幾好笑，好笑，真係好好笑……
這是應采兒鏡頭前、後，自動上鏈的連環反應。
也許，度假中，心情份外輕鬆；
也許，事業上軌道，生活無憂，唔笑就假；
但我想，有個聽話老公，至令她真正樂呵呵。
去年，跟陳小春於情人節完婚，今年，在微博擊退小三，大笑姑婆頓變河東獅；懶理外間說法睇法諗法做法，陳太瞪大眼講到明，自己惡底，面對女人死穴，啖氣更加唔忍得。
大婆萬歲！
Profile
Cherrie Ying
原名：丁汶
出生日期：1983年6月20日（雙子座）
出生地：台北
籍貫：山東青島
身高：5呎5吋
體重：110磅
語言：普通話、廣東話及英語。
簡歷：11歲，隨家人移居紐約。00年，參加美國華埠小姐選舉並獲亞軍，同年來港旅行，被朋友推薦參加中國星新人面試，被向華強太太陳嵐邀簽約，正式入行。10年，跟香港藝人陳小春結婚。
主要作品：電影《愛君如夢》（01），《嚦咕嚦咕新年財》（02），《柔道龍虎榜》（04），《喜馬拉亞星》（05），《撲克王》（09），《八星抱喜》（12）。內地電視劇《鹿鼎記》（07），《大捕房》（10）。
微博：http://weibo.com/yingcaier
依家唔捱得
06年，應采兒北上發展事業，轉眼間，6年了，很多港星索性搬上北京、上海，她隨着嫁人，計劃告吹，「老公冇諗（搬上大陸），我就唔諗。「婚後，多咗顧慮，唔係今日想買個袋、買兩對鞋就去買，多咗為日後打算，做事要有計劃。「冇理由為工作去搬。」平時口若懸河，講起老公，講起家庭，正經八百，我幾乎招架不住！今年，她只拍了一套內地劇，回港hea吓！「一直以來，我都冇乜野心，心態係搵到就搵，搵唔到就唔搵，好好彩自己一直有嘢做，平常心囉！「依家，為身體着想，冇咁捱得就真。「搵我拍戲，要去好凍地方，唔好，等3、4月暖啲再去；要去好熱地方，唔好，等9、10月涼啲再去，費事整壞身體。」陳氏伉儷恨生兒育女，是故，健康身體比財富重要，「過咗拼搏階段，唔係因為結婚，係因為……唔夠窮！開始錫身，窮嘅時候，比較搏。」原來，他們想組織大家庭，有福齊享，「有能力，大家庭幾好；「我係獨生女，好悶，生一個的話，我好緊張，生多幾個，重心分散，呢個唔得（成才）咪下一個囉！」一副少奶口吻，何不索性唔做，等老公養？「我鍾意內地工作，唔會冇得瞓，演員又重感情，收工後，大家一齊食飯、hang out，相比之下，香港比較冷；「我enjoy拍戲，冇諗過唔做。」
Cherrie's tips
Q：今季must have？ A：螢光黄飾物。 Q：買手袋有乜要求？ A：輕身。bauhaus牌子多，價錢唔貴，幾好用。
冇話老公啱晒
為了遷就內地各個政治高峰會議，新劇過年才上畫，這段時間，應采兒搞了一齣網劇《女人幫》，學做製作人。兩公婆長時間分開，國內人多、引誘多，擔心嗎？「把口講就話要信任，好難完全信，始終兩個人唔係成日見面。」咁點算？「科技發達，成日互相send相，你做緊乜、我做緊乜，瞓覺前、起身後，係好無聊，亦可以造假，但呢類交流令大家更加close。」維繫一段關係，全仗「珍惜」二字。早前，擊退小三，微博一役，陳太聲名大噪。「連佢都冇諗過我咁大膽公開去做呢件事；「事後唔少人留言『一個巴掌拍不響』，依家都冇事發生，我只借微博發洩一下啫！總不能對外鬧老公，要鬧都返屋企鬧，對外的話，梗係鬧唔三唔四啲人；「我冇話自己老公啱晒！」惡老婆形象從此深入民心，唔抵嘛！「我係惡㗎！我冇唔認！「佢對住狗仔隊好惡，我對住女人死穴，梗係惡啦！」這就是婚後最大轉變？「我最大改變，就係多咗為屋企着想。」
後記
返港放假，逍遙快活，攝時間拍廣告影吓相，有得賺就賺，夠鐘即閃，趕返屋企陪老公，「大家想見多啲，盡量減少工作。」有諗過同場合作嗎？「佢唔係好鍾意，連一齊做function都唔鍾意……」其實，一切老公為主的應采兒，暗啞底，一啲都唔惡，仲好溫柔㖭！
Shop List
80/20 大埔超級城A區2樓048-049號鋪 2667 2930 bauhaus 銅鑼灣駱克道496-498號地下至3樓 2838 6228 Elite 銅鑼灣時代廣場6樓623-624號鋪 2506 0280 Salad 尖沙咀彌敦道100號The ONE UG216號鋪 2489 8703 TOUGH Jeansmith 尖沙咀柏麗大道G8號鋪地下 2736 3809 ####
Cherrie Ying
軍綠色綴相片襟章布袋 $895 TOUGH Jeansmith
白色貓頭鷹圖案背心 $495
淺藍色綴白色羽毛牛仔短裙 $825
both Salad
all from bauhaus
螢光橙色背心 stylist's own
螢光織繩吊墜銀頸鏈、螢光織繩皮手帶
both Cherrie's own
10年由拍拖至結婚，二人均落落大方，甜蜜感染力爆燈。《忽然1周》圖片
11年拍內地劇《大捕房》反串男裝，都幾靚仔。《蘋果日報》圖片
留言列表
{{ article.title }}
