娛樂八掛大放送★

Jeana寸嘴又如何：證明我有腦！

何佩瑜（Jeana）寸人唔使本，係模都對她退避三舍！但除非心中有鬼，否則又何妨讓她發表偉論呢？Jeana一句：「會唔會係有人心中有鬼呢？如果講中佢哋，自然會聽出有嘢！」妙語如珠，抵佢寸得起！

好多謝傳媒朋友封我做「寸嘴o靚模」，我喜歡呢個名字多過甚麼「不倒胸」、「血管胸」，因為寸嘴係形於內，而個胸有幾大都係形於外，證明我比較有腦！哈哈！但我從來都唔覺得我寸囉！只係有嗰句講嗰句，呢個世界好多人鍾意將自己本性收埋，唔肯講真心話，我嘅言論都只係想同大家分享，好過顧左右而言他違背良心而行。

我就係咁，鍾意講真說話，如果其他人因為我講錯說話，畀我激親，可以Say Sorry！可惜從來冇人點對點直斥我不是！會唔會係有人心中有鬼呢？如果講中佢哋自然會聽出有嘢！講真，做人太圓滑真係冇火花！講千篇一律悶嘢大家都冇興趣啦！有火花熱鬧啲，唔通要等年初二放煙花先興奮咩？

上年寫真戰，我明碼實價擺擂台，叫所有出寫真嘅女仔上嚟挑機，當時我有請DaDa （陳靜）佢哋上嚟，點知一個都冇理我！其實點解唔可以一對一咁出嚟講，有乜對我唔滿意咪三口六面講清楚，永遠搞到好似隔空罵戰咁，真係唔鍾意咁！

寸DaDa係劇情需要

不過，我依然同DaDa仲係好Friend，大家見到彼此新聞會即時SMS對方，平日罵戰都只係劇情需要！呢個圈就係咁得意，戲裏當然要做戲，戲外更加要做戲，日常生活可能都係做緊戲，啲人成日講唔鍾意畀人話乜嘢食得鹹魚抵得渴，我覺得如果你唔抵得渴，點解仲要做呢行？個遊戲規則就係咁，一係就唔好玩囉！（明日待續）

Jeana憑火辣身材及一張寸嘴，人氣急升！

Jeana去年為寫真戰造勢，不惜花盡心思大搞噱頭！

Jeana（右）經常得罪人，但與DaDa的情誼依然不變！