亞視棄將筱靖插爆：o靚模好cheap！壹週刊 1066期 @ 娛樂八掛大放送★

自從Angelababy、周秀娜等彈起，o靚模潮越吹越勁，搞到書展、動漫節都禁o靚模踩場，黃秋生叫佢哋去搵「紫藤」，就連落選亞姐陳筱靖亦加入戰團拒與o靚模同台，卒之連份工都冇埋，她仍硬撐：「冇話累唔累，只要你有料，人哋自然搵你。」
能夠如此「老定」，皆因她屋企有米，唔做亞視可以搞家業，但內心氣憤難平，拍照時她嫌推o靚模寫真落地不夠效果，自動波提議去盡啲，「不如撕爛張poster啦。」仲一面撕一面咬牙切齒話：「佢哋真係好cheap！」

我冇錯
被亞視怒炒，皆因她缺席與o靚模合作的節目，她解說因為當日屋企有事不能出席，但公司認為她遲了請假，所以發出警告信，而她卻將信件放上微博，「我只係想將此事告知父母，亞視認為做法不當。」結果亞視提早結束與她的經理人合約，「因為蠢囉，諗住warning letter之嘛，原來係戇居。」她強調自己無嘢做錯，「一路以嚟公司俾乜我接乜，試過同o靚模同場宣傳，都係佢哋有佢哋做，我有我做，唔需要講嘢喎，你覺得需要有交流咩？亞姐同o靚模，真係冇可能係一樣。」
筱靖企硬零交流，但o靚模Rainbow坦言想跟她合作，更稱呼她為前輩，但講者無心聽者有意，一聽到「前輩」二字，廿五歲的筱靖總覺得被寸老嘢，還「語重心長」的說：「我而家就用前輩身份話俾佢哋知，呢行好得意，無論入咗行、未入行啲人都發明星夢，十八、九歲腦囟都未生埋，書又唔讀，做埋啲咁嘅嘢，係咪影響社會風氣先？」之後她越講越激，「刷牙漏牙膏，食親嘢都漏口，擺埋啲甫士令男人諗歪晒，越做越cheap！行為、意識完全唔掂，呢啲咪錯晒囉！」她試過被途人誤認為「模媽Mia」，即時火都嚟埋，「我行行吓街，突然間有個男仔望住我，然後話：『Mia呀？』我即刻話：『Mi咩呀？』幾嬲呀我！」

神聖亞姐
o靚模賣的是性感，其實有「乳牛搖籃」之稱的亞洲小姐亦同樣給人這種感覺，筱靖立即劃清界線，「完全唔同level，亞姐都有性感嘅時候，但我哋冇擺啲咁嘅甫士、冇做過乜嘢令到人想入非非喎，加上我哋選美嘅女仔，係講美貌智慧，著泳衣，都係建立在高貴上面。」亞姐向來形象麻麻，歷屆均有不少亞姐賣大包、搵老細，為了洗底，她在「仁美清敍」擔任公關，自覺更加充滿使命感，「我要俾所有人知亞姐唔係咁，唔好將我哋當做o靚模一樣，所以冇乜必要你（o靚模）都唔好同我同場。」問她會否因亞姐而傲？她答得爽快：「當然啦，我絕對係要令所有人知道我曾經參加過亞姐，係一個光榮，要令所有人感覺到，亞姐係神聖嘅！」
不過很多時筱靖出活動都行性感，露的程度亦不下於o靚模，她反駁說這是娛圈規則，「一路以嚟我意識到都係咁，但係我除咗性感，都會做慈善，本身亦有做要靠才藝嘅主持，o靚模又喺邊呢？除咗性感同泳衣，我睇唔到其他嘢。」

靠屋企
為強調自己與o靚模不同，她更帶齊資料、書籍大晒家底背景，「我阿爺叫陳培，係中國酵母引進之父。」中國有好味的麵包食都係靠筱靖阿爺。而廣州出生的她自小已是校內搞事分子，一個禮拜見三次家長。十一歲移民加拿大，○七年在西雅圖城市大學讀二年級的她，在父母不知情下，於香港旅行時參加亞姐，落選後簽約亞視，月薪六千，拍過劇做過主持，直至現在仍要問屋企攞「零用」，就連大埔的自置物業、每日揸的平治房車都是爺爺名下，難得她臉不紅、耳不熱說：「絕對需要佢哋接濟啦，如果唔係就食穀種啦。」
現在她幫屋企打理中式禮餅生意，但誓言仍會在娛圈撐到底，「我一定堅持到最後，係對屋企、自己的承諾，直至冇人搵我做嘢為止，到時天要滅我，我都冇辦法。」

雖然她睇唔起o靚模賣肉，不過○七年參選亞姐期間，就經常刻意身露胸搶鏡。