周星馳買咗帝通（8220）幾個月，早前套《長江七號》動畫票房麻麻，市場有人話，星爺做戲就叻，要佢營運間上市公司，未必係佢專長。好簡單，上市公司要講效率，年年派成績表，股東要求盈利有增長，以星爺嘅藝術家脾氣，隨時幾年都拍唔到一套電影，投資者又點會滿意？

不過，一言知道，星爺搵到商界傳奇人物梁子亨幫手，即將出任帝通行政總裁。大家可能唔知梁子亨係邊個，但佢十幾年前曾經搞過間經紀行叫做四○一，公司仲係上市，分店開到成行成市，一度挑戰中原美聯（1200）；點知佢擴展過急，適逢九七股市大跌，佢老哥準備喺股市集資一事又臨門失利，負債一度高達十億元。

別人負債咁高，都好難有機會翻身，當年有人話財經市場有個One Billion Club（十億元會），只有四個會員，分別係梁子亨、三商行主席賴雁浪、謝瑞麟老闆謝瑞麟同兆峰陶瓷李兆峰，個會唔係人人入到㗎，事關先決條件係要欠債超過十億元。

欠人咁多債，唔係咁容易翻身，特別呢啲大老闆，過去威慣，出出入入前呼後擁，要佢重新適應同振作係好難，你睇羅兆輝就知。但梁子亨唔同，鬥志十分強橫，腦筋又靈活，特別佢人際關係搞得好，得到幾位老闆支持；經過十多年努力鑽營，年前終於將所有債項償還，再度係一條好漢，仲搞咗間全港好知名嘅兒童補習學校，聽講話有機會上市添。

梁子亨花十三年時間搞掂欠債，終於可以無債一身輕。

周星馳要搞好帝通，決定搵梁子亨做CEO。

地產狂人捲土重來

類似梁子亨個案，喺國內都有一個，佢就係地產狂人孫宏斌。喺國內地產市場，老孫名字曾經響噹噹，名氣大並唔係因為佢擁有最多土地，而係佢老哥一度單挑中國地產教父王石，雙方出現罵戰，令市場為之側目。

孫宏斌廿幾歲已經係聯想（0992）高級管理層，係老總柳傳志左右手，有人講話若非老孫跟柳傳志鬧翻，後來聯想的接班人就唔係楊元慶而係孫宏斌。當年柳傳志好賞識老孫，點知傳出老孫有意坐柳總個位，結果大家出現衝突。有說柳傳志告發孫宏斌挪用公款，最後老孫被送進牢獄；出獄後老孫竟然可以跟柳傳志修好，更獲後者打本做地產生意，創立順馳，你話世事幾奇妙。

又好似○三年前某次房地產大款會議上，孫宏斌豪情壯語，話○四年順馳年銷售樓盤金額可達一百億元人民幣（下同），當年順馳年銷售才四十億，一年竟可以大增倍半，聽到嘅人都半信半疑；今日要賣百億樓就好容易，但七年前講呢個銷售金額，實在有點匪夷所思。就連與會嘅萬科老闆王石都直指老孫太過進取，要注意一吓風險，老孫就笑笑口回應：「王總，你總要給我一個希望吧。」

就係咁樣，孫宏斌贏盡眼球，之後佢仲不斷喺傳媒曝光，言論十分出位，被國內冠以狂人稱號。但因為擴展過急，借貸太重，剛啱國內調控樓市，原本計劃香港上市，點知滑鐵盧，答應投資的銀行又臨時縮沙，結果要將順馳賤價賣畀路勁（1098）。

以為老孫一沉不起，點知佢有打不死精神，舊年老孫將另一家自己投資的地產公司融創拿到香港上市，豈料個市唔就，臨上市前一個星期被迫取消。之但係佢老哥鬥志十分高昂，最近又捲土重來，一言收到風，話融創將會喺第四季在香港上市，今次佢仲搵到高盛做保薦人。