被父母逐令離家，Christy上週回應時仍然口硬：「唔會同家人慶祝，因為慶祝又要食飯，嚟緊我要keep fit，唔可以鬆懈。」
任性港姐 經過第二輪淘汰，16位準港姐本週二（12日）啟程前往倫敦備戰，大熱門25號翻版妍希24歲陳潔玲和湯鎮業侄女28號湯洛雯不負眾望，雙雙入圍。
不過本刊收到消息，原來翻版妍希陳潔玲（Christy）參選時對人歡笑，背後卻因為堅持選港姐而同家人反面，更被父母踢出家門。Christy上週在活動後坦白承認：「我唔鍾意俾屋企人管！」
開時裝店、報稱做model的Christy，因為面形酒凹貌似女神陳妍希，氣質出眾而成為今屆大熱，之前她經營的旺角時裝店被投訴賣老翻，澄清後亦無損人氣，經過兩輪淘汰戰後晉身16強。
3大熱門返閨短聚
陳潔玲被父母逐出家門後，搬往將軍澳日出康城暫住，上週三（6日）在電視城進行首輪淘汰賽後，難得自由的她更帶埋28號湯洛雯及24號林泳淘（右）返日出康城。
提名人激讚
提名人Maggie：「佢願望係做編劇，入到TVB或者有機會實現。佢份人冇機心㗎，選港姐都係想有啲名氣後，呼籲人收養流浪貓狗會容易啲。」 Christy的提名人Maggie在旺角信和中心開鋪賣護膚品，她指Christy好有愛心且有意在娛圈發展。
寄居朋友家
但她的友人向本刊爆料，指靚女Christy原來早幾年已有意參選港姐，但遭父母反對，她惟有在截止報名前一刻，急求對面鋪頭的老闆娘做提名人。她友人說：「Christy出身小康，父母有自置物業，佢恨選港姐，直至入咗29強至敢同屋企人講，同父母嗌咗場交，話佢失禮家人、失禮鄰居，趕咗佢出去住。」據知Christy現時搬到日出康城寄居於朋友家。上週三（6日）一眾港姐在電視城出席淘汰賽，成功入圍的Christy回應時表現無奈：「屋企人唔畀我參加，但我又好想參加，咪喺deadline嗰日搵對面鋪老闆娘提名我囉。入咗圍至敢話畀屋企人聽，佢哋唔係咁鍾意囉，唔想俾啲鄰居見到我，所以我搬咗去同朋友住。（幾時搬返去？）或者選完之後啦！」連成功殺入決賽亦不親自通知家人，「佢哋有睇直播，其實佢哋知我好成熟，識得處理自己嘅事。（會返屋企見家人嗎？）遲啲吖，家好忙但有電話聯絡。（你同父母反晒面？）唔係，我哋關係幾好，不過我個性係鍾意做乜就做乜，唔鍾意俾屋企人管！」
合資開店
Christy與朱姓女友人合資的時裝店「DAISYOU」，位於旺角信和中心13樓，曾有顧客指買了日本裙後發現手工差，懷疑是冒牌貨，但海關到場視察後已證實貨品冇問題，照常營業。而她自參選後，已冇返回鋪頭睇鋪。
收養又捐錢
至於Christy的提名人，同樣在旺角信和中心13樓開鋪，售賣護膚用品，老闆娘Maggie指Christy愛心爆棚，收養了兩隻流浪貓，及經常捐錢到流浪動物協會，兩星期前才捐了1千元。Maggie說：「我覺得佢好靚女，早排台灣『關懷流浪動物協會』籌款，我口痕話如果有個名人做宣傳就好，啱啱睇到港姐廣告叫佢參加，佢仲話：『我唔夠靚，笑死人咩！』但截止嗰日突然叫我提名佢，我唔知佢屋企人唔畀喎。」選美啫，又唔係賣身，Christy父母唔使趕個女走咁激動吖。
上海風生水起 揭7號卞曉帆叔公係特務！
港姐唔只鬥樣、鬥身材，仲要鬥後台，28號湯洛雯有老豆湯鎮宗，17號張名雅亦有舅父張堅庭撐腰。原來 7號卞曉帆仲勁，出身富裕，太公汪祉繁民國初期在上海做銀行生意，叔公汪養然仲傳係中共特務。不過父母身份依然神秘，卞曉帆喺上海同人合資開咗間基金公司，更擔任市場部董事總經理，身家起碼成千萬，上年更創立智利紅酒品牌Afeccion，仲同智利駐中國大使好熟添！
如有各佳麗底細，請即打嚟9106 2799或電郵mailto:facenews@nextmedia.com。 ####
上年長髮吸客去年Christy為時裝店接受過訪問，當時的她留着長頭髮，但睇落更似女神陳妍希。
孖住湯洛雯 Christy參選後認識同樣是大熱的湯鎮業侄女湯洛雯，2人唔單只回家短聚，港姐進行內部面試時已經黐到實，非常老友。
爆緋聞近日傳出Christy認識導演彭發（紅圈），08年更曾跟隨《風雲II》大隊往泰國，Christy回應時表示讀書時認識彭發，但已很久沒有聯絡。《蘋果日報》圖片
上年9月卞曉帆接受上海版《姊妹》訪問，除咗賣靚樣，仲講吓紅酒心得。
本刊收到讀者電郵報料話卞曉帆太公係汪祉繁、叔公係汪養然。本刊翻查資料汪祉繁係民國初期上海銀行家，汪養然仲堅，傳佢借商人身份，70年代當上中共特務，不過卞曉帆就冇回應。
今年5月卞曉帆出席香港舉行嘅Vinexpo Asia-Pacific 2012，仲同智利駐華大使Luis Schmidt，據聞二人相當稔熟。
卞曉帆同朋友開設嘅開開門(上海)股權投資基金公司，地址喺浦東新區上海銀行大廈，公司對住地標東方明珠電視塔，應該好貴租。
留言列表
{{ article.title }}
