湯佬飾演rock友，每日練歌逾5個鐘，電影歌曲全部都係佢親自上陣。
以前睇湯告魯斯，唔係型英，就係帥靚正，而且一定係好人。乜好人真係咁好做？好人易做，但冇talking point嘛。睇吓貪曾日日見報幾有noise，你插一句我鬧一句，鬧得幾咁有共鳴。事實證明，一個角色成唔成功都係取決於夠唔夠突出，望下湯告魯斯新作《搖滾歲月》，佢一身妖爆rock友造型已經反傳統，仲要喺電影中衰事做盡，重口味得嚟相當有新意。
暑假電影片霸有兩套，一套《蜘蛛俠》，一套《蝙蝠俠》，假定兩套都冇追開，又唔係動畫粉絲，咁點算？好彩，仲有第三選擇：《搖滾歲月》。
Rock友本色
《搖滾歲月》美國下個禮拜上映，不過香港要等到8月先有得睇。冇得同步欣賞，惟有睇住新劇照啦。電影改編自同名百老匯歌舞劇，以80年代搖滾音樂為主題，講一對男女因發明星夢而走埋一齊，後來因湯告魯斯（Tom Cruise）介入而分開。湯佬難得放低正氣形象，飾演妖味十足嘅rock友，仲要係80年代嗰隻喎。不求脷疊脷影慾照咁in， 至少都要有兩條紋身仔啩。又假定劇情跟足音樂劇版本，湯佬除咗要大牌、臭寸、仲要大鹹濕，先色誘女記者再嗒女主角， 最後更因犯罪而潛逃國外。
繼續食老本
其實湯佬近年演藝事業確係一池死水咁滯，除咗《職業特工隊》系列稍為有啲叫座力之外，其餘《命運迷牆》、《華爾基利暗殺行動》有口碑冇票房，2010年嘅《戀戰特務王》更慘到雙失。今次《搖滾歲月》盡地一煲，某程度都係突破自己。如果觀眾唔buy，湯佬亦都唔使驚。事關佢未來將會拍攝《壯志凌雲》續集同埋《職業特工隊》第5集，兩者均係食老本之作，悶確係悶啲，但勝在穩陣。做人做明星都好，都係搵餐晏仔，但求有啖安樂茶飯食啫。 ####
故事背景發生喺80年代，角色造型頗為娘爆，唯獨湯佬較潮，皮草真空rock友look，今日都係咁着咋。
為宣傳新戲，湯佬罕有畫上假紋身，赤裸為《W》雜誌影相，50歲人，樣同身形keep得唔錯，望落頂盡40。
湯佬畫眼線油埋黑甲，形神俱備，導演更讚佢似殿堂rock友Keith Richards。
嘉芙蓮仙蒂鍾絲上兩年為照顧患上喉癌嘅丈夫米高德格拉斯，停工兩年。今次久休復出， 佢飾演市長老婆，以剷除搖滾為目標。
艾力寶雲（左），英國諧星Russell Brand（右）飾演酒吧員工，一唱一和，身負搞笑重任。
電影以歌舞劇為主題，導演就情商樂壇天后Mary J. Blige（右）客串夜總會老闆，大展歌喉。
湯佬飾演嘅rock友嫖賭飲蕩吹瓣瓣皆精，面對女記者即嗒糖色誘。女記者一角由二線女星Malin Akerman飾演，身材同樣都OK㗎（小圖）。
留言列表
{{ article.title }}
