猛虎不及地頭蟲！（設計對白）
胡杏兒首次入圍中國華鼎獎「最佳女主角」提名，卻遇到最強勁對手孫儷，想僥倖成中國視后，應是零希望。
亞熱帶 無綫一姐胡杏兒近年頻頻北上搵人仔，成績出奇咁好，事關除咗袋滿人仔外，亦憑電視劇《怒火街頭》殺入上海「華鼎獎」（相等於外國金球獎），與林心如、王珞丹、米雪及孫儷爭視后。入得圍當然非等閒之輩，其中憑《甄嬛傳》角逐嘅孫儷，更被一眾影評人及傳媒吹捧為今屆視后大熱。
《甄嬛傳》喺中國贏盡口碑及收視，眾多女角如穎兒及蔡少芬，尤以孫儷飾演嘅甄嬛最為突出，將後宮女人嘅掙扎、無奈及悲哀演得淋漓盡致。本來已有「中國人氣王」稱號嘅孫儷，憑此劇人氣更升上高峰。
睇嚟胡杏兒要由「香港視后」躍登「中國視后」，難度係十級跳。
着「妓女」衫惹禍
人紅自不然惹是非。年前，孫儷着住胸前印有「HUSTLER」字樣T恤嘅相片突然在網上流傳，「HUSTLER」乃妓女之意，令她立即成為攻擊對象。月初，產後復出嘅孫儷接受訪問時，話收到朋友寄嚟嘅賀卡，上款寫﹕「祝麟兒……」孫儷就話佢個仔唔係叫鄧麟，又引嚟網友炮轟，話佢冇文化，「麟兒」只係代名詞而已。不過對於刻意挑釁嘅惡評，性格倔強、我行我素嘅孫儷一於好少理。正如她自己所說︰「出道整整十年，現在只想過自己嘅生活。2011年，由人妻到人母，係自己最有意義嘅一年。」30歲嘅孫儷，有事業、有家庭兼有囝囝，絕對係幸福女人人辦。反之首次角逐嘅胡杏兒，雖然同孫儷同年，但同黃宗澤（Bosco）就有排未「開花」，而爭獎都應該係陪跑居多。「香港視后」今勻真係五個字概括﹕繼續努力啦﹗
港產片檔案
孫儷走紅期間，獲韓國天王Rain邀請出任第一首、亦係唯一一首中文歌〈手記〉MV女角，之後亦陸續任潘瑋柏、羽泉等MV女角。她亦被香港導演陳嘉上及劉鎮偉睇中，先後拍過多部港產片。 ####
《甄嬛傳》口碑及收視都大豐收，作為女一號嘅孫儷（左），表現更一面倒獲好評。
孫儷和鄧超（亦為大陸一線小生）於2005年拍《幸福像花兒一樣》時撻着，兩人拍拖7年，於2011年 11月結婚。
3月中，孫儷和丈夫鄧超現身上海虹橋機場， 而其囝囝亦首度曝光。
孫儷為「中國愛心大使」之一，產後第一件事， 先到上海浦東醫學中心探望其資助做裂唇手術嘅BB。
身懷舞功絕技嘅孫儷（左一），未踏入演藝界時，曾經為趙薇（右）伴舞。
孫儷着上印有「HUSTLER」字樣T恤，慘遭網友圍插。其實T恤乃雜誌提供，真係寃枉。
留言列表
{{ article.title }}
