Sam自言店鋪面積細，冬甩需存放在店內的餅架上，共約 20款供選擇。

創業通

可愛迷你造型冬甩　專攻少女客

2013年02月13日 ~~ 第1099期交易通．搵車快線

冬甩不一定是大大個、又甜又油膩，只要加點心思，也可以很 kawaii！今年 28歲的 Sam， 2年前自學製作迷你冬甩，把傳統的油炸冬甩，變成一個個猶如蛋糕口感的迷你冬甩，少油少甜之餘，配上繽紛可愛的賣相，由網上賣到開鋪，於去年 11月開業至今，短短 3個月，已成功俘虜許多少女芳心，日賣 400個冬甩，月賺約 2萬。

「嘩，好得意呀，個冬甩係貓仔嚟㗎！」「咦，呢個粉紅色都好靚喎。」位於旺角中心二樓的甜心冬甩，雖然只得約 30呎位置，但透明的凍櫃內，排列滿不同顏色，灑滿朱古力及糖碎的細 size冬甩，不少經過的少女均對冬甩投以注目禮，兼發出以上的讚嘆，老闆 Sam此時便趁勢 sell客。「我哋嘅冬甩每朝新鮮製造，𠵱家新張期間，買五送一，不如買啲試吓。」
店內冬甩約有 20款，全部只得直徑 3吋大小，比市面售賣的冬甩， size細差不多一半。面層有朱古力及糖碎，還有一些夾心款式，最特別就是有貓仔及熊仔兩款造型，售價由$8.5至$18不等，單是可愛外形已贏盡少女芳心，記者到達不夠 5分鐘，已有客人買了 6個冬甩。「我主攻 13至 20歲嘅少女客，所以款式會設計得可愛啲，同埋少甜同細 size，等佢哋唔會咁容易食滯，又可以試多幾款。」
想不到製作這些可愛冬甩的大男孩，原來在 2年前竟然是一個連杯麵都不會泡的人。「我以前唔識整嘢食，不過由細到大都想搞生意，可能因為爸爸以前做童裝生意，加上自己又讀商科。」由中六開始， Sam已租格仔箱賣精品，但一直希望能開鋪創業。「 2年前，同女朋友去深圳東門，佢拉我去間冬甩店食嘢，雖然我唔係好鍾意食冬甩，但覺得個氣氛好舒服同開心。」

黑白朱古力波堤（後）$8.5、草莓朱古力（前）$8.5，外形同樣搶眼，均是熱賣貨。

小貓及熊仔造型冬甩每個售$18
賣相超可愛，未來 Sam會再設計其他動物造型。

吉士夾心$9.5
冬甩味道似朱古力蛋糕，配上吉士醬更有口感。

冬甩充滿開心感覺

客人阿怡
我喺附近時裝店做 sales，見到啲冬甩咁得意，而且細細個，唔會太滯，成日都會買嚟食。

就是那種開心感覺，令 Sam想到開冬甩店，他先上網搜尋資料，發現香港少有專賣冬甩的店鋪，認為有市場空間。「我知以前有外國連鎖冬甩店嚟開鋪，但因為佢哋行中高檔路線，而且冬甩 size大又甜，根本唔啱香港人口味，搞到最後結業，但我覺得日本同台灣嘅可愛造型冬甩，好啱香港嘅女仔，只要外形夠靚，就可以吸引到佢哋購買。」
Sam為證明自己的想法行得通，便上網自學製作冬甩，更到朋友開設的麵包店做 marketing兼學做包，夜晚便鑽研冬甩。「最初我整炸冬甩，研究咗 2、 3個月，覺得味道唔錯，自己整個網站同開 facebook專頁，喺網上賣冬甩。」他一路改良冬甩，一路網賣，提供 8款冬甩，每個$8，由於冬甩造型吸引，竟然真的有不少人訂購，加上他沒有租金負擔，每月也賺到 5、 6千元。「當時每個星期有 2、 3日，喺指定地點同時間，同客人交收。」
那時候的冬甩只有圈圈造型，第一個貓仔造型，緣於一個男客人。「有個男仔客喺網上留言， send咗張喺日本食過嘅貓貓造型冬甩畀我，想我跟住做嚟送畀女朋友。」 Sam便嘗試製作，不過困難重重，「首先要解決個凸起嘅耳仔部分，加麵粉上去，好容易會甩，而且好難做到兩邊一樣尖角；用朱古力畫貓貓樣都好難，好似兩隻眼要一樣大，要苦練好耐。」最終 Sam想到把一粒果仁切開，便可做成兩隻耳仔。

購冬甩機製作方便

由於炸冬甩難做到個個 size一樣， Sam之後也沒有推出貓仔冬甩，直至 9個月前，他上網無意中找到冬甩機，就像焗格仔餅機一樣，可以用來焗冬甩，便為 Sam的生意帶來曙光。「部機一次可以焗 6個冬甩，幾分鐘就焗好，而且 size一樣，最正係焗冇咁油膩，又可以落少啲糖，做到少油少甜，更加健康。」
聽到有冬甩機，記者好奇想一試之餘，又替 Sam擔心咁容易做，客人又何需來幫襯他？「吓，你試到記得話我知，其實好難整㗎，我試咗好多次，要計準焗嘅時間、溫度等，又不停改良粉漿嘅分量，要個冬甩焗得靚，又唔可以黐住部機，都好有技巧㗎！」記者試食冬甩，質感和味道均似蛋糕，的確沒有傳統冬甩般油膩，而且可愛賣相已令人動心。
有了冬甩機後， Sam設計的款式更多，又再推出貓仔款，及設計出熊仔款。 Sam去年 11月，更與一位拍檔合資約 30萬開鋪，旺角中心是不二之選。「一定揀旺角中心，呢度好多少女客，完全中晒我哋嘅 target。我喺餅房造好運嚟鋪頭賣，所以唔使攞熟食牌照。」
但旺角中心鋪位要 6、 7萬，租金太貴，幸好商場有開放式位置，可以分隔出來，剛巧有店鋪停租， Sam便立即頂手，鋪位租金只需$35,000。亦一如他所料，店鋪一開，已吸引到不少少女客，又有不少傳媒前來訪問。

Sam每朝在工場製作冬甩，圖為吉士夾心。

旺角中心最多 90後女生逛街，人流勁旺，正是 Sam的目標客群。

一腳踢忙到冇休息

由於拍檔本身有正職，店鋪便由 Sam一腳踢，頭一個月忙到冇得休息。「我分租咗朋友嘅麵包工場做生產，購入 10部冬甩機，每朝 7點到 1點幾不停焗冬甩，跟住 2點前要運到鋪頭，再踩到夜晚 11點埋數，個人攰到散晒。」第二個月，他立即聘請 1位員工幫手做生產，又請來售貨員，才沒有那麼忙碌。
不過 Sam的辛苦很快有回報，雖然店鋪開業只得 3個月，已能日賣 400個冬甩，週六及日可賣出 500個，每月還接到 1至 2個結婚回禮訂單，每次約訂 200個，現時店鋪月賺近 2萬。臨近情人節， Sam又推出情人節禮盒裝，以心形盒盛載 3個冬甩，上面可替客人寫名及字，賣$128， 1月尾一推出，不夠半日已接到 5個 order，反應不錯，未來 Sam打算繼續推出不同動物款式冬甩及禮盒裝，「我仲想今年內開分店，𠵱家開始搵緊邊區有類似嘅商場，希望吸納到唔同區嘅客人。」