每個女人總渴望男人知道自己心聲，想要乜就有乜。其實唔一定劉德華先識讀心體貼女生，近日再戰江湖搶豪房市場的 SAAB 9-5，推出全新 Vector 2.0T版本，比起 Sport版的 Aero Turbo XWD更低油耗更低車價，識得慳家呢一點就已經最明白女人心啦！記者：許維雅攝影：林栢鈞Model： Suki@GME Models
平版車價慳更多
每次提起瑞典汽車品牌 SAAB（紳寶），只顧回味九十年代紅極一時的 900開篷跑車，令人不禁欷歔。時移世易，幾經辛苦重新振作力保江山，早前推出的豪房 SAAB 9-5 Aero Turbo XWD誠意十足，飛機概念設計帶來不錯驚喜，而香港代理則乘勢追擊再引入 9-5 Vector 2.0T版本。 Aero屬頂級 Sport版，差不多 Full Options，今次呢部 Vector 2.0T屬輕次一級的豪華版，加稅前的兩者差價係 11萬，財爺加稅後仲要拉闊距離至 11萬 8千。不過 Vector 2.0T當然無咁足料，少了電子避震、四輪驅動及投射式錶板配備外，亦由 19吋輪圈改為 18吋，但即使車身（長闊高 5,008× 1,862× 1,467mm）的尺碼唔細，但 18吋輪圈其實已經襯得起；至於四驅及電子避震喺香港難發揮，其實只屬奢侈品。惟獨欠奉的投射式錶板就有點可惜，因為揸車時可以望住車頭玻璃觀察速度始終會方便啲。若然係女人揀車，睇見兩個版本的車身設計及內櫳鋪排幾乎一樣，還有我最欣賞的流線型圓渾車尾、串連左右尾燈設計的煞車燈及 Night Panel航空夜用儀錶功能等都一概保留。
放大圖片 
■霧燈框少了電鍍邊，但設計依然吸引。
放大圖片 
■尾喉跟 Aero不同，設計隱藏於車底。
放大圖片 
■黑白鴛鴦色的側鏡好有型。
放大圖片 
■覆蓋全車的一字形尾燈煞食到暈。
放大圖片 
■沒有四驅，只有前輪的 18吋多輻式合金輪圈驅動。
放大圖片 
■ SAAB 9-5 Vector 2.0T配上白色車身，令房車變得更有活力。
油耗每公里$1.36
細佬 Vector 2.0T跟大佬 Aero的另一分別，就係引擎由 3公升 V6改用 2公升直四雙渦輪增壓引擎，馬力減少 80匹降至 220匹，扭力由 400Nm減至 350Nm，不過起步及加速表現的分別確實唔算太大，皆因向來 Turbo引擎口碑不俗的紳寶，打造呢架全新 Vector，引擎低於千幾轉時已即啟動 Turbo，力量釋出依然覺得澎湃，加上六速自動波箱換檔平滑暢順，唔會感到有突兀的 Turbo Lag情況。若然試完車後，真係覺得力水唔夠滿足你，仲可以加約歐元$1,000（約港幣$10,000），將馬力由原廠幫你提升至 260匹，跟 Aero的分別只收窄至 40匹，最後埋單都依然平 10萬元，呢條婆仔數係男人都識計。至於操控方面，高速入彎的穩定性當然難以同四驅的 Aero相比，不過感覺紮實的底盤及靈活的操控，仍然帶來極佳的穩定性。凡事有兩面睇，動力及性能稍遜的 Vector更得女人歡心，因為油耗比大佬低，據廠方提供數據， Vector的油耗只需 9.1l/100km，而 Aero就需要 10.6l/100km，計一計每公升$15的油價，每公里可以慳$0.225，行長途時都咪話唔差得遠。
放大圖片 
■定速巡航按鈕設於多功能軚環之上，夠晒就手。
放大圖片 
■後座闊落程度中規中矩，設計簡約。
放大圖片 
■雖然少了豪華配備，但仍保留大天窗。
放大圖片 
■頗欣賞波棍的直立式設計，充滿新鮮感。
要親身驗證呢部全新 9-5 Vector 2.0T，可於本周末周日到九龍塘又一城 SAAB車展即場慢慢摸索，同場還有 9-5 Aero Turbo XWD讓大家比拼。獨愛旅行車的你，亦有 9-3X供考慮，不妨踏出認識全新 SAAB的新一步。日期：2月 26日 11am-8pm2月 27日 10am-8pm地點：九龍塘又一城 LG2
SAAB 9-5 Vector 2.0T
引擎： 1,998cc直四雙渦輪增壓馬力： 220hp/5,300rpm扭力： 350Nm/2,500rpm傳動：六速自動波連+/-售價：$567,632（已計算新增稅率）查詢： 2760 8668（合朗汽車） 
■車側線條未算得十分流線，但已勝過好多房車。
留言列表
{{ article.title }}
