娛樂八掛大放送★

一億二千萬投資，將於國慶檔期上映的新片《精武風雲•陳真》，因為有票房保證甄子丹孭飛，戲未上畫，已在歐美等二十個國家成功賣片，更成為今屆威尼斯影展開幕電影及多倫多國際電影節的「特別推薦電影」。
導演劉偉強重金打造舊上海華麗場景之外，重新塑造陳真，戲中除了兩場重頭動作場面，唔再由頭打到落尾的甄子丹，有唔少文戲，挑戰演技，令他有機再敲影帝之門，國內發行更以二億五千萬票房為目標。

紳士武夫
相隔十五年再做陳真，今次做埋動作指導的甄子丹，為自己在戲中設計兩場主打動作場面，一場是他以黑皮衣「青蜂俠」造型，在雨中殺敵，據了解，動作設計以李小龍的截拳道為基礎，結合格鬥動作，藉此向李小龍致敬。
另一場重頭戲則保留傳統經典，甄子丹穿中山裝以一敵眾，將當年踢碎「東亞病夫」牌匾的經典場面重新包裝。
甄子丹打得，不過導演劉偉強唔想齋打，重新設計一個從歐洲回歸，識彈琴、歎雪茄、扮奇勒基寶的陳真，並非武夫咁簡單。
當中紳士造型，甄子丹艷福無邊，在二十年代舊上海歌舞廳，邂逅飾演舞女的舒淇，同飾演江湖大佬的黃秋生爭女，三角關係糾纏不清。

舒淇大整蠱
要突破拍文戲，甄子丹在舞廳彈琴冧女的戲份，已經拍足成日。
經常在戲中俾仔圍打餐死的甄子丹，今次最大突破是要攬女俾女圍，「平時拍慣動作，對手都是男性，大家有身體接觸無乜所謂，嗰場戲對住咁多女仔，係有少少唔自在，攬腰搭膊要小心就住就住，仲辛苦過打。」甄子丹說。
跟舒淇拍談情戲時，甄子丹亦經常被對方整蠱。他說：「佢（舒淇）知我只要一同佢眼神有接觸，就忍唔住笑講錯對白，搞到我NG。」至於繼《天堂口》再次開金口唱歌的舒淇說：「唱歌對我來講是好難，導演想我自己唱番，俾信心我，無理由唔試。」

甄子丹演的新版陳真，留二撇雞穿西裝扮紳士，跟演舞女的舒淇眉來眼去。

造型似足奇勒基寶的甄子丹，戲中歎住雪茄攬女，唔習慣的他，顯得很生硬。

戲中除了有紅顏知己舒淇外，這場戲甄子丹（箭嘴）艷福無邊，被十多個女仔圍住。

做埋動作指導的甄子丹，這招掃堂腿，似足當年踢爛牌匾的經典場面。

甄子丹在片中集中打兩場，其中扮相似青蜂俠的動作更向李小龍致敬。

黃秋生和甄子丹在戲中為爭舒淇而各出奇謀。

戲中演舞女的舒淇，對住飾演惡霸的黃秋生，電力十足。

當日有份幫手拍《十月圍城》的劉偉強，在《精》片中重用這個場景，用得唔好嘥。

舒淇飾演一個能歌善舞的舞女，她再次開金口唱歌。

為重現舊上海繁華面貌，導演花過百萬打造華麗舞廳場景。