7.6磅男丁Torres
Torres表情多多，不時眼仔碌碌四圍望。千嬅說Torres最鍾意笑和唱歌，榮升老豆的丁子高，望着囝囝流露出一副慈父樣，而千嬅剖腹產子後，經過數天休息，已回復精神飽滿。
自嘲大肚似叮噹的楊千嬅，上週二（5日）誕下7.6磅巨B仔Torres，原本預產期為6月18日，但千嬅體重已超標，醫生建議提早開刀。由於傷口太大，千嬅唞足4日先可以落床，返屋企仲要坐月坐足60日。千嬅直言︰「個傷口好痛，不過每朝見到BB，咩痛都值得。」
而Torres未出世，已有不少贊助商向丁生丁太招手，最重要的臍帶血亦有贊助，足足慳番近10萬。貪靚的千嬅，亦開始計劃坐月後的修身大計，希望最快7月底復出，最fit狀態「出山」。
早2星期開刀
千嬅佗住Torres時，個肚真係鑼咁大，懷孕期間暴脹近50磅，Torres未出世已知道是巨B，原本預產期是6月18日，但醫生建議提早開刀。千嬅說︰「其實已經足月㗎喇，比預期早咗少少，始終係開刀，傷口未完全復原，麻醉藥過後，個傷口好痛，但每朝見到BB，咩痛都值得。」結果早咗差唔多2星期生B。由於是第一胎，兼且38歲的千嬅已屬高齡產婦，千嬅非常重視坐月階段，打算2個月後才真正復工，千嬅仲請了一位專業陪月員傍住。她說︰「飲食方面都要清淡，所以陪月員會照顧我一日三餐，佢煮嘢食好好味㗎，佢每次煮完啲食物，我老公乜都要試食，好似頭先有碗豬肉湯，佢就一啖飲咗我3分1碗，所以Torres呢樣嘢最似佢爸爸，飲奶完全唔使擔心。」
學識泵人奶
千嬅在醫院已經開始嘗試餵人奶，留院數天都沒有真正休息過，每兩小時就餵一次奶。她說︰「聽人講餵人奶有助修身，都算ok嘅，返到屋企第一時間學識泵奶，留畀陪月半夜時餵BB，我先真真正正可以瞓幾個鐘。」雖然大家都唔擔心千嬅有產後抑鬱，但為免悶足2個月，父母同經理人每日都家訪，但平時坐唔定的千嬅，一見Torres就抱住唔放，又親自換片餵奶，對住BB，大笑姑婆都唔敢笑咁大聲添呀！
〈親〉歌詞
能親過親切朋友 夜半講心事還親暱得似情侶 偶爾親多幾次無論見識魄力過人親的仍然像孩子你很想詐嬌 當然可以
贊助送上門
BB仔用品出名貴，但Torres未出世，已不斷有奶粉及尿片生產商送上門，另外還有天然有機BB衫和日用品，就連預防妊娠紋的肚紋膏都有。
雞餐補身
鮮雞有豐富蛋白質，當年千億新抱徐子淇，第1胎坐月時狂食100隻雞補身，而千嬅生完Torres，亦以雞餐進補。家庭醫生關嘉美說︰「以前啲人話坐月唔可以沖涼洗頭，家坐月冇晒呢啲古老嘢，最緊要乾淨。其實都唔使特別去進補，正常食物含蛋白質、礦物質就可以，而孕婦產後嘅子宮，收縮需要6星期左右，（千嬅坐月）2個月都差唔多啦。」
冷藏臍帶血救命
今次千嬅最大手筆獲贊助，應是儲存嬰兒的臍帶血服務，即是在嬰兒出生時，於臍帶及胎盤所存留的血，臍帶血中含「零歲」的幹細胞，是人體製造血液及免疫系統的主要來源，因而可取代骨髓移植使用。陳慧琳都有為蝦餃仔和小籠包保存臍帶血，Kelly仲做埋代言人添！市面上一般臍帶血庫，儲存18年約8萬5千港元。
Torres除了成為丁家掌上明珠外，更是不少贊助商的對象，連唱片公司都陸續收到不同牌子的嬰兒產品，睇怕千嬅要用貨車先搬得走。
千嬅父母一直恨抱孫，如今千嬅一索得男，當然開心到見牙唔見眼啦！至於追唔追多個，千嬅就說︰「吓？等我適應吓先啦，我家先開始適應做媽媽呢個角色，呢啲慢慢再諗。」《蘋果日報》圖片
千嬅之前大住肚錄音，佢一路錄，Torres就一路踢。為宣傳新曲加精選唱片，千嬅最快7月底便會復工，其間亦會接拍廣告，唱片公司亦只會安排一些輕巧工作，旁為監製于逸堯。(網上圖片)
留言列表
{{ article.title }}
