鬼叫你狂飛紙仔！（設計對白）
鄭秀文、劉德華與杜琪峯合作的新戲《盲探》，早於去年尾開拍，但遲遲未有完整劇本，「飛紙仔」情況相當嚴重，令劇中男女主角劉華及Sammi，怨聲載道。
據知Sammi曾因「飛紙仔」問題，與杜Sir吵過幾次。至於劉華，一早已訂下五、六月陪產及湊B大計，見新片埋尾無期，即私下與Sammi夾計。Sammi為了老友，不惜做醜人，向杜琪峯攞一個月病假，理由係耳水不平衡要休息。
《盲探》原本計劃8月完工，杜Sir面對超支好頭痕，但自己唔着在先，局住冇聲出。
鄭秀文、劉德華與杜琪峯的鐵三角組合，包括《孤男寡女》、《瘦身男女》及《龍鳳鬥》，全部大收旺場。本應合作無間的三人，最近卻因為新戲《盲探》而鬧不快。
其實《盲探》早於去年已開拍，但因杜琪峯同時要飛去天津兼拍《毒戰》，搞到《盲探》遲遲未有完整劇本。杜琪峯更多次在現場突然改劇本，令《盲探》飛紙仔情況相當嚴重，至今都未拍好一半。今年初，知道自己將為人父的劉華，為怕《盲探》延誤，打亂他的湊B大計，已經開始催杜琪峯交劇本。
有工作人員爆料：「拍《盲探》時，劉華一有空檔就打俾老婆，收工就即刻趕返屋企，錫老婆錫到燶。試過有一日進度特別慢，劉華終於忍唔住，同杜Sir講：『要快啲搞掂喇，我怕之後真係好難俾期你。』」
杜琪峯為免兩頭唔到岸，去年12月決定先趕起《毒戰》，之後才拍《盲探》。《毒戰》最終在四月底完成，而《盲探》就緊接5月底復工，對剛為人父的劉華來說，本來相當及時。豈料《盲探》仍然未有完整劇本，搞到Sammi同劉華兩位主角火都滾埋。
開槍戲導火線
工作人員透露：「上年開拍時，因為跳拍及劇本多改動， Sammi同劉華好多時去到現場都唔係好知自己拍乜。試過有一場戲講Sammi開槍打中劉華，但杜Sir拍嘅時候仲未度好場戲嘅上文下理，只係講咗句『我覺得咁樣好睇噃！拍咗先啦！』兩位阿哥阿姐惟有你眼望我眼。Sammi開始有啲脾氣，同杜Sir呻話唔知場戲要俾咩表情，亦因為飛紙仔，Sammi已經三番四次出聲以示不滿。」雖然未有完整劇本，但杜琪峯堅持五月尾開工，拍住嚟改。可是近日Sammi以耳水不平衡為由請咗個多月長假休息，《盲探》的拍攝進度於是一拖再拖。「Sammi同劉華私底下溝通過，兩人都認為搞好晒個劇本至開工比較有效率。Sammi亦好體諒劉華想多啲陪妻女嘅心情。其實Sammi耳水不平衡嘅情況唔算好嚴重，不過佢一心為老友爭取『產假』，於是咪將病情誇張，等劉華放多半個月。」養病期間的Sammi，清晨及晚上仍活躍上微博及facebook，看來本月下旬《盲探》應該有望復工，不過預期在8月完工就有點困難。本刊致電投資拍《盲探》的寰亞電影及東亞娛樂的發言人梁小姐，她說：「係Sammi親自向杜Sir攞病假，我哋都希望Sammi可以休息一個月。（咁8月埋唔到尾噃！）公司會體諒，因為咁而超支都冇所謂。（一拖再拖係咪因為未有完整劇本？）其實一早有完整劇本，只不過杜Sir精益求精，飛紙仔係佢嘅習慣嚟啫！但以佢哋三個嘅關係，飛紙仔係冇問題。」至於杜Sir電話未有人接聽。有電影公司撐腰，Sammi為劉華甘做醜人兼得罪杜琪峯，都可以大事化小啦！
最佳拍檔
《孤男寡女》收得，造就了劉德華及Sammi這一對銀幕情侶，兩人亦私交甚篤，乜都有偈傾。之後兩人拍杜琪峯執導的兩套電影亦大收，三部片香港票房合共收近一億元， 成為票房神話。
病都玩微博
6月2日深夜，鄭秀文自稱因為不適而睡不着，但由3日凌晨三時起，她就一連發了六個微博，最後一個更是早上十時發出。看來她雖然抱恙，但仍很有精力。
《盲探》似《神探阿蒙》
《盲探》講述偵探劉華在一次行動中視網膜脫落導致失明，因此被迫提前退休。他從一次銀行搶劫案中認識了女警員鄭秀文，鄭秀文發覺劉德華的聽覺與嗅覺非常敏銳，就請求劉華幫助她破案。劉華劇中為人麻煩，又多怪癖，和著名美劇《神探阿蒙》（Monk）的男主角十分相似。 ####
劉德華是愛妻號，在產前產後對老婆朱麗倩都照顧有加，自然想多些時間親近初生女兒。《蘋果日報》圖片
冧杜Sir補鑊鄭秀文都知衰，她見杜琪峯的《奪命金》包攬了大陸華語電影傳媒大獎的最佳導演、最佳男主角及最佳女配角，於是在微博上like爆，又轉載了杜琪峯的得獎照片。
面書賣口乖雖然病咗，Sammi都有更新facebook向fans報病情及多謝電影公司體諒。但從她的新相片看來，她不是太病啫！
留言列表
{{ article.title }}
