女人十個着咗十個都怕老，尤其靠面口搵食嘅藝人同模特兒就更加。好似已入中女之齡嘅中模「賓傭」咁，講真，佢雖然唔算特別靚，但身材高䠷、氣質都唔差。可惜隨住年紀漸長，又眼見一大班後浪係咁湧埋嚟，你話唔驚就呃你。佢惟有不停諗辦法，睇吓點樣可以 keep住個面口。咁有咩計呢？唯一最快最方便嘅，就係打 botox囉，不過一樣出事喎。
喺模特兒堆有個二五衰衰咁問媽咪姐，有冇覺得「賓傭」近排好 cool呢？二五一問，媽咪姐又覺得係喎。二五話梗係啦，因為「賓傭」狂打 botox，打到成塊面硬到連眉都皺唔到，笑又笑唔出，所以惟有扮 cool囉。二五話「賓傭」最近誇張到唔止打面，連小腿都打埋，事關佢話小腿減極都唔瘦，行騷時唔好睇喎。由於佢係大客，嗰間美容中心不單將佢升呢為 VIP，俾個七五折優惠價佢之外，仲有意搵佢做代言人㖭。不過「賓傭」抱住「寧俾人知、莫俾人見」心態，有錢都唔賺一口推咗。不過佢仲慌死人哋攞佢嚟作招徠，警告店方唔好洩漏佢係呢間中心嘅客仔，否則法庭見喎。

arrow
arrow
    全站熱搜

    stinglife 發表在 痞客邦 留言(0) 人氣()

    E-mail轉寄