開學啦！要打破校服的悶局，與其出盡法寶把裙腳改短，不如聽聽青春少艾的意見：「新法的校服最靚，有日本 feel！」人人都話水手裝好，結果又是千人一面，跟傳統「一闊衫大」的剪裁沒有兩樣。設計師就話：「仔根本不知自己想要甚麼！」記者：蔡慧敏攝影：陳陶鈞Model： Connie& Howard@StarzPeople
自改校服Q1.有甚麼改裝校服的秘技?Q2.喜歡自己的校服嗎? Q3.覺得哪間的校服最美?
DaDa Chan（基督教四方福音會深培中學）
A1.校服是白恤衫+紅色格仔背心裙，一定要着冷衫遮住身形。但心口的紅格仔露出 V領之外，好怪！我把背心裙改成半截裙，居然一直無人發現！A2.都 OK。A3.新法書院
放大圖片 
放大圖片 
Aza（潔心林炳炎中學） 放大圖片 
A1.夏天是白色連身裙＋紅領呔，我會把相連的底裙剪掉，因為好黐肉！還會花$20把裙改得收身。想短一點就把腰帶束緊，把整條裙拉高，檢查時就放下來。A2.不喜歡。A3.新法書院
Ayu（中華基督教會蒙民偉書院）
A1.冬天着灰色半截裙，在腰間摺兩下就可以短一點。A2.不喜歡，太普通。夏季的淺藍色圓領連身裙，出汗會濕到一笪笪，一定要着冷衫。A3.新法書院
放大圖片 
放大圖片 
Howard（玫瑰崗學校）
A1.校內有錢同學都會去找裁縫做褲，剪裁貼身一點、小喇叭，但誇張到 Beatles咁當然會捉；還會着 Boot款的 Dr. Martens。校章用雙面膠紙黐住，方便入機舖。A2.喜歡。整套都是黑灰白，至少沒有怪色。A3.玫瑰崗
放大圖片 
放大圖片 
■餅碎 Gloria曾在玫瑰崗就讀。
Point! 放大圖片 
1.橡筋裙頭夠舒服，真皮蝴蝶結藏在恤衫下，「靚畀自己睇」也不遺餘力！
放大圖片 
2.公主袖，配合恤衫的貼身剪裁，富立體感，有無人會攝膊棉去扮 Balmain？
放大圖片 
3.裙腳及膝，發言人說「這個款太長不好看」，後幅 12褶，能保持貼服。
Point! 放大圖片 
1.頭髮不得過長，不得染髮， Howard這個潮頭被 Perfect捉硬！2.規定要穿黑皮鞋， Converse免問！3.中袖設計，不易弄污。
放大圖片 
■位於堅道的宏爵國際學校，校服超 sexy！不知是款式天生夠潮？還是學生自己加工？
放大圖片 
■可愛的超蓮令聖心普通的白裙生色不少。
放大圖片 
■新法書院的水手服夠經典，圖中是唐詩穎（右）和戴夢夢。
放大圖片 
■真光一向以旗袍掛帥，但香港真光中學商科部（跑馬地福群道）卻異軍突出，白 bow+白鞋+藍裙，似空姐。
現代加名牌格
數最受歡迎校服，即時想起現代書院那套粉藍 Burberry格仔+公主袖恤衫。現代書院在八年前成立，老闆 Ken Sir曾在補習社做了廣泛的民意調查，再與設計師商討，滿足少男少女對日本漫畫的想像之餘，又加入名牌元素，難怪深受小朋友歡迎。該校發言人表示，設計的原則是形象鮮明之餘，也要令同學着得開心：「好多校服都大同小異，我們想一望而知這就是『現代』的學生；另外要照顧同學口味，令他們有優越感，不會一放學就想除下。」傳統校服最愛與潮流作對，興喇叭褲時只准穿蘿蔔腳，反之亦然。但天橋上季季換畫，無謂「以有涯隨無涯」。公主袖正是八、九年前大熱的時裝元素，好彩還不算誇張，否則今日看來一定娘死！「我們只是 have a touch of the trend。」現代書院各分校共有 2,000多名幸運兒能着得靚靚地上學，但發言人強調校服的款式不會影響學生選校的決定：「揀現代，當然是因為師資優良 notes精……」平心而論，校服的質料實淨，剪裁燙貼，兩件恤衫+裙/褲+冷衫校褸各一，男女裝分別售$8xx和$9xx，而且不分冬夏季，慳家！
設計師陳米記：兆基自選套餐
所謂靚校服，離不開水手裝、格仔裙，相反怪雞顏色、水桶剪裁就勁不受歡迎。但世上總有人比你更幸運。香港兆基創意書院的校服由一系列恤衫、裙、褲、 polo shirt、冷衫和外套組成，有多種顏色，學生可以自由選擇，還可以加入自己的 item去 mix& match！只需有其中一件是學校出品就可以了。設計師陳米記表示：「無論點襯，始終有個 look喺度。希望學生們能夠 proud of自己校服，無錢買衫的一樣可以着出街。」但一般學校追求整齊，千人一面是為「公平」，但陳米記眼中的公平，是無論有錢與否都有選擇的權利：「不存在有沒有名牌的問題，相當平等。」對於校服，他重視的是剪裁、質地和車工。「盡量度身訂做，用純棉。一般學校的恤衫都是硬領、 TC料，貪其不用熨，用大中細碼就套晒落所有人身上。其實是鼓吹懶惰！」皺 shirt其實都可以好有型。但校服供應商要經過投標，價低者得，結果質料仍不盡陳米記之意。
放大圖片 
放大圖片 
■兆基同學的 all black look。
現代書院太 MK 放大圖片 
■學生在 Formal Uniform Day要以全身校服上陣。加個 Bow呔，靚晒！
設計經過半年才落實。校董會曾建議設計兩款校服，其中一套由學生自己設計，但陳米記對此不表贊同：「 o靚仔其實唔知自己想要乜。這樣看似民主，但其實很危險。應該加入幾多專業意見？投票的比例如何？」「我最喜愛的校服選舉」好易變成樂壇頒獎禮！「創意書院校服不一定要好有『創意』。一提起創意大家就對號入座。」兆基只辦中四以上的課程：「他們一入來，其實未夠料子去做設計，第一件事應該先幫他們洗腦， back to basic。由學生們自己設計和選擇，好明顯他們只會翻吓潮流雜誌，借用品牌的元素……」現代書院的校服在他眼中正是日、韓和 MK的混合物：「不過學校是一個 package，校服以外還有歷史、校風等。一睇見那些廣告，都不用再睇校服。如果男友去 Bathing Ape排隊，你都同佢分手啦！完全是 o靚仔主導， o靚仔鍾意 MC Jin就搵佢賣廣告……」由 MC Jin rap住來唱的其實是遵理，但星級名師的大頭掛在銅鑼灣，其實間間都差不多。
校服+潮流得人驚 放大圖片 
■阿徐一手捧紅的 MBT膠鞋，其實跟行山的凉鞋咪差唔多！
校服有趣之處在於「持久」，「與別不同」和「今期流行」當然不在考慮之列：「校服應該是你 20年後在街上仍然見到、可喚起記憶的東西。加入潮流元素會好得人驚！而且近年天橋上根本沒有美藝可言……」明明唔靚又拍爛手掌，因為時裝界好腐化：「所有藝術都有 serious critique，唯獨時裝沒有。徐濠縈那對鞋（編按：指 MBT）醜到暈，一樣成街人着。」周街「阿腿」因為我們都缺乏安全感，只能跪拜權威。要同學們穿得自豪，又不「順應民意」，當中會有落差乎？「一定有，但不能折衷。只有做真實的事才不會後悔。而且 o靚仔們的眼光到明年已經變了。」開校三年以來，用家反應良好，出外用膳往往得到其他學生投以羨慕眼光。唯一問題是食肆的老闆永遠不認得他們，食學生餐要出示學生證！
改裝三式
放大圖片 
■染髮是所有學校必禁！但仍有很多人堅持染少少深啡色。天生棕髮的，反而會被要求染黑，好矛盾。
放大圖片 
■頭飾的尺度有鬆有緊，但有些學校連辮仔紮得鬆都唔得，檢查時還會「扯辮仔」，放學梗係打散頭髮。
放大圖片 
■風靡一時的大象襪已消失，取而代之是男生愛船襪；大象襪還可強行掹直，船襪被發現就無所遁形。
青葱歲月最令人回味，天天貼身的校服已有無盡故事，縱沒當今紅藍黃如時裝騷般的制服誘惑，縱只得藍白灰齋爆三色，但八十前校服一樣精采。今時今日，陳淑莊、涂謹申、白韻琴細數校服儀容往事，會心微笑，且看能否勾起你多少回憶。記者：葉雪芯攝影：陳陶鈞（部份圖片由被訪者提供）
陳淑莊：我自己熨校服！ 放大圖片 
由幼稚園讀到中七，陳淑莊皆在嘉諾撒聖心書院度過，「我最拿手熨校服，一定唔會假手於人，連阿媽都唔准掂，熨嗰陣連望一眼電視都唔敢，因為驚會熨燶，校裙褶我會熨到啲骨好直，返到學校坐低都會好小心，唔想整皺，一定會掃裙坐，習慣成自然，到家着裙我都一定會掃一下先坐低。」當年校風極嚴，個個學生都好守規矩，紅呔白裙，長髮一定要紮起，禁絕一切手鏈戒指等飾物，「每朝早會，老師、訓導主任會檢查校服儀容，試過有同學剪咗 Punk頭返學，俾訓導主任即場剪咗佢前面撮頭髮，好驚！嗰位同學之後要戴假髮返學。」學生哥最討厭的，應該是風紀，明明大家咁高咁大，但偏偏風紀卻可拿住雞毛當令箭，這類「三煞位」陳淑莊也當過，但她說自己是比較大仁大義，不會隨便拿同學開刀，「如果同學屋企有白事，校方批准可以唔戴紅色校呔。有次我見到同班同學無打校呔，又將件冷衫着到好高，我以為佢屋企有白事，所以畀佢入校門。早會前，我忍唔住問佢係咪屋企有事，同學好詫異，先省起自己無戴校呔，趁早會未開始前即刻陪佢去學校小賣部買番條呔，有驚無險。」
放大圖片 
■中六，陳淑莊輕輕地反叛起來，吹了一個李美鳳頭。
乖還乖，但少女始終反叛愛玩，「放學經常同同學打保齡、睇戲、踩單車，着校服就一定出唔到蠱惑，所以一定會帶衫返學校，放學大變身。當年好興買好大件冷衫，着到鬆泡泡咁好似有型啲。我哋着白色裙，校裙好透，但我哋又唔鍾意着底裙，又唔知點解我哋好似特別粗魯，鍾意坐地下，所以會着單車褲，一拎起條裙就坐得低。有部份女同學特別姿整，着住條又長又闊嘅校裙覺得好老土，所以會改裙，最多人就係摺起條裙，再搵腰帶遮住。」
放大圖片 
■油麻地官立中學司徒華，十六歲的他帶點青澀味道。
放大圖片 
■（左）香港華仁書院林瑞麟，與現時一臉福相比，原來中學時是瘦仔。
放大圖片 
■（上）香港華仁書院……認得他嗎？他是李克勤。
放大圖片 
■九龍華仁書院梁家傑，高材生一名，涂謹申說他穿校服外表成熟有威嚴。
放大圖片 
■（前中）香港華仁書院曾蔭權，九一分界，少時少煩惱，特首頭髮何其多？
放大圖片 
■嘉諾撒聖心書院小儀，樣子幾可愛！
放大圖片 
■喇沙書院森美，曾說今時今日穿起校服依然感驕傲，這就是歸屬感。
放大圖片 
■紅呔紅腰帶白裙，是聖心女的標記。
白韻琴：真光長衫最有女性美！ 放大圖片 
訪問白韻琴，希望她能提供一兩張少女校服相，白姐姐一臉可惜：「全部校服相都俾我養父拎晒返去加拿大，家喺香港一張相都無 Keep。」講起校服，她也有不少回憶，「我讀過兩間中學，路德會協同中學同聖保祿女中，兩間學校套校服都唔算係我最鍾意，我最欣賞係真光套長衫！好有女性美，又斯文，仲有新法書院嘅水手裝，都好 In！」別以為她形象出位又大膽，學生妹時代一定是反叛少女，白姐姐說：「自問我算乖嗰一類，從來都循規蹈矩。」長髮一定紮起，就連校裙也不敢改，「當年校風純樸，而且校規好嚴格，訓導主任日日企喺門口捉曳學生，不過始終係女校，女仔都好姿整，會 Gel頭，又會綁吓蝴蝶結咁啦。」
放大圖片 
放大圖片 
■白韻琴曾經就讀過銅鑼灣聖保祿女中，但愛新法書院的深藍色水手裝。
涂謹申：我哋好薯頭薯腦！ 放大圖片 
男生校服無古怪，尤其在扑扑齋男校，沉悶是應份，就讀九龍華仁書院的涂謹申說：「我哋讀男校好悶喎，完全唔會玩嘢，正路到不得了！」唯一令他「有啲嘢講」的就是髮型，「當年流行電影《油脂》，好多同學都會模仿男主角 Gel個飛機頭，不過我哋個個學生都好識自律，可能乖得滯又薯頭薯腦，所以學校都唔會管得好嚴，適可而止。」九龍華仁出名出高官，涂謹申說不少高官議員都是他師兄，各人穿校服都有不同味道，「梁家傑早我兩屆，佢讀書好叻，外表比較老成，着住校服校褸上台領獎演講有種嚴肅感覺；謝偉俊都係我師兄，不過佢係網球隊，校服 Look高大威猛靚仔，係風頭躉！我呢啲好薯嘜，唔識打扮，十年如一日都係黑框眼鏡。」平凡中總有不平凡，九龍華仁書院校服中獨特的 Fashion，涂謹申說可能是各種課外活動和會社的鐵章，「唔同課外活動都有佢自己特別一款鐵章，大家都會收集好多鐵章，最鍾意扣喺校褸領或者書包， Show off一下自己。」
2000年，劉嘉玲、上山詩鈉與關寶慧一眾女星參加「 Back To School」派對，被批評破壞校服形象，校服，還是應如涂謹申般，穿得越薯嘜越好。
放大圖片 
放大圖片 
林松坡：穿校服有歸屬感！ 放大圖片 
上一代學生整齊嚴肅，舉止儀容一絲不苟，新一代學生穿校服，則最緊要夠潮。見證校服進化歷史，不得不提五十多年老字號的「金綸服裝有限公司」，創辦人林松坡說：「呢個年代，好多新學校好似要專登討家長歡心同埋注意力咁，遷就晒佢哋品味，部份新學校校服尤其講求花巧款式，顏色又多，近幾年特別流行粉紅、黃、粉藍等顏色，格仔、條紋都好多人鍾意。以前校服無咁多花款，好樸素，多數係藍白灰淨色，雖然係悶啲，但校服一着上身，學生就自然產生一種歸屬感，學生品行都會好啲，做人處事都會沉穩番些少。傳統老牌名校校服無乜變動，例如拔萃女書院，對校服要求好嚴謹，每條裙長度必定喺膝頭對上一吋，唔能夠過長或過短。學校歷史悠久，人哋一望校服就知係邊間學校，所以唔可以隨便改變，學生都想俾人知自己係名校生，校服本身就係名牌代表，着上身就有一種榮耀感。」
放大圖片 
■老字號「金綸服裝」，為香港二百多間學校設計校服。
另一轉變，就是尺碼越做越大，「多咗肥仔肥妹，以前西褲尺碼最多做到 34吋，家 44吋！」金綸現時為超過二百間學校設計和縫製校服，包括瑪利諾、喇沙、聖士提反等名校，林松坡：「我比較鍾意名校校服，傳統無得代替，見校服即知尊重，有種約束力，唔可以太似便服，返學唔係出街玩，着住校服就係代表學校，係一個身份象徵。我鍾意旗袍長衫，學生動作唔可以太大，唔能夠周圍跑跳，個人會定性好多。」
放大圖片 
■新法書院的水手校服，人人讚靚，也出自林松坡親手設計。
放大圖片 
■長衫多數佩戴鐵校徽章，但領位經常刺穿，林松坡改良，加一個布圈，方便扣校徽。
放大圖片 
■拔萃女書院校風嚴謹，裙襬長度分毫不差。
放大圖片 
■現在的新學校校服，顏色豐富，多用格仔、條紋。
電影裏的校服
放大圖片 
■電視劇《輪流轉》，黃韻詩、鄭裕玲、李司棋與李琳琳穿上藍色校服，鄰家少女味滿瀉。
放大圖片 
■電影《為你鍾情》裏李治廷與文穎珊扮懷舊穿校服，林松坡：「當年咁樣着返學，肯定記三個大過。」
放大圖片 
■電影《喜劇之王》裏穿校服的張栢芝，短裙白襪黑皮鞋，加多條孖辮，非常制服誘惑。
留言列表
{{ article.title }}
