開戲無期宣傳大減　泳兒遭祖兒打壓忽然1周 785期－娛樂八掛大放送★

貌合神離
在慶功宴上祖兒全程當泳兒透明，兩人完全冇傾偈冇眼神接觸，就算影大合照，兩人影完即閃，企埋都費事。

入行11年的容祖兒（Joey）早前宣布同英皇續約成功，皆大歡喜。不過近年深得老闆楊受成寵愛嘅泳兒（Vincy）就笑唔出，事關祖兒約續約條件之一，就係要打壓眼中釘泳兒！
為了一姐祖兒肯續約，楊生即對泳兒閂水喉，年初仍排場十足嘅泳兒，近日助手已由三變一，原定安排擔正拍住霆鋒嘅電影又開拍無期，連新碟發布會都由大酒店變為中環餐廳，仲要同鍾舒漫孖住搞。被祖兒咁打壓法，唔怪得泳兒人氣跌晒Watt啦！

出道4年的泳兒，06年憑一首《感應》為人熟識，08年與海鳴威合唱《我的回憶不是我的》更令泳兒人氣急速上升，老闆楊受成亦對泳兒另眼相看。知情人士說：「當年泳兒贏咗新秀，楊生一直都冇留意佢，直到佢同海鳴威首歌唱到街知巷聞，楊生先開始留意佢。泳兒好識冧楊生，講親嘢都陰聲細氣，又聽教聽話，之後佢就開始得寵喇！楊生仲叫宣傳部俾多啲資源谷泳兒。」

得寵後囂爆
泳兒得寵後即囂態盡現，人前人後擺阿姐款。據知情人士透露：「泳兒得寵嗰期真係好囂，即時要求三個助手跟身，喺公司見到祖兒都當佢透明，佢淨係對楊生楊太有禮貌，所以祖兒一直視佢為眼中釘，而其他英皇星就埋祖兒堆，都唔鍾意泳兒！」雖然辣㷫公司上下，但楊生對泳兒依然寵愛有加。去年找來彭浩翔寫劇本，搵霆鋒做男主角，打算開戲力谷泳兒。唱片方面亦應承今年會豪花十幾萬在酒店大搞新碟發布會，可惜埋門一腳被一姐祖兒破壞。

泳兒埋唔到堆
上周六（7日），英皇歌手齊齊出席「新城國語力頒獎禮」慶功宴，大合照時，friend底嘅祖兒同林峯自動埋堆，唯獨無人理嘅泳兒縮埋一角，唔留心真係睇佢唔到！

一姐排場勁
祖兒去到邊都有兩名助手（白圈）跟身，拎獎都有助手代勞（小圖），排場十足。

即時打入冷宮
去年英皇已開始與今年7月約滿的祖兒傾續約，雙方傾了幾個月，到兩個月前終達成共識，祖兒與英皇續約5年。據知傾約其間，祖兒曾對楊生開出一個條件，就是要公司對泳兒閂水喉。知情人士說：「雖然楊生錫泳兒，但講賺錢能力，祖兒始終係一姐，所以祖兒開到聲，楊生惟有犧牲泳兒。本來開俾泳兒做女主角嘅電影依家開拍無期，新碟宣傳亦cut晒budget，連助手都變番一個。」
剛於7月中推出新碟《預見……遇見》的泳兒，最終屈在旺角唱片店中舉行簽名會，酒店發布會則變成孖住鍾舒漫在中環餐廳細搞。
上週六（7日）泳兒被記者問到有關電影開拍無期一事，本欲開口回應，卻遭助手及另一英皇工作人員攔截搶答：「一切都要等公司決定！（連新碟宣傳都cut budget喎，係咪俾祖兒打壓？）唔回應！」
之後記者求證祖兒，其助手亦即時攔截說：「祖兒唔得閒回應。」顯得相當避忌。

泳兒尷尬苦笑
記者問泳兒有關遭祖兒打壓一事，本來想開口答嘅泳兒，被殺出嘅英皇助手及英皇工作人員阻止，全程由助手代答，有口難言嘅泳兒惟有尷尬苦笑。

新碟宣傳縮皮
上周三（4日）泳兒孖住鍾舒漫喺中環Backstage Live Restaurant搞新碟發布會，雖然同場有英皇高層吳雨和霍汶希撐場，不過公司只送上價值百幾蚊嘅美心蛋糕。原先安排十幾萬的酒店排場變成同鍾舒漫在中環餐廳搞，難怪泳兒笑得好牽強。

旺角搞豆泥宣傳
其實泳兒的新碟在7月已經開始發售，不過宣傳欠奉，簽名會更在旺角蚊型唱片舖搞，人流係夠，不過冇排場喎！

女主角夢碎
楊生原先安排泳兒進軍大銀幕，由彭浩翔寫劇本，仲搵霆鋒做男主角。可惜事與願違，新戲開拍期一拖再拖，本刊多次致電彭浩翔，但直至截稿前仍未回覆，決意封口。

去年排頭位
09年泳兒彈出，深受英皇娛樂老闆楊受成重用，同年10月英皇成立十周年舉行記者會，影大合照時泳兒（圈）與一姐祖兒同在前排，地位相若。

陪楊生睇騷
09年6月，得寵嘅泳兒獲楊生欽點到紅館陪他睇林峯個唱。有幸陪老闆睇騷，泳兒睇得好投入，仲同身旁嘅劉家昌好好傾。