新兵日記稱霸楊謹華慘輸巨型 Madam 壹週刊 1066期 @ 娛樂八掛大放送★

入行7年只屬二線尾三線頭嘅劉香慈，全靠爆乳女士官長人氣反彈，雖然拍《新兵日記》好辛苦，試過中暑兼尿道炎，操練體能過度咪咪由E級變D級，但係家陣有得紅，咩都抵番晒！
姓名：劉香慈
身高：171cm
體重：50kg
三圍：32D、24、36
出生日期：1985年1月13日（25歲）

鹹魚翻生
偶像劇收視必勝之道在於兩大因素：1. 主角要夠紅；2. 劇情夠婆媽。所以當收視長勝將軍「三立電視台」播出由楊謹華、明道主演嘅全新偶像劇《鍾無艷》，以為實掂硬，點知俾民視偶像劇《新兵日記》以黑馬姿態跑出，播到第三集已經打破《命中注定我愛你》最高13.64冠軍收視，高見13.88，約457萬人爭住煲。
以當兵做題材嘅《新》劇，由台灣國防部支援拍攝，劇中演員個個都要入軍營，拍劇辛苦過真係去當兵，大牌花旦小生無人肯接，所以陣容只屬二線。無一哥一姐坐鎮都咁多人睇？贏在劇情笑位多，講班少爺仔入伍當兵姐手姐腳烏龍百出，煲劇師奶睇見都識笑，加上劇中飾演女士官長嘅劉香慈，D級巨乳經常响劇中上山下海練跑做掌上壓，令昔日俾人鬧戲屎無人氣嘅劉香慈鹹魚翻生，成為麻甩視迷新女神。

人out累街坊
《鍾無艷》變大輸家，「三立」高層都一地眼鏡碎，當日拍《敗犬女王》叫好叫座嘅楊謹華，突然間變成收視毒藥，無論身材同人氣都輸俾劉香慈，歸根究底其實明道要負最大責任。
想當年憑《王子變青蛙》爆紅，明道之後轉攻大陸棄守台灣，收到《命中注定我愛你》劇本都話唔拍，益咗「翻版明道」阮經天一炮而紅。
以為回歸拍劇可以收復失地，明道仲自願收半價拍《鍾》劇，點知真係平嘢無好，據聞明道都好失望，同「三立」高層死晒狗話自己人氣out晒，拖累收視仆直。唉！而家唔係講對唔住嘅時候，不如同楊謹華一齊諗吓有咩補救方法拯救收視好過啦！

小小彬假返學真搵錢
做童星做到愈嚟愈乞人憎嘅小小彬，佢老豆小彬彬為咗保住阿仔嘅星途，於是順應民意，安排5歲小小彬返學讀書，做番個正常小朋友。
上個月中開學，小彬彬誓神劈願話寧願搵少啲，都會幫阿仔推job，等佢專心讀書，點知轉個頭就俾學校家長打去報館踢爆，話佢返3日學請8日假，擺明做騷俾傳媒睇！
對於二五家長指控，小彬彬話係阿仔感冒未清，唔敢俾佢返學，但病假期間三父子一齊出席健康基金會活動，小小彬不知幾咁精靈生猛，點睇都唔似有病囉！

請「病假」期間，小小彬（右一）同細佬迷你彬、老豆小彬彬，三父子一齊出席基金會活動，何只搵錢扮病唔返學，之後仲會飛去新加坡登台，傳聞酬勞有廿幾萬港幣，到時小小彬會表演Super Junior嘅《SORRY, SORRY》舞，用咗3日時間排練喎！o依！又話病嘅？

健身look
劉香慈平日起碼做到90下sit up，女人連一下都做唔到嘅掌上壓，對佢係easy job，加埋D級好波，男人實鍾意，我只係唔明，點解當兵皮膚可以咁白啫！