像居酒屋這種飲幾杯佐小食、輕鬆減壓的地方，原來也可以搞搞新意。要藝人陳自瑤（Yoyo）從銅鑼灣走到跑馬地，再行兩層樓梯才到達的新店「連粵日」粵饌居酒屋，就將小碟頭粵菜跟日本清酒來個連結。Yoyo飲啖冰凍果酒後，即開始掃蕩枱上的話梅醉涼瓜、九製陳皮香酥肉及清湯蘿蔔牛腩……
連粵日既然創新，就連環境也跟一般居酒屋不相似，Yoyo坐在寬闊的黑皮椅上，從落地玻璃看到開揚街景，還有輕鬆音樂，Cozy得隨時可以Hea幾個鐘。 話明是居酒屋，酒櫃當然不可或缺。餐廳一隅的玻璃酒櫃，放滿各式日本清酒，用來「刺激收視」，令大家飲多兩杯，旁邊更有張用清酒樽蓋砌出日本國旗的海報，搶眼又貼題。店主Jareth愛煮愛食，夫妻檔開店就是想以美食會客。他說：「居酒屋以酒為先，這裏就有20多種酒，而且同清酒供應商幾熟落，不時會有坊間少見的、特別的靚酒。像Yoyo飲的蜜柑酒，每年只在6至8月推出，果味好香濃。」 Yoyo拿着酒杯表示：「無論飲咩酒，每次都只會淺嘗，不過，飲少少試吓味，等心情Relax啲都幾好。呢杯蜜柑酒聞落好香橙味，飲落就有些少澀，但刺激到胃口，可以食多啲。」她隨後又試了濁酒：「米白色的酒帶點甜味，都幾特別，入口米味香濃。」 飲清酒，理所當然襯和食，這裏偏來個反傳統，用粵菜配搭，還改以小碟頭奉客，既像居酒屋的佐酒風格，亦轉出新鮮感，即使人少少，也可以試多幾款。這裏的粵菜經過改良，混合了和式風味，像柚子番茄、梅子脆雞翼等，亦不乏以話梅、花雕及柚子等入饌，酸香滋味可刺激食欲，賣相精致亦加分。 專心試味後，Yoyo說出個人食評：「涼瓜好爽脆，味道清新；牛腩熱辣辣上枱，聞到都想食，仲好鬆軟入味，記得要連湯都飲埋。」能做出一道道佳餚，全因小店用心炮製，為要有靚材料，Jareth會在不同地方搜羅食材：九龍城買牛肉，灣仔、銅鑼灣買海鮮等。他說：「上樓舖租金較平，可以用多點錢去買靚料，好唔好，食客一試就知。」 夏天不止水果當造，也是品嘗果酒的好時候，清香開胃，正好用來趕走悶熱，增進食欲。除了為人熟悉的梅酒，也有蜜柑酒、柚子酒、蘋果酒等，口味多多，而且這類酒的酒精含量低，香甜之中帶少少酒味，容易入口，特別受女士們歡迎。 查詢：2808 0309
話梅醉涼瓜$28
涼瓜排得像層層疊，賣相不俗，經出水後，食落甚為爽脆，還以話梅汁浸過夜，特別入味。
清湯蘿蔔牛腩$68
嚴選好味的坑腩，難怪鬆軟嫩滑，湯底更用上很多骨熬十多個鐘而成，清甜無比。
鵝肝蛋珍珠飯$98
厚厚的鵝肝跟雞蛋，看到也覺豐富，食時將兩者混和撈進飯中，便可一啖食齊多種滋味。
多款清酒「列陣」
（左）奧之松吟釀$98
（右）松竹梅純米濁酒 $88
奧之松為2008及2009受賞酒，味道簡單不太甜；而松竹梅色澤米白，入口甜甜的很易入喉。
陳自瑤近況
正拍攝古裝劇《洪武三十二》，飾演歌姬一角；而有份參與演出的劇集《施公奇案》及《女人最痛》亦會陸續登場。
Yoyo平日愛煮愛食，對着一枱美食笑得特別開心。
有見過這種居酒屋嗎？可坐在寬闊的黑皮椅上，從落地玻璃看到開揚街景，還有輕鬆音樂，店子小小卻Cozy。
輕盈新派粵菜
夏天啱飲果酒
九製陳皮香酥肉$52
如果有試過九製陳皮，這道菜相信能勾起你的回憶。用九製陳皮將梅頭肉醃過夜再香炸，大大件佐酒更滿足。
留言列表
{{ article.title }}
