Eason 打救私竇密會謝安琪賤價過台灣求生快週刊 617期 @ 娛樂八掛大放送★

Eason打救私竇密會謝安琪賤價過台灣求生

繼早前傳出謝家兩個月零收入，幾乎要食穀種後，最近謝安琪忽然逃出生天，打鑼打鼓宣佈進軍台灣改賺台幣，兼揚言於下月底推出處女國語專輯。

據知，謝安琪成功另謀生路，全靠密友陳奕迅幫口，向環球高層黃劍濤打人情牌，公司先肯冒蝕錢風險搏一鋪。Eason更大方借出台北的私竇錄音室俾謝安琪錄碟，咁佢又會到台灣開巡迴演唱會，到時兩個大有機會在私竇見面。

而今次台灣之旅，盛傳環球只係包食包住，謝安琪斗零酬勞都冇，除非唱片大賣，否則隨時白做。

貴為「一年天后」，自去年《囍帖街》熱潮逐步冷卻後，隨而代之的就是走音、整容、扮大牌等負面新聞，令謝安琪人氣急跌，加上佢急於升呢，紅少少，即從月租四千蚊的大埔村屋，搬到月租兩萬八的比華利山豪宅，仲要養三架車、兩隻狗、張瞻同張繼聰，每月基本開支最少六萬。

減價求生

最大鑊係四大唱片公司同TVB反面，互相封殺，連張學友、李克勤都受影響，更遑論只係上緊位的謝安琪，佢仲慘到被環球點成爛頭卒，率先亮相有線、亞視，做TVB頭號叛將，被喻為四大旗下歌手中跟TVB最大仇口的一位。

隨曝光率下降，去年Show價高達五萬齋企、唱歌另議的她，從年初起已放聲氣話價錢有得傾，最新價係兩萬包唱歌，無奈依然令廣告商卻步，近半年間幾乎只能靠出席慈善Show、頒獎禮等僅得車馬費的工作維持生計，完全入不敷出。

Eason義助

工作陷谷底，老公又一樣倒霉，去年張繼聰推出的專輯《家和號》，有傳銷量勁唔掂，之後疊埋心水泊陳志雲碼頭入TVB做藝員，點知冇耐陳總就失勢，身為「迷暈黨」成員的張繼聰當然冇得留低，最近幾個月兩公婆一齊過沒有工開的日子。

雖則話舊年謝安琪又開演唱會、又拍廣告搵唔少，弊在上有高堂、下有老公囝囝，幾乎靠佢一個擔起成頭家，金山都食窮，眼見即將陷入絕路，唯有搵密友求救。

「早排阿Kay好愁，有次仲有人見佢公司冇端端喊，Eason一知道即刻搵佢傾偈，其實家公司咩環境，大家點會唔知，Eason就話上位冇所謂，阿Kay唔同仲要搏殺搵食，見佢香港搞成咁，Eason拍心口幫阿Kay過台灣。」知情人稱。

勇闖台灣

其實Eason同謝安琪識於微時，當年就係Eason將女方的Demo歌薦俾環球兼出盡牙力，謝安琪才得以順利加盟，佢自己亦話好感激對方提攜之恩，「我可以入環球，要多謝Eason將我歌介紹俾老闆。」