Geek友講場

脫毒情人節

2013年02月13日 ~~ 第299期 Face

仲有幾日就到情人節，情侶梗係 sweet sweet，只可憐一班冇女嘅毒男（高登稱呼「毒向左走向右走」更傳神），要喺呢個「毒男受難節」睇住人哋一雙一對，心靈真係會大受打擊， so sad！
不過，當日與其對住電腦芒獨自垂淚，兼夾唔敢上 facebook出 post（怕俾人恥笑你冇女），倒不如積極行動去脫毒！如果嫌 speed dating都唔夠快識女友，唔緊要，仲可以學日本毒男自拍扮拍拖，就算係假，都起碼自我感覺良好，喺情人節嘅網絡世界抬得起頭做人！

互動片段

極速約會介紹

像真度： 95%

情人節當日，若然你忽然喺 fb貼張咁嘅貼，背景係咁有情調嘅 cafe，枱面放住兩杯咖啡，而你就含情脈脈咁望住鏡頭，班 friend一定以為你有拖拍！但記住 po相時句 caption寫到太白反而似假，懶隱晦咁寫句「杯啡好 sweet」之類，就足以引到朋友出嚟抽水讚好。

假脫毒篇：扮 cafe談心

地主惠亮覺得日本情侶最鍾意喺 cafe約會，所以頭炮就諗到喺咖啡室自拍，香港亦通街都係 Starbucks，毒男隨時行落街就拍到，夠方便！其實成件事好簡單，重點係有兩杯咖啡，然後只需一部 DC同一支腳架就搞掂，腳架就係毒男嘅女友，事成之後，影 Starbucks咖啡就唔只代表「偽中產」，仲有偽拍拖嘅神效！

自拍拆解
明明一個人飲都要買兩杯咖啡，擺好位、 set好腳架再校埋 DC自拍 timer，再坐埋位展露一副甜蜜笑容就搞掂。唯一要剋服嘅，可能就係旁人嘅奇異目光。

道具入鏡
枱面仲可以放啲梳、粉盒、 hand cream之類嘅女人嘢，加強「女友」嘅存在感，但不宜太刻意，扮到唔覺意入鏡即可。

切忌舉手
就算你明明可以舉手自拍，都千祈唔好咁做，會有破綻俾人識穿你扮兩個人飲嘢㗎！

必加濾鏡
即使你用 DC影，影完都記住 load入手機，用 Instagram、 Line等 app裁成四方形同加 filter後先好 po，因為係女仔指定動作嘛！而且張相亦毋須影得太靚，隨意啲會更似女仔作品。

日本毒男爆紅

原創人示範作
即使個樣毒到地主惠亮咁，只要花啲心思玩自拍，扮舉杯畀女友都有人信㗎！

呢套扮有女自拍法，係由日本著名 80後宅男地主惠亮諗出嚟嘅。佢最先提出咗一套《一個人與女生在 cafe約會的自拍方法》，立即喺網上爆紅兼俾人瘋傳，之後就再創出一個人扮喺街頭攬女，同最近期嘅扮喺溫泉鴛鴦戲水自拍法。

扮情侶單車郊遊

地主惠亮冇耐前發表嘅最新一篇扮拍拖自拍教學，已經跳晒 step去到露天風呂同「女友」共浴嘅階段。一來香港冇溫泉，二來拍拖「進展」得太快都冇 friend信，所以呢篇唔啱香港毒男學，於是筆者提議毒男可以改為扮同女友一齊踩單車郊遊， po上 fb就合情合理合潮流得多。拍法一樣唔難，只係帶多部單車會論盡少少，同埋「腳架女友」又要出動喇！

像真度： 90%
呢張相重點係所有嘢都成雙成對，唔只單車要有情侶車，最好仲預備多個女裝背囊，不經意咁出現喺相中，暗示畀人知有女友在場。

自拍拆解
說穿了，又係靠 set腳架校 timer自拍，但係喺戶外太陽底下，腳架個影好易穿崩，睇位時記得要避。

到處留影
仲要去多幾處地方影，唔好影嚟影去同一個郊外背景，咁先似真係踩單車四圍去，冇咁易被識穿。

原創人去風呂
係人都知你本來冇女，情人節若突然學地主惠亮貼鴛鴦戲水相，可信性唔高喎，保守啲玩單車算啦！

兩個影扮情侶車

毒男怕煩唔想租兩架單車的話，其實仲可以出術！只要借助太陽光同閃光燈兩個光源，同時射落單車上，地面就會出現兩個車影，睇落都有情侶車並排嘅效果， po相時再配埋「隔籬個人踩到喘晒氣」之類嘅 caption，一樣有拍拖踩車 feel。

首先要擺架車喺有陽光嘅位置，地面自然會有一個影，跟住自己企喺同太陽照射方向唔同嘅角度，開閃燈影埋去，張相就會有兩個影。不過呢張相要影得靚，一定要用手動 mode，亦最好用外置閃燈「飛燈」去影，先至易就到車影方向。

影法拆解

完成圖
只要陽光同閃燈角度夾得好，兩個影就會分得好開，再試多幾次唔同光圈同快門，就會影到兩個 sharp影。

扮街頭攬女

地主惠亮仲有一篇教學叫《毒男也能拍出親熱照》，直頭扮埋喺街頭攬女，「女友」仲有部分身體入鏡，直頭有相有真相，所以屬於終極撒手鐧、毒到冇朋友嘅頂峰級數。之不過，閣下又唔係明星，唔會有狗仔隊跟你，點樣 po呢張相，要好花心思先有人信。最好就係買通一個朋友，叫佢扮喺你屋企附近見到你同「女友」纏綿，偷拍後 po上 fb再 tag你，再加兩句抽水 comment，咁成件事就似層層喇！

像真度： 85%
情人節朋友喺 fb貼相兼 tag你，相中你喺街頭一角攬住女友，佢個頭深情咁依偎喺你肩上，佢隻手喺你背上輕撫，成個情景 sweet到爆！只可惜一切都係幻象……

自拍拆解
轉個角度睇，「女友」嘅一頭長長秀髮，只不過係女人街幾十蚊一個嘅假髮，「女友」嘅纖纖玉手，其實都係你隻手；而所謂嘅偷拍朋友，當然都係腳架。

正面高炒
地主惠亮示範仲可以用呢個角度去高炒，咁你嘅深情樣就可以入埋鏡喇，不過要走上走落咁影，影多幾張會幾攰吓。

失敗例子
最大忌係影全身，因會見到「女友」冇腳；亦要留意假髮唔好舉咁高，同埋小心攬住自己隻手會露出衫袖。

3大注意位

要揀凹位
地主惠亮話揀拍攝地點好重要，最好係暗角或牆身有凹位，咁先扮到有嘢遮住「女友」，冇咁易穿崩。

刻意擋鏡
亦最好喺係人都知你成日去嘅地方影，否則朋友隨便話好偶然咁喺街撞到，就實在太 TVB劇情喇！刻意搵嘢擋少少鏡頭，仲會增強偷拍 feel添！

搽指甲油
地主惠亮仲話男仔手粗糙啲，幾易睇得出，所以絕到搽埋指甲油去扮，提高像真度，但其實有少少變態。

租假 fb女友

扮女友影完相，但用你個 a/c貼上 fb，始終都有破綻，好彩幫襯呢期爆紅嘅巴西假 fb女友網就可以解決。入會後，個網會有專人開 a/c add你，仲會出 post同你互動，收費就因應留言次數多少而定，例如畀 US$5就會分別喺 3日裏面得到 3次甜蜜留言。留言內容同假女友相片，仲可以由你提供埋，唔怕朋友一見係鬼妹就知係流嘢。
不過，若你想長包假女友， status仲轉埋同你「 in a relationship」，就要每星期畀 US$20。貴就貴啲，但起碼佢經常會 update個 a/c，比你自己開個假 a/c真好多。萬一你好似 Purple姐姐咁用錯真 a/c出女友 post就大鑊喇！

網址： http://www.namorofake.com.br

毒男平日行街見到啲得意景點，就算唔方便用腳架都唔好自拍，搵路人幫手影完，又可以扮係女友影，交畀巴西假 a/c幫你貼。

DVD對食

若你唔想貼扮拍拖相上 fb呃人，只求以後一條友食飯時有啲心靈慰藉，就要上日本 Amazon訂呢隻《吃飯時間》 DVD返嚟同你對食喇。碟入面拍咗 5位可愛女生對住鏡頭食飯，邊食邊閒話家常，閣下 play住佢嚟獨自食飯，感覺唔再孤單，簡直係治癒系恩物。

隻碟賣 699日元（約$60），𠵱家上日本 Amazon訂的話，仲有機會情人節送到㗎！

日本仲有毒男設計咗呢隻 iPhone dock碗，用嚟播《吃飯時間》一流，不過暫時未有購物網有得賣，毒男要再等吓。

真脫毒篇：拍拖由 Speed dating開始

地主惠亮嘅自拍法，雖然滿足到毒男幻想有女後會被人羨慕嘅心態，但亦有人覺得變相係自絕桃花嘅行為，令毒男永遠毒落去。毒男們，唔想再「每逢佳節上高登」的話，不如踏出家門，認真出去結識吓異性啦！
不過，一嚟就去相睇就突兀咗啲，最好由較 casual嘅 speed dating開始。其實𠵱家香港女多男少問題咁嚴重，好多極速約會公司都話男女顧客比例係 3:7，而且女性客人愈嚟愈後生， 80後毒男想搵女朋友，其實唔難！今次筆者就誠邀幫我哋扮毒男嘅 model Clive參加一次極速約會，兼且訪問埋 Speed Dating FEVER創辦人 Frankie，睇睇佢有咩秘訣傳授畀真毒男。

Winnie
22歲　 Marketing
Speed dating次數： 3
Comment：有人話過我咁後生唔使玩 speed dating，但我陪朋友去過一次之後，覺得同普通 gathering差唔多，好過去蘭桂坊，起碼啲人認真啲。

Clive
22歲　學生、兼職 model
Speed dating次數： 1
Comment：感覺原來幾輕鬆，冇想像中咁拘謹。

3大約會種類

Frankie話 speed dating有別於傳統 1對 1嘅婚姻介紹模式，佢間公司主要喺網上招收會員，客人只需經網頁填低簡單個人資料就可以免費入會，但資料唔包括擇偶條件。佢哋亦毋須逐個客人接見，只定期舉辦唔同形式嘅約會活動，畀合資格嘅客人自行報名參加，再逐次活動收費。而現時最受歡迎嘅約會形式就有以下 3種。

Speed dating
人數： 30-40（盡量男女各半）
收費：$300-$400
人數較多，參加者層面亦較廣。開始前每位參加者會獲派一張 form，然後 30至 40人輪流 1對 1交談認識，限時 5至 7分鐘，夠鐘就調位，直到每個人都同所有異性傾過為止。跟住每人填 form向負責人表示想攞邊個聯絡，或者唔畀聯絡邊個，最後由負責人畀聯絡各參加者。

Table for six/eight
人數： 6-8（男女各半）
收費：約$150（飯錢 share）
通常會指定畀某類層面會員參與，例如 Frankie話𠵱家最受歡迎係女仔 20至 29歲、男仔 25至 38歲兼擁有大學學位。成個過程就好似普通朋友食飯咁，大家傾偈互相結識吓，但坐定咗就唔會調位，期間會員可以自由交換聯絡。

主題約會
人數： 20-120（盡量男女各半）
收費：$300-$600（已包活動使費）
建立一個特定主題，以前多數係節日 party、遊船河之類，近年興埋品酒、整朱古力等課程，畀較闊年齡層面但興趣相近嘅會員，喺玩樂或上堂時互相認識，期間全自由活動，兼且可自由問人攞聯絡。

Frankie教路　毒男 dating必注意

談吐
「最多女仔 buy幽默，可以嘅話盡量展露吓呢一面。」另外，講嘢最緊要 make sense，有問有答，切忌問十句答半句之類。不過， Frankie見到啲怕醜仔唔出聲嘅話，都會主動問吓佢嘢，幫佢打開話題。

談話內容
事前最好準備定幾句簡而精嘅自我介紹，包括工作、興趣、性格等。「但如果你份工係整電腦咁悶嘅，就一句起兩句止好喇，仲可以講多啲女仔有興趣嘅話題，例如寵物。」

外表
Frankie話打扮唔使太隆重，唔好着老西， smart casual就得，但記住全身要乾淨企理，「 Gel吓頭、剃咗鬚先好去。」

加分位
「如果表現到 take care女仔，好似飯局中主動夾嘢畀人、問人凍唔凍之類，女仔都會好欣賞。」

切忌
收入、宗教呢啲話題固然唔好提，原來讚女仔靚都唔好。「你讚得一個，第二個會唔高興，全部讚晒又會令人覺得你虛偽。」仲有問人參加 speed dating嘅經驗都好危險，「萬一佢參加咗成年都冇着落，都唔知點答你好。」

Frankie間公司成立咗兩年，會員人數約 6,000，現今男女比例約 3:7。佢話絕大部分活動都係女性名額爆先，而且會出現 waiting list，萬一男性唔夠數，就會主動聯絡男會員參加。

脫毒 look　 Clive

成功例子說法

經 Frankie轉介，筆者訪問咗唔願出鏡嘅 Daniel，佢同拍拖半年嘅現任女友都係參加 speed dating認識嘅。「當時我大約一個月去一次 table for six，心態係 make friends多過 make couple。一次活動識咗𠵱家女友，開頭都係好普通咁 fb同 WhatsApp傾偈，都隔咗一段時間先一齊。其實當 speed dating係識多啲朋友，真係試吓冇壞。」

纜車 dating

雖然情人節好快過，但毒男們想脫毒都事不宜遲，嚟緊元宵海洋公園仲會搞個海陸空極速約會派對，畀 100位單身男女入場 speed dating，最特別嘅活動係有得喺纜車上單對單結識異性，夠晒浪漫！

海洋公園海陸空
極速約會派對
日期： 2月 24日
時間： 12:00nn-4:00pm
費用：免費
報名網址： http://www.sdfever.com.hk
截止日期： 2月 15日
查詢： Speed Dating FEVER（ 2961 4632）