生意人好現實！
真實對白

鄭融及HotCha所屬的「星娛樂」唱片公司，最近因公司發生人事變動，搞到諸葛紫岐未婚夫、Neway二少薛嘉麟重執主權，又重金邀請金牌經理人Paco（黃柏高）做顧問。新官上任三把火，隨即以開源節流為由，向歌手開刀。
首當其衝是10年底加盟的吳日言（Yan），自加盟新公司後，由歌手轉型做節目主持，惟農曆年後，她突遭急召返公司「祭旗」，迫改無底薪約，Yan一怒下主動開口解約，公司卻1蚊都冇得賠，搞到佢無奈地話：「我份底薪只係同銀行小職員差唔多，咁都開刀，佢好不近人情囉！」


近排Neway二少薛嘉麟公私兩忙，將於3月20日於會展筵開120席迎娶諸葛紫岐，舉行千萬世紀婚禮。但另一方面又要在公司地震後大革新，自前董事總經理Kevin Wong合約屆滿後，二少重新揸大旗。

接job冇錢收
慘遭解約的28歲吳日言（Yan），於10年10月與「星娛樂」簽約3年，加盟後由歌手轉型做主持，喺now做主持算搵到食，更打算將派一首派台歌，卻突然喺農曆新年假後，被公司照肺。Yan曾向密友呻：「我份底薪只係同銀行小職員差唔多，咁都開刀，佢好不近人情囉！」知情者透露：「公司一路都冇投放資源落Yan身上，平時set頭化妝都係Yan自己出錢，甚至佢自己接到嘅job，公司都冇分佣畀佢，只係每個月固定出萬幾蚊糧，份糧都唔夠自己貼啦！」

賺唔到踢出局
據知吳日言對改約一事甚委屈，主動提出解約，公司不但冇挽留，更不斷迫她早日簽字解約，搞到Yan好hurt。上週五（24日），本刊於銅鑼灣撞見Yan獨自行書局，上前問她被炒一事，佢直認不諱：「我都有同公司要求，炒我要補一個月，但佢話冇囉！（去勞工處投訴？）我爸爸有咁叫過我，我話藝人合約同普通員工唔同，我都唔知點解……仲要咁趕，我仲有節目未完，做主持都有口碑吖……唉！好現實地賺唔到大錢就踢出局……要畀啲時間囉，咁我啱啱起步就要放棄，唉！生意人，在商言商，就係咁現實。」

教班做主持
據知Yan早前都有同王維基的城市電訊會面，亦有補習社出價30萬搵佢做代言及開班教幕前課程。 Yan透露：「係有同補習社傾過有關嘅嘢，話想我教啲有關幕前嘅嘢，例如主持方面嘅嘢，不過仲有好多細節要傾，等遲啲落實先啦！」吳日言除咗喺now主持《You Can Cook》教煮餸，遲啲轉型開班，可以叫《You Can Teach》，舊公司唔要你，大把人要嘛！

密斟過檔
上週三（22日），本刊於鯉景灣目擊吳日言同補習界名師Thomas Yan食飯，其中Yan更攞出電腦同Thomas一路傾一路食，似乎傾緊開班授徒之事。

拍補習天王開班
補習天王Thomas Yan喺補習界大有來頭，現職的「康橋教育」曾於10年動用過億，招聘最少9位補習天王，轟動補習界，而Thomas便是其中一位星級名師，Thomas大學主修工商管理，於補習社主要教商科、經濟、會計，好多學生慕名報讀。

做主持搵食
09年Yan開始喺now做主持撈得仲好，尤其上年9月開始拍前903 DJ喪Do男（詹志文）主持的《爆片王》，以搞笑惡搞冒起，除咗街頭扮嘢外，更有舔車胎、錫田雞環節，玩到好癲。

黃國桐律師：藝人合約可以推翻
藝人有時同公司簽嘅合約，可能對藝人冇保障，但據黃律師所講，其實好多時呢類藝人合約都係唔公平，可以推翻，黃稱：「最重要係所做事嘅性質，搞清身份睇清內容，即使簽咗合約都可以推翻，第二，如果藝人當時係處於壓力下簽的文件及合約，其實都有得推翻！」

解約一族
吳日言被炒就話係因為公司要節流，但相比起其他被炒的歌手，吳日言都算係最無辜的一個！ ####


冇得留低
農曆新年，「星娛樂」旗下的歌手仲一齊影賀年照，不過公司震一震，除咗吳日言、HotCha的Regen（上右二）及鄧芷茵（上左一）都冇得留低。《蘋果日報》圖片


愛將泵水
自二少回歸接管後要開源節流，但同未來老闆娘諸葛紫岐friend的關心妍，自加盟「星娛樂」，即有公司投放資源，幫佢出碟喺紅館開個唱，真係同人唔同命。


上週四（23日），本刊喺銅鑼灣書店見到吳日言，當日見佢積極研究有關教育及口才的書籍，睇嚟係為開班教做主持鋪路，增值自己。


Juno唔要吳日言將自錄的MD寄到各大唱片公司自薦，被麥浚龍的Silly Thing睇中，04年簽約成旗下歌手力捧，至05年約滿後吳日言遭公司解約。《蘋果日報》圖片


傅穎 09年10月傅穎與金牌大風因合約問題，搞到關係決裂，當時傅穎更向金牌大風發律師信要求解約，及與當時CEO陳輝虹隔空爆發罵戰。


周永恒 11年1月周永恆因爆TVB音樂總監鄧智偉大鑊而被炒，當時樂易玲指佢被炒原因係沒有派歌所致。


Regen@HotCha 11年7月HotCha成員Regen（張惠雅）因同陳法拉男友薛世恆傳緋聞而被炒，有傳係法拉棒打，放逐Regen去澳洲。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄