割開乳暈塞4磅矽膠直擊 8億拿督女莊思敏整假大胸隆胸三大法忽然1周 785期－娛樂八掛大放送★

在今日「事業線」充斥的娛圈，欠缺驕人身材的女性，要成功好似好渺茫，因此不少自以為樣貌和體型也差人一大截的港女，打爛沙盆尋求各種變臉豐胸方法。
現年30歲的馬來西亞拿督女莊思敏，就選擇一次過在乳暈開刀塞矽袋隆胸和勾雙眼皮，賺六位數字擔任隆胸代言人，公開整個驚心動魄的隆胸過程。她說：「整得就預咗俾人知，冇諗過要瞞！屋企有錢還有錢，從來冇過我手。我想話俾人知我係有心喺娛樂圈撈。」

上周四（5日），莊思敏在隆胸手術的前一日，在酒店的咖啡室接受本刊記者訪問，她說：「我依家好緊張，我考慮咗半日就簽約做隆胸手術，冇諗過愈近做手術嘅時間，反而會愈緊張，不過我唔會反悔。」

隆胸三大法
莊思敏今次接受的隆胸手術，是在乳暈底部開了近一吋的切口，然後在每邊乳房植入預先準備好的適當矽膠，令其胸部升大兩cup，整個手術費約9萬元。其實除了在乳暈開刀外，現時的手術還可以選擇在腋下和乳房下方邊緣的摺痕位開刀。不過隆胸始終是開刀手術及作全身麻醉，存在一定風險，而每個方法亦有利有弊。

乳暈開刀法
優點：乳暈顏色較暗，且皮膚凹凸不平，傷口疤痕自然不明顯。
缺點：乳房照樣可以製造人奶，但乳腺有機會在手術時受損，減少乳汁分泌，亦有機會減低乳暈的敏感度。
腋下開刀法
優點：腋下切口可以隱藏在腋窩中，而且和腋下的皺摺位十分相似，不易察覺。
缺點：體內矽體位置相對較高，令「事業線」唔明顯。
乳房邊緣開刀法
優點：事業線較明顯，假體移位情況少。
缺點：留有疤痕。

太空科技料矽膠
隆胸並非愈大愈好，也要搵啱自己身形的假波。身形瘦削的莊思敏聽取醫生的專業意見後，就選擇植入06年才研發的第五代矽膠乳房假體，矽體物料是利用太空科技的高度黏合性凝膠製造，曾接受被貨車輾過的測試亦不會破裂。Dr. Reborn專業醫生美學中心發言人陳小姐稱此矽膠獲國際認可，保證安全，她說：「莊思敏今次隆胸嗰對矽膠屬於絨面水滴形矽膠（圖），我哋專登喺美國嗰邊訂番嚟。水滴形設計最貼近女性胸部形態，絨面嘅設計係可以防止矽袋移位。」

隆胸後護理程序
莊思敏今次手術順利，接受全身麻醉後，醫生花了一小時就成功為她隆胸。雖然手術時間短，事後護理功夫反而要特別注意，胸部亦要待半年後才有最完美自然的效果。

手術後當日
由於需要接受全身麻醉，完成手術後也要等麻醉藥力散退（大概四至五小時），莊思敏才可離開診所。手術後她要圍上多條胸帶固定胸部，當晚亦不可沖涼。
第一星期
手術後頭四天傷口會痛，需要服食消炎止痛藥。全日亦要紮住胸帶，如沾濕了傷口紗布，切記要在傷口抹上消毒藥水後，即時換上全新紗布，以免發炎。
第二星期
傷口可以拆線，亦不需再束胸帶。之後可以戴一些質地柔軟的運動型胸圍，切記不能戴承托力強的鐵線胸圍。
第三星期
傷口消腫，但胸部質感會較硬，建議多按摩胸部，令胸部保持柔軟、胸形自然。胸形於約半年後就呈現最佳效果。

曾被彈身材差
莊思敏今次接受升兩cup的隆胸手術，是要在兩邊乳暈底部開刀，然後將兩個分別230c.c.（約兩磅重）的矽袋放入胸部，再將傷口縫針，聽來令人心寒。不過對天生上圍只有31A的她來說，最難忍的並非如此，而是別人揶揄的說話，「好多年前做model嗰陣，唔使要求身材好，但係我今年都30歲，年紀愈來愈大，好多show都要求我着晚裝。試過有一次試身嗰陣，俾個designer當住好多人面前彈我身材差，話我咁嘅身材戴wonder bra都冇嘢睇。我諗邊個女人聽到，都會唔舒服囉！」她說時還有點不忿。

其實在莊思敏決定隆胸前，美容中心就她的體形為她挑選適合的矽膠假體，莊思敏亦曾逐一放上手測試假體重量和手感。最後在鹽水袋和矽膠之中，選擇了較自然的水滴形矽膠。當日莊母（後）亦全程在旁陪住。

唔考慮打針隆胸
惡毒批評令莊思敏倍添自卑，促成她隆胸的決心，於是四處徵詢朋友意見，最終找到一了百了的隆胸方法，就是開刀塞矽袋。「我試過用人手豐胸，但效果只係得一個星期，後來又諗過打透明質酸，但始終唔係世界認可。之前試過打botox瘦面，個醫生又打咗落神經線度，令我塊面嘅肌肉僵硬，所以唔係好信打針呢樣嘢。喺乳暈開刀就算有疤痕，都係得我同男朋友見到啫，唔會人人都見到！」
男人對假波向來棹忌，莊思敏亦曾花過不少唇舌，說服男友吳浩康同意。「我話俾佢知嗰陣，佢淨係問我有冇咁嘅需要，完全冇話介意假胸。我同佢傾咗三次之後，最後佢都支持我去隆胸，不過就擔心第時我身材好咗，會着得愈嚟愈性感。其實依家啲男人個口就話介意，但不知幾想自己有個身材好嘅女朋友囉！」

向父母先斬後奏
男友吳浩康唔介意，但身體髮膚始終受諸父母，家人是她今次隆胸最難過的一關，加上她父親莊寶身為馬來西亞拿督，有財有地位，所以莊思敏惟有選擇先斬後奏。「我同美容公司簽完約先同屋企人講，媽咪覺得隆胸呢樣嘢唔係咁有需要，唔使特登去整。爹哋反而冇乜意見，而我兩個阿妹就冇乜所謂，叫我想做就去做。其實做得唔靚咪拆番出嚟囉！之前樂基兒都因為重得滯就拆出嚟啦！」
有個8億身家的父親，莊思敏大可安心繼續在娛圈浮沉，不過近日她就簽約成為王晶旗下藝人，一心闖影壇。「如果我可以攤大手板，咁我就唔使簽晶哥啦，拍戲咁辛苦。屋企人有錢係佢哋嘅事，啲錢從來都冇過我手，我出嚟做嘢之後都冇問過佢哋攞錢。今次去隆胸都係想第時多啲工作機會，話俾人聽我係有心喺呢行撈，唔係玩玩下。」

拿督母親緊張監場
得悉女兒隆胸後，定居於馬來西亞的莊母大為緊張，上周更專誠返港[目及]實女兒。上周五（6日）中午12時，莊思敏到診所接受隆胸手術，莊母亦有親自監場，對記者提問，一概不答。
正式入手術室前，莊思敏需要簽署幾份同意書，表示已清楚了解隆胸手術構成的風險。記者發現每當莊簽完一份文件，莊母一定會將該文件一字不漏重新過目一次，相當緊張。由於莊思敏於手術前需接受全身麻醉，故她隆胸後亦要待麻醉藥力散退後才可正式離開診所。約晚上8時，戴上黑超和披上圍巾的莊思敏離開診所，當時她明顯腳步浮浮，登上的士時也要由莊母扶實。
為免傷口爆裂，莊思敏在屋企休息了三天，直至周二（9曰），她再到診所清洗傷口。由於胸部需要束上胸帶，所以她暫時不能遞高雙手和拎重嘢。雖然當日她穿上較鬆身的黑色恤衫，但胸部明顯豐滿不少。她向記者說：「第一日個傷口真係好痛，瞓落張牀度都要媽咪扶住，成晚瞓得唔好。依家已經舒服啲，條胸帶束得太緊，我夜晚都會整鬆啲先瞓。」記者問她要承受痛楚，有否後悔？她說：「我好滿意整完嘅效果，好自然。今次我公開講，係我唔想講大話，整得就預咗俾人知，呢樣嘢冇得呃，唔通話俾人聽食乜整大個胸咩！反而我依家最擔心係啲人會點樣批評我！」

吳浩康：佢開心就冇問題
本周三，記者致電身在內地拍劇的吳浩康，對於女友公開隆胸一事，他說：「佢又唔係做啲傷天害理嘅事，總之佢鍾意同開心就冇問題，我都會支持佢！」

拍拖近五年的吳浩康和莊思敏感情穩定，月前吳浩康更坦言有結婚大計，「其實睇吓佢點，我就好ok，不過兩、三年後先結，依家儲定錢先。」

複製袁彌明開眼路
除了乳暈開刀隆胸外，莊思敏今次亦做埋開眼手術，由內雙眼皮變成真雙眼皮，她說：「我兩年前已經考慮整，問過身邊好多整咗雙眼皮朋友嘅意見，佢哋有建議我返內地開眼，不過我就唔敢，整得唔靚冇得追究。」去年她在活動上碰見剛整完雙眼皮手術的袁彌明，就立即請她教路，莊續說：「我一見到佢（袁）就叫佢闔埋對眼，俾我睇吓效果自唔自然！」莊思敏最終複製袁彌明開眼法，在左右兩邊眼皮各拮七針，用交叉勾法將眼皮吊起，此手術費約萬八元。
Dr. Reborn發言人陳小姐說：「呢種手術線可以永久逗留喺人體內，效果可維持10至15年。」手術當日，莊思敏接受的開眼手術約10分鐘便順利完成，事後她說：「對眼大咗好多，不過依家仲係好腫，出席活動惟有戴住黑超先，估計兩個禮拜後可以見人。」

敢作敢為藝人
圈中曾經接受整容手術的男女藝人多不勝數，不過能夠真正大方承認自己整容的，着實冇幾多個，她們亦承受過不少壓力。

樂基兒僭建後拆彈
04年，當時年僅24歲的樂基兒行泳衣騷時被發現身材突變，由32A升至34C，被記者追問下大方承認隆胸，她說：「我唔想講大話，初時都唔知點答，不過你（記者）問我，我再話唔係，仲核突！好多鬼妹都係咁，冇乜所謂。」
05年6月，樂基兒與黎明拍拖後，7月便甘心為男友「拆彈」，當時她解釋是：「因為胸部嘅負荷造成腰痛，為咗健康至有呢個決定。」樂基兒的付出果然修成正果，去年被揭發早已成為黎太。

吳文忻公開大執過程
06年，「勾鼻妹」吳文忻接受蕭定一的百萬酬勞利誘，成為首位任整容代言人的香港女星，更遠赴首爾接受整鼻、削骨、抽脂等7項整容手術。整容不久她就與有「南丫島王子」之稱的男友分手，有傳是遭男友嫌棄。周三記者致電吳，她說：「我整完其實有後悔過，唔係後悔整，係後悔公開話俾人聽，因為香港人實在太保守，所以覺得莊思敏好勇敢。」

甄穎珊隆胸植髮
曾注入致癌物質PAAG隆胸的甄穎珊，07年先抽出PAAG，後植入鹽水袋，營造33C「大騎樓」，再做埋植髮、矯齒等手術。甄說：「我唔係鼓吹人隆胸，我本身同莊思敏都識，可能會交換吓心得，我好欣賞佢敢做敢認」。

袁彌明勾出雙眼皮
袁彌明早已自爆打肉毒桿菌針瘦面和去皺。去年中，她更加入整容代言人行列，接受以交叉縫法勾出雙眼皮的手術。對於莊思敏公開隆胸，她說：「模特兒身材好啲，點都對佢哋有幫助。」

8億拿督富家女
現年30歲的莊思敏，家境富裕，父親莊寶為馬來西亞華僑富商，亦是香港上市公司中國光大控股有限公司的前主席。母親江玉球曾是麗的電視藝員，而曾執導《雙子神偷》的江道海則是她舅父，大律師清洪是她契爺。莊氏家族生意包括珠寶、紙業、房地產投資等，家族身家估計逾8億元。08年，莊寶獲馬來西亞政府封為拿督，家人更專程到當地關丹觀禮。
原本與父母一家居於山頂市值近1億的獨立屋的莊思敏，為了方便工作，月前與妹妹莊思明租住貝沙灣高層單位。

8月6日手術前A級平胸
上周五，莊思敏戴上束髮帽，瞓上手術牀，準備接受為時1小時的隆胸手術，在每邊乳房塞進230c.c.（約兩磅重）的矽膠假體。