日式蒸籠 A4和牛$580/位
（兩位起）
可以揀 A4或 A5級（$680/位）， A4級宮崎牛雪花已經夠靚，不會吃得滿口油。侍應替我們捲好牛肉，不過菜絲太甜，反而蓋過牛肉味，牛肉蘸麻醬或酸汁吃，肉味更出。

試食王

豪吃岳少蒸籠

2013年02月28日 ~~ 第1199期香港《壹周刊》

林建岳投資的高級日本餐廳吟彩，單單裝修費已經二千幾萬，請日本設計師營造京都風格，大廚 Ando是香港日本領事館前主廚，更曾在京都的米芝蓮三星「吉兆」任職，實力雄厚。二月初剪綵， Janice Man、 Jocelyn低胸撐場造勢。飲食界中，近期氣勢佢最勁，高檔路線高級收費，對辦嗎？

鋪面窄窄的，入到去才發現鋪位很深，近門的甜品櫃、幾張四人枱、天婦羅吧枱，裡面仲有 VIP房，大老闆幫襯要 privacy，完全冇問題。多盞吊燈和開放式廚房設計，型格得來仍然似幫襯傳統日本餐廳，客人可以同廚師交流。兩千萬裝修喎，環境梗係舒服。
食物以日式蒸籠（ Seiro）為主打，關東煮、爐端燒、天婦羅亦是推介，另有 shabu shabu、和食、甜品等等，侍應建議試試每位$1,280的 tasting menu，可以吃勻招牌菜。我們決定散叫，打算小分量試多幾款，結果試了七款菜式，整體感覺水準穩定，就是高檔價錢應有的合理水平，不算特別出色。唯獨是日式蒸籠最精彩，木餐枱上原來裝有電爐，侍應端來逾一呎闊的兩層木蒸籠，先略蒸底層的野菜，然後放和牛於上層，再蒸一分鐘，捲着芽菜和椰菜絲吃，和牛油潤、菜絲清甜，而且全程由侍應代勞，服務一流。
禮貌十足，但溝通有問題兼甩漏，柯打的關東煮沒來，我們後來告訴侍應未試關東煮，結果重複了柯打，到埋單時我又走漏眼，付了雙倍價錢，百二元一客五件關東煮本來都夠貴的了，何況家陣二百四？菜式用哪種和牛、甜品有哪幾款，侍應理應一早知道的又不清楚。如果決心成為城中高級日本餐廳，這些瑕疵請盡早改善。

豆腐魚乾沙律$80
豆腐豆味香又滑溜，醬汁酸甜開胃，不過分量頗細。

天婦羅（八款）$258
款式由廚師發辦，炸漿夠薄，不油膩，碟上只沾有少許油。蝦鮮甜、賴尿蝦亦驚喜。

烤羊架$158
肉質軟腍適中，筋位燒得很香，調味稍為重手，啱送酒。不過其他爐端燒，例如雞串，燒得不夠香口，失望。

關東煮（五款）$120
湯底清香，蘿蔔入味，魷魚餅吃到魷魚粒，有咬口，芋絲、竹輪卷、日式香腸較普通。

日式蒸籠底層的雜菜很清甜，番薯、大葱、椰菜、南瓜等，全部新鮮，蒸來吃原汁原味。

評分

食物：★★★ 1/2
服務：★★★
環境：★★★★
價錢：★★

吟彩

地址：灣仔交加里 32-38號萃峰地下 3-7號店
電話： 2574 1118

飲食特務 B
一站食勻得獎台灣牛肉麵

如果你會為了吃而去台灣旅行，記得留意 3月 9日及 10日於荷里活廣場舉行的台灣牛肉麵節。請來十位「台北國際牛肉麵節」的冠軍大廚，例如去年清燉組冠軍晶華酒店、紅燒組冠軍皇家傳承牛肉麵，和三屆創意組冠軍 Q老大日本讚岐烏龍麵等，即席烹煮得獎菜式。 3月 9日中午 12時至 1時，更送出 100份免費試食。
同場加推特價台灣 package，包括 22套$1,699三日兩夜住宿五星晶華酒店，以及 110套$1,399四日三夜住宿連機票。

日期︰ 3月 8至 10日(3月 8日只設旅遊資訊區)
地點︰鑽石山荷里活廣場一樓明星廣場
查詢︰ 2118 8811
注︰捐款$20予港澳台灣慈善基金會，可換領麵食一份，換完即止。 3月 9日（ 1-7pm）/3月 10日（ 12nn-7pm）

復古派對
任飲懷舊雞尾酒

W酒店作為城中熱蒲點，今次和紐約珠寶品牌 Adornia來個 crossover，品牌為 W設計了一套 W首飾，酒店大搞復古派對，展示三十套鑽飾出售之餘，亦請來 Adornia兩位設計師到場， W首飾更加係大抽獎禮物！當晚侍應會一身復古裝束配華麗 Adornia首飾， cocktail也是 Clover Club、 Vesper等懷舊味道。$258可以任飲、睇首飾兼抽獎，記住著到十足靚靚 vintage queen。

日期： 3月 7日 7pm-10pm
價錢：$258/位（無限量供應復古雞尾酒）
地址：尖沙咀柯士甸道西 1號香港 W酒店 6樓 WOOBAR
預訂︰ 3717 2299