佢攬勻晒，個場叫佢嚟保護我，佢就嚟抽我水，我梗係唔放過佢啦！」

Jeana：夾硬除衫

現年二十三歲的何佩瑜（Jeana），入行初期最性感的極限就只能以比堅尼上陣，但有一次她去影樓影大頭靚相時，那位攝影師竟用手掃她胸部，兼要她即席除衫。

Jeana說：「嗰個攝影師原本係叫我去影head shot，嗰日我自己一個人上去，當時我着住件好短嘅tube top，影影吓佢就叫我趴低影。依家諗番有乜理由影head shot要趴低o架，嗰陣時我係初哥，咪聽佢講囉。之後佢話我啲pose唔掂，行埋嚟教我擺，兼出手移我件衫，跟住佢隻手掃到我個胸幾次，之後仲叫我除埋件衫，話效果會自然啲喎！依家諗番好蝕底。」