漫遊毒物

日漫惡搞新王　銀魂你好嘢！

2013年02月13日 ~~ 第299期 Face

《老表》扮嘢出位，一方面得罪網民狂接投訴，另一方面又收視爆燈，話題十足。
日本動漫界方面，《 Keroro軍曹》早已退役，惡搞王已由《銀魂》登基，連載 9年來玩盡無數動漫作品，癲足咁耐永冇悶場。
主角「阿銀」仲試過得罪日本政要，被迫停播、刪減片段。
最近推出遊戲《銀魂雙六》，喺半退休嘅 PSP上做出日本銷量榜第 7位，可見呢棵惡搞長春樹仍然相當好嘢，就趁呢個機會同大家解構一下呢股銀色魅力。

銀魂福祿壽

左起
銀時：天生一把自然曲白髮，愛食甜品。曾經係血腥刀客「白夜叉」，天人入侵後性格大變，棄武士刀改執木刀，從事「萬事屋」幫市民解決任何問題。
新八：武士家族後人，家道中落，姐姐轉職 PR知客，佢就去萬事屋做打雜。為人細膽冇大志，沉迷偶像。
神樂：宇宙最強戰鬥民族「夜兔族」的死剩種，不甘為黑幫作打手而跟隨銀時，說話非常尖酸惡毒。

動畫播放時間：
J2台逢星期三
10:00pm-10:30pm

機種： PSP
廠商： NBGI
類型：棋類迷你遊戲
遊玩人數： 1人
售價：約$399

唔係無雙！係《銀魂雙六》！

《銀魂》模仿日本幕末時代，卻將洋人黑船來襲扭橋做外星人「天人」入侵，變咗一個融合現代科技，又有幕末風俗嘅奇妙世界。今次出嘅 PSP遊戲《銀魂雙六》貫徹原作玩嘢性質，其實玩一款類似日式 board game「雙六」，由於個名同無雙相似，初公布時 logo跟足《三國無雙》，連廣告片都扮晒無雙。其實隻 game玩法類似《生命之旅》，擲骰行格仔，每格都會有失火或者升職等好運、惡運事件。優點係原作風格濃厚，雲集 300個角色，又有各種小遊戲穿插，唔識日文都會玩得開心。

遊戲包含咗大量原作故事，「金時篇」、「人氣投票篇」等受歡迎場面再現。

玩法似《生命之旅》，擲骰行格仔，每格都會有失火或者升職等好運、惡運事件。

初公布時宣傳扮晒《銀魂無雙》，角色黑影人馬疊疊咁出現，搞到一班 fans勁興奮，估唔到最後係出雙六，不過真係出齊咁多人，又冇老點你。

宣傳廣告初公布時話限定版附送女主角神樂嘅巨乳滑鼠塾，但神樂真身只係個平胸細路女，最後結果係乜嘢都唔會送。

搞笑絕技

《銀魂》其實有啲似周星馳啲戲，夠草根夠低俗夠無厘頭。概括綜合咗《銀魂》三大類搞笑方式，睇完應該會感受到佢喺一向講熱血、友情、勝利嘅《週刊少年 JUMP》入面有幾咁另類。

大師都敢搞

《銀魂》係《少年 Jump》作品，惡搞《龍珠》、《海賊王》都預咗，估唔到連《高達》同宮崎駿大師嘅《天空之城》都敢玩。

扮《海賊王》主角路飛，連船頭個獅子頭都變成《銀魂》搞笑角色艾利撒比斯。

因為動畫公司跟《高達》、《 Keroro》一樣，《銀魂》同軍曹一樣奉旨玩高達橋段。

最估佢唔到係夠膽玩《天空之城》，仲加入唔少成人笑話，但宮崎駿大師卻冇投訴。圖為神樂扮《天空之城》奸角麥瑞勤。

得罪女議員

名人都係惡搞對象。最大鑊要說到動畫版 232集，入面有一個同日本現任參議員村田蓮舫（原名謝蓮舫，有台灣血統）極為相似嘅角色，嘲笑佢招牌短髮之餘，仲有一幕用炸雞掉老太婆。有傳蓮舫秘書向監督投訴，結果動畫在重播時成集慘被河蟹。

該集劇情極之無厘頭，蓮舫經常出現但被主角們無視，最後用炸雞掉老太婆，都係冇人理。

現實中的蓮舫

低俗喜劇

「新阿姆斯特朗旋風噴射阿姆斯特朗炮」在《銀魂》中經常出現，外形就是兩個圓球加一支鐵柱。

《銀魂》（ Gintama）個名已不懷好意，其發音同日文睾丸「金玉（ Kintama）」極似，作品入面有極多黃色笑話。經典之一是屢次出現的「新阿姆斯特朗旋風噴射阿姆斯特朗炮」，外形極度猥瑣。但只玩低俗不玩色情，例如理髮篇入面，將軍大人被銀時等人用 X毛紮髮髻，完全不顧少年漫畫身份，低俗過彭浩翔。

騎呢魂精實體化

艾利撒比斯毛公仔
售價：$490(a)

論普及度《銀魂》唔夠《 One Piece》、《火影忍者》等大作紅，但佢就好似榴槤一樣，未必個個 like，但鍾意嘅人就會好鍾意，所以精品數目唔多，但大多數都好有心思，趣怪度爆燈。首推呢隻艾利撒比斯毛公仔（ 32cm高），個口可以打開，內藏大人 size毛毯一張，滿足 fans一窺呢隻神秘生物內部嘅慾望。

謎之生物抱在身

艾利撒比斯可謂《銀魂》嘅招牌吉祥物，佢係外星種族「蓮蓬族」嘅成員（跟得罪過嘅女議員蓮舫名字同音，唔通報復？），佢外表類似 Q太郎，永遠唔開聲，只會捧牌講對白，但外露嘅腳部卻布滿腳毛，亦曾經照 X光時照出大叔形狀嘅陰影，有如謎一般嘅存在。

口部可以拎出內藏嘅毛毯，舒適度不俗，當冷氣被用唔失禮。

細緻位係腳部位見到少少腳毛，跟足原作神髓。

重口味
男男攬枕套

銀時＆土方攬枕套
售價： 6500日圓(約$600)(b)

《銀魂》內容雖然極度麻甩，但出乎意料地受到腐女子歡迎，兩大男角銀時同土方更係唔少 BL（ Boys Love）妄想對像。呢個攬枕套前面印有銀時睡姿，後面就印土方，星期幾攬邊個由你話事，組織屬於你的《銀魂》後宮，亞馬遜日本網有售，可找代 bid店幫忙購買。

正經版 figure

除咗古靈精怪精品，都有正常嘅 figure。最新就有「 DXF figure大江戶武鑑」系列（約 10cm高），第一輯係男主角板田銀時同人氣投票永遠排第八嘅志村新八，要兩對一齊買，算係比較正經嘅銀魂精品。

DXF大江戶武鑑 figure銀時＆新八
售價：約$245一對兩隻(c)

Shop List:

(a)藍貓精品/旺角信和商場地庫
(b) http://www.amazon.co.jp
(c)精品玩具/旺角信和中心 2樓

淘之選
老翻動漫衣架夠惡搞

淘寶搜尋：人物衣架

除咗日本正版貨，《銀魂》人氣亦都有唔少國產無牌刀刀劍劍、各式精品。近期呢款人頭衣架就幾有爆點，掛咗衫之後好似同角色着衫一樣，有銀時同土方款，極之有愛。

淘寶有售，未連運費售 49人民幣，不過質素如何就難講。

Cosplayer阿翼：
玩得夠盡

玩開 cosplay嘅銀魂 fans阿翼鍾意《銀魂》玩得夠盡，完全估佢唔到。「最鍾意其中一個短篇講角色土方因為地球有禁煙令，搭宇宙船去第二個星球食煙，竟然去咗那美星，變咗為包煙打菲利叫神龍出嚟，成套《龍珠》畀佢玩勻晒，唔係一般惡搞講幾句對白做吓樣咁簡單。」

造型扮《龍珠》都事小，喺動畫講食煙話題，意識非常大膽。

《銀魂》支持者
Cosplayer阿翼