拍拖睇樓
去年10月，黃伊汶被影到與男友陳國坤秘密睇樓，不過當日二人並無扑鎚，其實Emme早就睇中位於西貢千二萬單位，並於9月購入，原來睇樓只是煙幕。《壹週刊》圖片
好事近 近年淡出樂壇轉戰商界嘅黃伊汶（Emme），08年狠撇花心舊愛余文樂，斬斷五年情。不過甩拖半年，Emme跟翻版李小龍陳國坤（小龍）因拍劇火速撻着。
拍拖逾三年，二人戀情相當低調，連拉埋天窗，二人都秘密進行，據知去年9月，二人已聯名購入西貢千二萬豪宅作愛巢，今年10月將假W Hotel舉行婚宴。男友強國掘人仔儲老婆本，有錢女Emme嫁得過喎！
比黃伊汶大五年，現年36歲的陳國坤，早年扮李小龍為人熟悉，二人06年合作《功夫無敵》結片緣，當時Emme還未與余文樂分手。直至08年，小龍得知Emme回復單身，即馬上展開追求，低調拍拖。
家底懸殊
由歌星轉戰商界的黃伊汶出身富裕，已故父親是綽號「尖東之虎」的黄俊，母親開設美容院及酒吧。幾年前，Emme創立手表生意，轉做女強人；相反窮小龍陳國坤就要自力更生。雖由周星馳帶入行，參演《少林足球》及《功夫》等電影，但到08年被中央電視台選中拍《李小龍傳奇》，才因身手外形似李小龍開始為內地人熟悉，之後劇接劇，近年主攻國內市場賺人仔，最高峰年薪過千萬。小龍搏命搵，終於賺夠老婆本，買樓做愛巢。
豪宅氹女友
有傳去年小龍已向Emme求婚，二人隨即買入西貢近千二萬翠海花園、千四呎3房兩廳單位做愛巢。知情人士透露：「自從小龍同Emme一齊之後，都認定咗Emme，就努力喺國內拍劇儲老婆本同女友結婚。佢哋仲定咗今年10月喺W Hotel擺酒結婚，不過佢哋好低調，都係最近先通知至親密友。」對於結婚買樓一事，日前返中環美容院辦公室的黃伊汶就扮儍：「吓？我都冇話過要結婚。（聯名買咗樓？）唔好問呢個得唔得?」其後她再致電記者補充：「我哋感情好穩定，但就未有結婚打算！」好口密喎！
年尾輪住結
今年娛樂圈喜事重重，趕製龍B外，龍年雙春兼閏月，唔少藝人都選擇喺今年拉埋天窗，有人秘密結婚，亦有人公開大搞。由年尾到明年年頭，齊齊排隊做老襯。
10月倫敦結
許志安和鄭秀文的戀情拖拉近20年，10年太平館喫豬髀踢爆世紀復合，去年更大方同遊日本。今年10月，40歲Sammi決定在倫敦教堂下嫁安仔，結束愛情長跑。
1月擺脫7年咒
「蒙麵」拍拖6年，同係中女40嘅恨嫁蒙嘉慧不斷出招迫婚，終於令45歲鄭伊健答應明年一月娶佢入門，破7年之癢毒咒。
2月嫁玄學家
09年港姐劉倩婷與42歲失婚玄學家李丞責拍拖近一年，今年農曆大年初二李丞責為女友慶祝26歲生日的煙花船河派對上向女友求婚成功。二人年齡相差17年，但亦無阻戀情。 ####
唔好問得唔得？（真實對白）
避談婚事：前週六（2日），本刊於黃伊汶母親的美容院遇上Emme，問到結婚一事，Emme表示：「我冇話過要結婚喎！」果然低調。
搵老婆本陳國坤既係李小龍粉絲，亦因身手外形神似而為人熟悉。近年轉戰內地，早前與方力申合演《大唐雙龍傳之長生訣》。
最錫愛女黃伊汶母親陳麗貞投資有道，愛女對手表事業有興趣，媽咪落力教路，傳授賺錢之道。《壹週刊》圖片
微博晒屋一直收埋冇公開的愛巢，在去年10月完成裝修後，陳國坤忍唔住喺微博晒相，仲話係自己買，自己供喎！
上年9月，二人聯名買樓，黃伊汶以原名黃海慈（前名黃愷慈）登記，千四呎同居竇變愛巢，夠晒生小朋友。
位於圓方的W Hotel是唔少藝人擺酒之選，包括早前洪天明及周家蔚，酒席1圍由$13,000至$14,000不等。本刊亦曾致電酒店查詢，但酒店卻拒透露客人資料。
留言列表
{{ article.title }}
