散嗒 33D 女主播　霍啟剛上海呵番郭晶晶忽然1周 785期 @ 娛樂八掛大放送★

7月23日
返到酒店，兩人肩並肩步入大堂，態度親暱，睇嚟感情上絕對冇問題。郭晶晶警覺性甚高，似發現有記者跟蹤。

新鮮滾熱辣，近日有雜誌報道霍啟剛避開29歲郭晶晶，轉溝同樣29歲，擁有33D身材嘅台灣女主播趙彤。報道指兩人早於半年前已搭上。
唏，男人嘅嘢，又未結婚，食吓散餐好閒嘅啫。但講到結婚，喺國寶同主播之間，就算霍大少唔識揀，霍家都會同佢做決定啦！

況且，霍啟剛亦好識做，不時呵番郭晶晶！就上個月23號，霍大少又飛去上海探女友。當晚佢哋喺天平路嘅吉士餐廳撐枱腳，由7點零鐘一直食到9點至走，由司機送返璞麗酒店，之後冇見過佢哋出嚟。霍啟剛嗒散餐之餘又識呵番正印，夠晒聰明。
另方面，郭晶晶除咗「蜜」會愛郎外，仲有退役嘅迹象。周日（8日），中國跳水隊領隊周繼紅宣布，郭晶晶唔會參加11月喺廣州舉行嘅亞運會。嗱，以一個亞洲運動員嚟講，除奧運同世錦賽外，亞運就係第三大賽事。況且喺跳水方面，以亞洲嚟講，中國係全無對手，郭晶晶咁都唔攞埋塊金牌，係乜原因，大家心知囉！媽咪姐就認為，各位名氣界人士，做定人情都得咯！

趙彤來頭猛
今次被指為霍啟剛力溝嘅29歲趙彤（原名趙婉汝），擁有33D、23、34嘅惹火身材。佢04年由台灣嚟香港工作，曾喺華娛及東亞衛視做主持。亦曾喺《金錢帝國》、《我老婆係賭聖》、《七擒七縱七色狼》同埋《神搶手與智多星》等電影演出。去年更喺「華語主持群星會」中奪得「十大風采華語主持獎」。
感情生活方面，有傳佢同新世界集團主席鄭裕彤長孫鄭志恒拍過拖。

朱玲玲撐「剛晶戀」
霍啟剛同郭晶晶相戀近6年，身為媽媽嘅朱玲玲一直保持開放態度。上月尾佢出席好友羅寶文新書發布會，被問及兒子嘅婚訊時，佢笑不攏嘴咁答：「拍拖係佢哋私人嘅事，由得佢哋自由決定。不過身為媽咪，都有關心過佢哋，但唔會向你哋公開！」朱玲玲雖然冇講到明，但憑佢嘅態度，明顯好滿意「剛晶戀」啦！

戰績彪炳
郭晶晶喺1996年，年僅15歲就參加亞特蘭大奧運，直至08年北京奧運，喺4屆奧運中，攞到4面金牌2面銀牌，成為奧運史上第一個喺跳水項目攞到6面獎牌嘅女選手。
歷年來，佢除因傷患外，從未缺席世界大賽。所以佢今次唔跳亞運，內情的確耐人尋味。

同晶晶撐咗兩粒鐘枱腳後走人，霍啟剛即俾貼士給代客泊車。