我會乖㗎嘞！呢兩個月。（設計對白）
老實講，以媽咪姐身為「首席非官方資深港姐評判」嘅眼光嚟睇，新一屆29位入圍港姐，論樣貌、身材同學歷，若然唔係攞番李嘉欣呀、郭藹明呀、郭羨妮呀嗰個年代嚟比，其實算ok囉！咁每年都循例有一、兩個新聞人物，今屆未入圍就已經有啦。登登登凳！佢咪就係當年「五虎」小生湯鎮業嘅姪女湯洛雯（佢阿爸湯鎮宗都拍過唔少電視劇同電影㗎！）未入圍，有「長腿郭羨妮」之稱嘅佢已經俾人爆料，又話整過容又話係蒲精同溝仔王，夠晒noise啦！雖然呢位靚女新聞多多，但相當輕易就入咗圍，無綫仲無派人同佢訓話㖭，好奇怪呀呵？
無綫高層暗提點
嗱，媽咪姐就八到，今年「殼王」陳國強首次以「新老闆」身份低調擔任港姐評判，佢冇正面表示支持邊個，但實情心中有數！據知佢曾經搵一位高層出面同湯洛雯講：「喺呢兩個月千祈唔好行差踏錯，唔好群太多其他女仔（佳麗）玩呀！」總之絕不能俾記者影到啲肉酸相。以我哋睇咗N年選美嘅經驗，真係用腳指尾隻指甲都可以理解到，下一句潛台詞應該係——「只要乖乖哋，三甲應該冇走雞」。講到咁輕易，全賴有名人爸爸湯鎮宗同三叔湯鎮業啦！係人都知曾志偉人面廣，同「五虎」鬼咁friend，湯鎮業開句聲，啲世叔伯實幫忙。而志偉同「殼王」嘅交情亦毋庸置疑，箇中關係，相信唔使再拆解喇啩！難怪早前湯鎮宗接受訪問時話明，七月中喺大連拍完戲就第一時間返香港支持阿女。講到咁實牙實齒，好似知道阿女一定唔會被out咁款喎。對於有殼王撐腰，周三（6日）湯洛雯現身無綫時，堅稱自己靠實力：「冇可能啦，我爸爸係沉默寡言嘅人，唔鍾意出聲，點會幫我。我叔叔同我好耐冇見，佢成日喺大陸做嘢，唔得閒。（唔喺香港唔等於唔可以幫你。）TVB咁大機構，好公平㗎，況且我相信我自己有能力。」而港姐統籌經理余詠珊小姐則語帶雙關暗寸湯洛雯必入三甲：「呢條選舉路其實好漫長，每一刻都有變卦，熱門唔等於會贏，佢係邊個個女只係一個先機，並唔係一個幫助。」咁，又睇吓點啦！
志偉三叔幫得手
眾所周知，曾志偉同TVB新老細「殼王」幾有交情，而湯鎮業、湯鎮宗同志偉在公在私都關係密切。幾年前，兩兄弟仲齊齊去北京撐獎門人搞藝術教育中心，坐正喺劉華隔籬㗎！
湯鎮業係無綫五虎之一，直至今日，仲有人講佢同翁美玲嘅一段情，呢位三叔最近仲喺微博明撐姪女，掂晒啦。
大家最記得嘅可能係湯鎮宗露股拍《現代豪放女》。不過佢洞悉先機，晨早北上拍劇，依家有兩層千呎豪宅揸手，喺大陸仲幾有face㖭！
守3戒入3甲
想入三甲，梗要下啲「苦功」嘅！乜嘢叫「唔好行差踏錯」呢？咪就係有3樣嘢唔做得囉！
1 No夜蒲
湯洛雯（右二）去港姐面試，即刻有人將佢啲夜蒲相擺上網。想入三甲，就要忍……兩個月嘞。
2 No食煙
英國倫敦大學畢業後，Roxanne（左二）返香港做model，不過以佢170cm嘅身高，真係輸一大截。矮，唔緊要嘅，最緊要唔好學埋模界壞嗜好——食煙啫！
3 No粗口
港姐梗唔可以講粗口，或者至少唔可以俾人聽到你講！所以，湯洛雯（右一）好醒，真係極少同其他佳麗傾偈，淨係同外表清純嘅「翻版陳妍希」25陳潔玲（右二）有兩句咋！ ####
湯洛雯雖堅稱父親冇幫佢，但年前湯鎮宗卻帶挈女兒上陣拍洗頭水廣告，咁都冇幫？
留言列表
{{ article.title }}
